Kuajli matiktekitiltikan tlen kuajkui amoxtli Temachtia Biblia

Ijkuak tlaltikpakchanejkej akin imiuan tomachtiaj uelij itech tlen kijtoua Biblia niman kichiuaj ipan innemilis, peua nesi ika noskaltijtiuj intlaneltokil (Sal. 1:1-3). Tla kuajli tiktekitiltiaj tlen kuajkui amoxtli Temachtia Biblia, uelis tikinpaleuiskej maueyiya intlaneltokil.

Tlajtoltilistin tlen ika peua. Nochi capítulos peuaj ika seki tlajtoltilistin tlen nonankiliaj ipan yejon tlamachtijli. Uelis tikintlajtoltiskej, san ika, xtikchiuaskej ika akin tikinmachtijtokej matechnankilikan, tikintlajtoltiskej pampa tiknekij tikinyoleuaskej melak makinekikan kimatiskej itech yejon tlamachtijli. Okse tlen uelis tikchiuaskej, tikintlajtlaniliskej san achijtsin makijtokan itech yejon tlajtoltilistin. Kanaj xkuajli kenon tlanankiliskej, san ika, xnoneki nimantsin tikinmelajkatlaliskej, pampa tlen kijtoskej techpaleuis matikitakan tlenon nonekis kuajli tikintomiliskej ijkuak imiuan tomachtiskej (Prov. 16:23; 18:13).

Apéndice. Tla akin tikmachtijtokej yokasikamat yejon capítulo, uelis tikijliskej makipoua san iselti apéndice itech yejon tlamachtijli. Ijkuak oksejpa tomachtiskej, uelis tikchiuiliskej seki tlajtoltilistin niman ijkon tikmatiskej tla itlaj xokasikamat. San ika, tla kuajli tikitaj, matikxelokan seki minutos ijkuak tomachtijtoskej niman iuan matikitakan nochi apéndice noso san achijtsin. Uelis tikinpouaskej párrafos niman tikchiuiliskej seki tlajtoltilistin tlen yotiknemilijkaj tiktlajtoltiskej ijkuak otoyektlalijkej.

Tlen Biblia temachtia. Ipan itlamiyan nochi capítulos kuajkui kampa kijtoua Tlen Biblia temachtia, ompa kipiya tlanankilistin itech tlajtoltilistin tlen uajlauej kampa ika peua capítulo. Tla tikimitaj iuan akin tomachtijtokej, tikmatiskej tla yokasikamat tlen noneki niman tla uelis kitetomilis. Ijkuak san sekan yotikinpoujkej tlanankilistin iuan textos tlen ompa uajlauej, matiktlajtlanilikan akin tikmachtijtokej ika makintekitilti tlaxeloltin pitentsitsintin niman ijkon makijto tleka tlen ompa kijtoua yemelak (Hech. 17:2, 3).