¿Itikmatiya?

¿Tlenon kichiuaya yeuejkaui se “tekitlayekanketl”?

YEUEJKAUI se “tekitlayekanketl” noso mayordomo kitaya ika nochi kuajli maonia ipan ikal iteko noso tlen iyaxka katka.

Ijkuak José, ikoneuj Jacob, tlakeuajli katka ipan kalpan Egipto, iteko okitlali ken “tekitlayekanketl” itech nochi ikal. Kema, yejuin tlakatl egipcio okimaktili José “nochi tlen kipiyaya” niman ijkon makitlajpiya (Gén. 39:2-6). Sakin ika José opeuj tlanauatia Egipto, yejua noijki okipix ichan se tekitlayekanketl (Gén. 44:4).

Ipan itonaluan Jesús, akin kipiayaj intlaluan chantiyaj ipan se ueyi kalpan niman xchantiyaj kampa kipiayaj intlaluan. Ika yejon, kintlaliayaj seki tekitlayekankej niman ijkon makitakan kenon tekitiyaj intlakeualuan.

¿Kenon nonekiya yes se tekitlayekanketl? Columela, se tlajkuilojketl romano akin onen ipan kachtopa siglo, okijto ika yejon tekipanojketl akin kitlaliskiaj ken tekitlayekanketl nonekiya kimatstos kenon nochiua yejon tekitl. Nonekiya “kipiyas kuajkualtsitsintin kualneskayomej” niman ijkon maueli matlanauati, san ika, noijki maka matetlajyouilti. Columela noijki okijto ika melak notlajtlaniya ika yejuin tekitlayekanketl “maka makinemili ika nochi kimati niman makinekto uelis okseki tlemach tlen xkimati”.

ITlajtol toTajtsin kiteneua tlen kichiuaya se tekitlayekanketl niman ijkon techtomilis seki tekitl tlen nochiua ipan tlanechikoltin. Se neskayotl, apóstol Pedro kinyolchikauaya tokniuan makitekitiltikan tlen toTajtsin yokinmakaka niman ijkon manopaleuikan se iuan okse ken kuajli tekitlayekankej (1 Ped. 4:10).

Jesús noijki otlajto itech se tekitlayekanketl ipan Lucas 16:1-8. Noijki, ijkuak okijto tlenon panoskia ijkuak itlanauatijtoskia iluikak, okimijli inomachtijkauan ika kitlaliskia se “tekitketl” yolmelauak niman tlamachilise noso “tekitlayekanketl”. ¿Tlenon kichiuaskia yejuin tekitlayekanketl? Kinmakaskia nochimej akin kichiuaskiaj ken Cristo tlen kinpoloskia niman ijkon chikauak makipiyakan intlaneltokil ipan sa ika tlami tonaltin (Mat. 24:45-47; Luc. 12:42). Melak tiktlasojkamatij tikinseliskej yejuin amatlajkuiloltin tlen “tekitketl” yolmelauak kiyekchiua niman kixeloua ipan nochi tlaltikpaktli niman ijkon chikauak tikpiyaskej totlaneltokil.