Matitemachtikan tlen melauak

Ipan septiembre, amatsintli Tlen Tomachtiskej peuas kuajkuis se yenkuik kenon titlajtolmoyauaskej tlen itoka “Matitemachtikan tlen melauak”. Ika se tlajtoltilistli niman ika se texto tikteititiskej tlen melauak itech Biblia.

Tla tikitaj ika yakaj kineki kimatis okseki, matikchiuakan ika maonia tlen iuan titlajtoskej ijkuak oksejpa tokuepaskej, tla tijkauiliaj se amatlajkuilojli noso tla tikititiaj se video itech jw.org. Matochikauakan tokuepaskej, ijkon oksejpa iuan tonojnotsaskej. Yenkuik ken tikintetekiuiltis amatlajkuiloltin noijki notekitiltis ipan Xmomachti melak kuajli xtenojnotsa. Ken yenkuik peuas titenojnotsas niman tlen kipanoltiskej nomachtijkej nokixtis itech amoxtli ¿Tlenon melauak temachtia Biblia? Kampa kijtoua “Tlen Biblia temachtia” tlen uajlauj sa itlamiyan capítulo. Melak techpaleuis ijkuak oksejpa tontetlajpaloskej noso titemachtiskej san ika Biblia.

Onka san se ojtli tlen teuika itech nemilistli (Mt 7:13, 14, TNM). Pampa akin tikinnojnotsaj miyek tlemach tlen kineltokaj niman ualeuaj miyekan, matikchiuakan makinekikan kikakiskej tlen melauak itech Biblia (1Ti 2:4). Tla itikixmatstiuej miyek tlemach itech tlenon tlajtoua Biblia niman kuajli tiktekitiltiaj “tlen melauak” itech iTlajtol toTajtsin, melak tiyolpakiskej niman melak kuajli techkakiskej (2Ti 2:15).