Galletitas para notskuinuan
NICK, se tlakatsintli akin chanti Oregón (Estados Unidos), okijkuilo: “Ipeujyan 2014 opeuj nikinpajxaloltia notskuinuan centro. Ompa nikimitaya iteixpantijkauan Jehová akin tenojnotsayaj ika se carrito. Yejuamej nochipa kuajli notlakentiayaj niman kintlajpalouayaj nochimej akin ompa panouayaj.
”Iteixpantijkauan Jehová nochimej kintlasojtlaj, hasta notskuinuan. Se tonajli se siuatsintli akin itoka Elaine, tenojnotstoya ika carrito. Yejua okinmakak notskuinuan seki galletitas. Sakin, ijkuak ompa nipanouaya, notskuinuan notijtilanteuayaj niman yayaj kampa kinmakayaj galletitas.
”Opanok seki metstin niman ok ompa nipanouaya. Notskuinuan kuelitayaj pampa kinmakayaj galletitas niman nejua nikuelitaya nitlajtlajtos imiuan iteixpantijkauan Jehová. Inikpiaya ipantsin 70 xiuitl niman xniknekiya manechmachtikan pampa xkuajli nikmatiya tlen temachtiayaj. Niknekiya san noselti ninomachtis Biblia pampa yonikitaka ika okseki religiones xtemachtiayaj tlen melauak.
”Sakin, onikimitak oksekimej iteixpantijkauan Jehová akin oksekan tenojnotsayaj ika carritos, yejuamej noijki kuajli tenotsayaj niman nochi tlen nikintlajtoltiaya nechnankiliayaj ika Biblia. Ijkuakon opeuj más nikneltoka tlen temachtiaj iteixpantijkauan Jehová.
”Se tonajli Elaine onechtlajtolti: ‘¿Tiknemilia ika yolkatsitsintin noijki se itetlayokolil toTajtsin?’. Oniknankili: ‘Kema’. Kuakon, onechpouili Isaías 11:6-9. Desde ijkuakon nochi onopatlak, san ika, xnikinseliliaya nion se amatlajkuilojli.
”Sakin, opeuj kuajli iuan nitlajtlatoua Elaine niman iueuentsin, Brent. Yejuamej onechijlikej manikpoua desde Mateo hasta Hechos niman ijkon nikasikamatis tlenon kijtosneki tikchiuas ken Cristo. Niman ijkon onikchiuj. Sakin, Brent niman Elaine opeuj nechmachtiaj Biblia. Nochi yejuin opanok itlajkotian 2016.
”San nikchiatoya tonajli ijkuak nechuajmachtiskiaj niman ijkuak niaskia tlanechikojli. Melak niyolpakiya niman niktlasojkamatiya pampa nechmachtijtoyaj Biblia. Opanok ipantsin se xiuitl niman oninoapolakti. Aman nikpiya 79 xiuitl niman inikmati tlenon melauak temachtia Biblia. Jehová melak yonechteochiuj pampa ninemi ipan ikalpan”.