MATINEMIKAN KEN CRISTO

Tlen yenkuik kipiyas tlanechikojli tlen tikpiyaj ipan semana

Itech enero xiuitl 2018 ika tlayekapan, tlanechikojli tlen tikpiyaj ipan semana kipiyas notas de estudio, tlaixkopinaltin niman videos itech Traducción del Nuevo Mundo de las Santas Escrituras (nwtsty) tlen ika tomachtiaj. Yejuin san onka ipan Internet, maski kanaj xionka ika motlajtol, tikmatij ika yejuin melak mitspaleuis ijkuak timomachtis tlen noitas ipan tlanechikojli. Tlen melak kuajli mitspaleuis xmonisiui itech Jehová, toTajtsin akin tetlasojtla.

NOTAS DE ESTUDIO

Notas de estudio kitomas itech kenon nochiuaya yeuejkaui, kenon tlaltin, kanon ualeuaj tlajtoltin tlen uajnestiuej ipan tlaxeloltin pitentsitsintin itech Biblia niman tlenon kijtosnekij.

Mateo 12:20

Mecha yejuan sa popokatikaj: Lámparas tlen notekitiltiayaj ipan kaltin, tlachijchiujtin katkaj ika sokitl niman kintemiltiayaj ika aceite de oliva. Ikpatl kichichinaya aceite, ijkon tlitl xseuiya. Tlajtojli ika griego tlen notlajtolkuepa “mecha yejuan sa popokatikaj” uelis kijtosnekis ijkuak se ikpatl ok pojkistika maski tlitl yoseuj noso iseujtika. Teotlajtojli itech Isaías 42:3 kijtoua ika Jesús teikneliskia. Akin yolyemankej niman tlajyouijtoyaj, xkeman kinseuiliskia intlamachialis, tlen katka kentla se tlitl tlen iseujtika.

Mateo 26:13

Ika tlen melauak: Tlajtojli ika griego Amén onokixti itech tlajtojli ika hebreo amén tlen kijtosneki “ijkon manochiua” noso “melauak”. Jesús miyekpa kitekitiltiaya yejuin tlajtojli ijkuak kipeualtiaya kiteijlis itlaj, kijtouaya itlaj kichiuas noso kiteneuaya se teotlajtojli. Ijkon kiteititiaya ika tlen kijtouaya nochiuaskia niman ueliskia noneltokaskia. Noijtoua ika ken Jesús okitekitilti tlajtoltin “ika tlen melauak” noso “amén” xakaj ijkon okitekitilti yejuin tlajtoltin ken yejua ipan nochi amoxtin tlen kipiya Biblia. Ijkuak uajnestiuj okpa (amén amén), ijkon ken ipan Evangelio tlen okijkuilo Juan, yejuin tlajtojli tlen okijto Jesús notlajtolkuepa ken “ika tlen melauak” (Jn 1:51).

TLAIXKOPINALTIN NIMAN VIDEOS

Tlaixkopinaltin, videos tlen xkakistij niman okseki tlen teititiaj kenon onochiuj seki tlen Biblia kiteneua.

Betfagué, Tepetl itoka Olivos niman Jerusalén

Yejuin video tlen xuejkaui teititia ojtli tlen teuika Jerusalén, peua itech kalpan tlen aman noixmati ken et-Tur (nonemilia ika yejuin tlen Biblia kitokayotia Betfagué), hasta semej itech tlen melak uejkapan tlen onka ipan tepetl Olivos. Betania onka kampa ikisayan tonajli itech Betfagué, ipan ipilkayan tepetl Olivos kampa ikisayan tonajli. Ijkuak yayaj Jerusalén, Jesús niman inomachtijkauan nomatiyaj nokauaskej Betania. Aman ompa onka se kalpan itoka el-Ázariyeh (El Éizariya), yejuin tokayotl árabe kijtosneki “Kampa Lázaro nemiya”. Kuajli tikmatstokej ika Jesús nokauaya ichan Marta, María niman Lázaro (Mt 21:17; Mr 11:11; Lu 21:37; Jn 11:1). Ijkuak Jesús nemiya inchan niman yaya Jerusalén, kanaj nejnemiya ipan se ojtli ken yejuin tlen nesi ipan video. Ipan tonajli 9 metstli nisán xiuitl 33, Jesús okipanaui tepetl itoka Olivos niman okalak Jerusalén, yejua oyaj ipan se pitentsin poloko. Kanaj ouajkis itech Betfagué, niman oyaj ipan ojtli tlen teuika Jerusalén.

Ojtli tlen onka Betania niman teuika Betfagué
Betfagué
Tepetl itoka Olivos
Valle itoka Cedrón
Kampa onkatka teopan

Ikxitl tlen ipan kalaktok se clavo

Yejuin itlaixkopinal se ikxitl tlen okichijchiujkej, ipan kalaktok se clavo tlen tlachijchiujtli ika hierro niman ika ueyak 11.5 centímetros (4.5 pulgadas). Tlen yemelak clavo ononexti ipan xiuitl 1968 kampa tlaxkuatoyaj itech norte de Jerusalén, yejuin tlen onokuik youejkauj ipan Roma. Tlen ononexti teititia ika kanaj notekitiltiayaj clavos ijkuak yakaj kimiktiayaj tlen ika kipilouayaj ipan kojtli melaktik. Kanaj ijkon katkaj clavos tlen okitekitiltijkej soldados ijkuak okimiktijkej Jesús niman okipilojkej ipan kojtli melaktik. Yejuin ononexti ijtik se caja tlachijchiujtli ika tetl tlen noixmati ken osario, kampa okintlalijkaj iomiyouan se tlaltikpakchane sakin ijkuak inakayo yoijtlakauj. Tlen ononexti teititia ika akin kimiktiayaj ipan kojtli melaktik ueliskia notokaskia (Mt 27:35).