Yenkuik tokniuj itech Grupo akin Tlayekana ipan nochi tlanechikoltin

IPAN miércoles 24 de enero de 2018, tokniuan akin nemij Betel tlen onka Estados Unidos niman Canadá melak oyolpakej pampa: tokniuj Kenneth Cook, aman teuan yes itech Grupo akin Kinyekana iTeixpantijkauan Jehová.

Tokniuj Cook otlakat niman onoskalti ipan sur central de Pensilvania (Estados Unidos). Okixmat tlen melauak pampa se akin iuan yaya ipan kaltlamachtijli okinojnots. Yejuin opanok achto ika tlamis secundaria niman onoapolakti ipan 7 de junio de 1980. Opeuj tekiti ken precursor regular ipan 1 de septiembre de 1982. Opanok ome xiuitl niman okinotskej ipan Betel. Opeuj tekiti ipan Wallkill (Nueva York) ipan 12 de octubre de 1984.

Ipan 25 xiuitl, tokniuj Cook miyekan yotekit ipan imprenta niman Oficina de Betel. Ipan 1996, ononamikti iuan tokniuj Jamie niman opeuj iuan tekitij Wallkill. Ipan diciembre de 2009, okintitlankej ipan Centro Educativo de la Watchtower, tlen onka Patterson, kampa tokniuj Cook okijlikej matlapaleui ipan departamento de Correspondencia de Redacción. Ipan abril de 2016, ijkuak oksejpa onokuepkej Wallkill, tokniuan Cook okintitlankej Brooklyn. Niman opanok makuijli metstli, okintitlankej ipan oficinas kampa noyekanaj nochi sucursales tlen onka Warwick. Ipan enero de 2017, tokniuj Cook okitlalijkej ken tlapaleuijketl itech Grupo akin kiyekana tlen Noijkuiloua.