Matomachtijtokan kuajli matitenojnotsakan
1. ¿Tlenon neskayomej ipan kachtopa siglo teititia ika noneki tochikauaskej kuajli titenojnotsaskej?
1 Akin kichiuaj ken Cristo noneki tomachtiskej kuajli matitenojnotsakan. Ika yejon, Jesús okinyektlali inomachtijkauan niman okinpaleui kuajli makichiuakan intekiyo (Luc. 9:1-5; 10:1-11). Áquila niman Priscila noijki ijkon okichiujkej ijkuak “más kuajli okitlajtlajtouilijkej on iojui Dios” Apolos (Hech. 18:24-26). Pablo noijki okiyolchikauj Timoteo akin youejkauj tenojnotstimiya, manochikaua manochiua se kuajli tlamachtijketl niman ijkon “ma kitakan nochimej” ika noskaltia (1 Tim. 4:13-15). Maski melak yotiuejkaujkej titenojnotsaj ken titlakeualtin itech toTeko, noneki tikitaskej kenon melak kuajli tikchiuaskej totekiyo.
2. ¿Tlenon uelis tikchiuaskej niman ijkon tiueliskej itech oksekimej?
2 Matiuelikan itech oksekimej. Uelis kuajli tikchiuaskej totekiyo tla tikimitaj oksekimej kenon kichiuaj (Prov. 27:17). Kuakon, ijkuak tontenojnotsaskej, kuajli matikimitakan kenon tenojnotsa akin iuan tiauej. Niman matikintlajtlanilikan akin kuajli tenojnotsaj matechpaleuikan niman matijkakikan tlen techijliaj (Prov. 1:5). ¿Ouijtika tikita oksejpa timokuepas tontetlajpalos, titemachtis itech Biblia noso itech okseki ken titenojnotsas? Matitlajtokan iuan akin tlayekana kampa tontenojnotsaj noso se tenojnotsketl akin kuajli kichiua itekiyo matechpaleui. Matikilnamikikan ika noijki iespíritu santo toTajtsin uelis techpaleuis kuajli matikchiuakan totekiyo. Kuakon nochipa matiktlajtlanikan ipan toteoyouan (Luc. 11:13).
3. ¿Kenon tikseliskej tla techtlajtolpaleuiyaj maski tla xotiktlajtlankej?
3 Tla techtlajtolpaleuiyaj, maski xotiktlajtlankej, maka matikualanikan (Ecl. 7:9). Matiyolyemankej niman matiktlasojkamatikan ken okichiuj Apolos, niman matokauilikan matechpaleuikan. Ijkon tikteititiskej ika titlamachilisejkej (Prov. 12:15).
4. ¿Tlenon techmapeua matomachtikan kuajli matitenojnotsakan?
4 Tla tomachtiaj kuajli titenojnotsaj kiueyichiua toTajtsin. Jesús okinyolchikauj inomachtijkauan kuajli matenojnotsakan ijkuak okimijli itech se neskayotl. Okijto ika yejua katka itemekayo uvas niman inomachtijkauan tlapejpeniltin kentla imatsitsinuan tlen tlaki, tlen iTaj kixima niman ijkon “más ma tlakikan” (Juan 15:2). Ijkon ken akin itlatki uvas kineki melak matlaki kampa kitoka, Jehová kineki melak makipiya itlakilyo ijkuak “ikan totlajtol” titenojnotsaj niman melak kuajli matikchiuakan (Heb. 13:15). ¿Tlenon tikchiuaskej tla tomachtiaj kuajli titenojnotsaskej? Jesús technankilia: “Ijkuak nemejuamej nenkipiaj miyek tlakyotl, noTajtsin kiselia ueyilistli” (Juan 15:8).