Tlen tetlajtoltiaj tenojnotskej
◼ ¿Noneki tiktekitiltiskej Internet niman ijkon tikinnojnotsaskej noso tikinmachtiskej itech Biblia tlaltikpakchanejkej akin chantij ipan okse país?
Sekimej tlajtolmoyaujkej yokitekitiltijkej Internet niman ijkon kintekiuiltiaj kinmachtiskej itech Biblia tlaltikpakchanejkej akin chantij ipan países kampa xkitekauiliaj manotenojnotsa noso xnemij miyekej iteixpantijkauan Jehová. Kemantika, yejuin melak kuajli onkisa. San ika, uelis xkuajli onkisas tla tiktemaka mocorreo noso timotlajkuilouilia ipan Internet iuan akin xtikixmati. (Xkita ToTekiyo itech Tekiuajyotl, julio 2007, página 3 [xonka ika náhuatl de guerrero].) Maski tikneki tikinnojnotsas tlaltikpakchanejkej akin kinekij kimatiskej itech iTekiuajyo toTajtsin, tla ijkon iuan timotlajkuilouilia uelis kichiuas xmonotsa imiuan akin xyolkuajkualtin niman imiuan akin yokikaujkej kineltokaj tlen melauak (1 Cor. 1:19-25; Col. 2:8). Noijki, kampa xnotekauilia noso san onka kenon kitekauiliaj manotenojnotsa itech iTekiuajyo toTajtsin, kanaj tekiuajkej kitlajtlachiliaj tlen onotitlani. Yejuin uelis kichiuas makinchiuilikan itlaj tlen xkuajli iteixpantijkauan Jehová akin ompa chantij. Ika yejon, tlajtolmoyaujkej xkipiya kintejtemoskej ipan Internet tlaltikpakchanejkej akin chantij ipan okse país niman ijkon kinnojnotsaskej itech kuajli tlajtoltin.
Tla tiknojnotsaj yakaj akin ualeua ipan okse país pampa opaxaloko noso otetlajpaloko, xkipiya tikyejyekoskej tikmachtiskej ijkuak yonokuep kampa ualeua, san tla sucursal tlen techyekana kijtoua ika uelis tikchiuaskej. Tlen kema uelis tikchiuaskej, noneki tikititiskej kenon ipan jw.org uelis kinextis tlamachtiltin noso kenon uelis ontlajkuilos ipan sucursal tlen kiyekana yejon país kampa yejua ualeua. Tla kampa ualeua onka Kajli kampa Tosentlaliaj, uelis tikijliskej ompa mauiya. Tla kinektika makinotsakan iteixpantijkauan Jehová, noneki kuajli matiktlajtoltikan kenon oksejpa uelis tiknextiskej niman tikmakaskej tlayekanketl secretario, yejua kontitlanis Betel ipan jw.org. Sucursal tlen kiyekana totekiyo ipan país kampa yejua chanti kuajli kipaleuis, pampa kuajli kixmatstika kampa tlayekantika. (Xkita ToTekiyo itech Tekiuajyotl, junio 2014, página 7, niman ToTekiyo itech Tekiuajyotl, noviembre 2011, página 2 [xonka ika náhuatl de guerrero].)
Tla yakaj akin yopeuj tikontlajpalouaj yauj ipan okse país, noso yakaj tikmachtijtokej itech Biblia akin ualeua ipan okse país niman san otikixmatkej ipan Internet, noneki tikchiuaskej ijkon ken kijtoua ipan párrafo tlen otiuajpanokej. Tijkauaskej iuan tomachtiskej ijkuak se tokniuj tlajtolmoyaujketl iuan nonotsas kampa chanti. San ika, tla yejuin tlaltikpakchane chanti kampa xkitekauiliaj noso san onka kenon kitekauiliaj manotenojnotsa, noneki kuajli tiknemiliskej tlen titlajtoskej itech tlen uajlauj ipan Biblia ijkuak tikimijkuiloskej cartas, tontlajtoskej ipan teléfono noso tontlajkuiloskej ipan Internet (Mat. 10:16, TNM).