Matoyektlalikan ijkuak tikilnamikiskej imikilis Cristo

Ipan metstli nisán, tonajli 13 xiuitl 33, Jesús kimatstoya ika san ipan yejon yeuajli nemiskia akin iuan kuajli nouika niman sakin kimiktiskiaj. San sejpa kipanoltiskia Pascua imiuan pampa aman inomachtijkauan kipanoltiskiaj iTlakualis toTeko. Ika melak ueyi kijtosnekiya yejuin, nonekiya kuajli manoyektlali. Kuakon, okititlan Pedro niman Juan matlayektlalitij (Luc. 22:7-13). Ipan yejon tonajli ika tlayekapan, akin tikpanoltiaj iTlakualis toTeko, kuajli toyektlaliaj (Luc. 22:19, TNM). Matikitakan tlen noneki tikchiuaskej ijkuak xiyejko tonajli metstli 3 abril.

¿Tlenon noneki kichiuaskej tlayekankej?

Noijtos tla notekitiltis Kajli kampa Tosentlaliaj noso oksekan kampa maonia kampa notlalilos, matlauilpan niman maka matonalmikilo. Kintlaliskej akinomej kuajli tlachipauaskej kampa noilnamikis imikilis Cristo.
Kitlapejpeniskej akin kuajli makipanolti tlamachtijli, akin kipeualtis niman tokniuan akin kichiuaskej teoyotl ijkuak kipanoltiskej pan niman vino.
Tla xsan se tlanechikojli nosentlalis, noitas tlen hora nosentlaliskej kanon ika kalakiskej niman kisaskej niman kanon ika kintlaliskej carros.
Kintlapejpeniskej akinomej teseuiskej niman akinomej kipanoltiskej pan niman vino.
Kuajli noitas katlejua kinamiki nopanoltis pan niman vino, maonia platos, copas, mesa niman se mantel tlen kualtsin manesi.

¿Tlenon uelis kichiuas nochi tlanechikojli?

Chikauak matekitikan ijkuak notemakas tlen ika titeyoleuaskej makilnamikitij imikilis Cristo.
Tikijkuilos akinon tikimijlis makilnamikitij imikilis Cristo. Uelis yes akin tikinmachtiaj Biblia, mochanejkauan, akin iuan timomachtia noso titekiti niman okseki akin tikimixmatstika.
Tikpouas tlen nopoua ipan Biblia ipan yejon tonaltin niman itech titlanemilis.
Kuajli tikinselis akin yauej konilnamikiskej imikilis Cristo.