Matochikauakan tikinmachtiskej oksekimej manochiuakan inomachtijkauan Jesús
1. ¿Kenon uelis makisaskej tlaltikpakchanejkej?
1 Itech totekiyo tlen otikchiujkej ipan 2014 kiteititia ika ikalpan toTajtsin tenojnotstika kuajli tlajtoltin itech Tekiuajyotl ika yolpakilistli niman yolchikaualistli (Mat. 24:14, TNM). Pampa titenojnotsaj techajchan, tikintemakaj amatlajkuiloltin pitentsitsintin noso amatsitsintin tlen ika titeyoleuaj niman pampa titenojnotsaj kampa tojlan nojuitilo, aman melak ueli tikimijliaj miyekej tlaltikpakchanejkej itech tlen kijtoua Biblia, xijkon ken yeuejkaui. San ika, tla kinekij makisaskej, noneki tikinpaleuiskej manochiuakan inomachtijkauan Jesús ijkuak tikinmachtiskej tlen melauak itech Biblia (1 Tim. 2:4).
2. ¿Tlen tlajtoltilistin techpaleuiskej nochipa matiktetekiuiltikan se tlamachtijli itech Biblia?
2 Nochipa matiktetekiuiltikan se tlamachtijli itech Biblia. Ijkuak yakaj kuajli techkaki, ¿tikyejyekouaj tiktlajtoltiskej kenon uelis tiknextiskej niman ijkon maka uejkauis oksejpa iuan titlajtoskej niman tiktekiuiltiskej se tlamachtijli itech Biblia? ¿Kemanon otikititijkej akin kemach sejpa otiktlajpalotoj kenon nochiua se tlamachtijli itech Biblia? ¿Kemanon otiktekiuiltijkej se tlamachtijli itech Biblia akin tikmakatokej revistas? ¿Yotikimititijkej videos ¿Tleka noneki timomachtis Biblia? niman ¿Kenon nochiua se tlamachtijli itech Biblia? akin imiuan titekitij noso tomachtiaj ipan kaltlamachtijli, akin chantij nisiuj kampa tichantij, tochanejkauan niman oksekimej akin tikinmixmatstokej? Ijkuak titenojnotsaj ika se carrito noso se mesa, ¿tochikauaj tikimijliskej akin kajsij itlaj amatlajkuilojli ika noijki uelis kiseliskej se tlamachtijli itech Biblia tlen xnotlaxtlaua?
3. ¿Tlenon techpaleuis kuajli matitemachtikan tlen melauak?
3 Itlapaleuilis Jehová niman Jesús. Ijkuak Jesús otlanauati ika makinmachtikan oksekimej manochiuakan inomachtijkauan, okitekitilti tlajtojli “xuiyan”. Ijkon, okiteijli ika noneki tochikauaskej niman tiktejtemoskej kenon titemachtiskej. San ika, xsan toselti otechkauj. Yejua okijto ika touan nemiskia (Mat. 28:19, 20). Noijki, Jehová xsan techmaka iespíritu santo, yejua techmaka tlen uelis tiktekitiltiskej niman techititia kenon uelis tikinmachtiskej oksekimej tlen melauak (Hech. 1:8; 2 Cor. 4:7). Uelis tiktlajtlaniliskej toTajtsin matechmaka ikojtilis niman ijkon ika toyojlo titlapaleuiskej ipan yejuin ueyi tekitl (2 Cor. 3:5).
4. ¿Tleka noneki matochikauakan tikinmachtiskej oksekimej manochiuakan inomachtijkauan Jesús?
4 Melak techyolpaktia ika titenojnotsaj itech kuajli tlajtoltin. San ika, tla ueli tikmachtiaj yakaj tlen melauak niman tikpaleuiyaj mauiya touan ipan “ojtli tlen teuika itech nemilistli”, ok melak ueyi pakilistli tikseliaj (Mat. 7:14, TNM; 1 Tes. 2:19, 20). Niman xsan yejon, tla nochipa tikinpaleuiyaj oksekimej manochiuakan inomachtijkauan Jesús, tikyolpaktiskej Jehová, pampa yejua “nion se tlakatl xkineki ma poliui, yej kineki para nochimej ma noyolpatlakan” (2 Ped. 3:9).