¿Tikilnamiki?
¿Kuajli yotikinpouj revistas tlen san kemach yokiskej itech Amatl Tekakistilijketl? Xkita tla uelis tikinnankilis yejuin tlajtoltilistin:
¿Kenon techpaleuis tla tikxelouaj tiempo para titlajtoskej iuan Jehová, para tijkakiskej niman para itech titlanemiliskej?
Kuajli tiktlapejpeniskej tlen tikchiuaskej, más kuajli titemachtiskej, totlaneltokil más chikauis niman más tiktlasojtlaskej Jehová (w22.01, páginas 30 niman 31).
¿Tleka melak kuajli tla titlaneltokaj itech Jehová niman intech akin kiyekanaj ikalpan?
Aman melak noneki tikneltokaskej ika Jehová nochipa kichiua tlen kuajli. Niman uelis ijkon tikchiuaskej tla tikneltokaj ika kuajli tlen kitlapejpeniaj tlayekankej niman tlen technauatiaj. Ijkuak peuas ueyi tlajyouilistli, tiknektoskej titetlakamatiskej maski ouijtika tikitaskej noso xtikasikamatiskej tlen technauatiaj (w22.02, páginas 4-6).
¿Tleka se iluikaktekitketl okijli Zacarías ika kitaskia kenon Zorobabel kitekitiltiskia plomada? (Zac. 4:8-10, TNM).
Yejuin tlatlachalistli okinmasikamachilti judíos ika maski ikal toTajtsin xok kichijchiuaskiaj ijkon ken tlen Salomón okichijchiujka, nochijchiuaskia ijkon ken toTajtsin kuelita (w22.03, páginas 16 niman 17).
¿Kenon uelis kuajli titlajtoskej? (1 Tim. 4:12).
Matitetlakaitakan niman kuajli matitenotsakan ijkuak titenojnotsaskej, matokuikatikan ika nochi toyojlo ipan tlanechikoltin niman nochipa matitlanankilikan. Nochipa matikijtokan tlen melauak, matikinyolchikauakan oksekimej niman maka matikijtokan tlen uelis teyolkokos (w22.04, páginas 6-9).
¿Tleka on nauimej yolkamej (gobiernos) tlen nesij ipan Daniel capítulo 7 san noijki tlachiaj ken on “xkuajli yolki” tlen noteneua ipan Apocalipsis 13:1, 2?
On “xkuajli yolki” tlen noteneua ipan Apocalipsis 13 xkineskayotia san se gobierno, ken Roma. Kuakon, ¿akinon kineskayotia? Nochimej gobiernos akin youajtlayekantiajkej ipan yejuin tlaltikpaktli (w22.05, página 9).
¿Kenon tikteititiaj ika tijkauiliaj Jehová makiyektlali tlen xkuajli otexchiuilijkej?
Tla yakaj otexchiuili tlen xkuajli noso otechyolkoko, tokojtiliaj xtikualantoskej nion xtitetlauelitstoskej, niman tijkauiliaj Jehová makiyektlali tlen xkuajli otexchiuilijkej. Jehová kipopolos tlajtlakojli tlen melak techtlajyouiltia (w22.06, páginas 10 niman 11).
¿Tlenon noneki kilnamiktos se tokniuj tlakatl akin kijliaj makichiua teoyotl ipan se tlanechikojli?
Ika ipan iteoyouan xnoneki temelajkatlalis nion xnoneki itlaj kitemachiltis. Xnoneki melak uejkauis, niman más ijkuak peuas tlanechikojli (Mat. 6:7) (w22.07, páginas 24 niman 25).
¿Tlenon kijtosneki ika akin “okichijkej tlen xkuajli, yoliskej niman nokuiteuaskej para kintlajtlakolmakaskej”? (Juan 5:29).
Xkijtosneki ika nokuiteuaskej san para kintlajtlakolmakaskej ipampa tlen okichiujkej. Ijkuak Jesús okitekitilti yejuin tlajtojli, kijtosnekiya ika ijkuak yoliuiskej akin xkuajkualtin yejua kitas tla yemelak yonoyolkuepkej (w22.09, página 18).
¿Tlenon okijto tokniuj Joseph Rutherford ipan se ueyi tlanechikojli tlen onochiuj ipan septiembre de 1922?
Ipan se ueyi tlanechikojli tlen onochiuj Cedar Point (Ohio, Estados Unidos), okijto: “¡Xkitakan, toTekiuaj itekiuajtitika! Nemejuamej nenitekipanojkauan. Ika yejon, xteijlikan, xteijlikan, xteijlikan ika Jesús Tekiuaj ipan iTekiuajyo toTajtsin” (w22.10, páginas 3-5).
Ken kijtoua Isaías capítulo 30, ¿kenon techpaleuiya toTajtsin matitlaxikokan?
Yejuin capítulo kiteititia ika 1) kuajli techkaki niman kinnankilia toteoyouan, 2) techyekana niman 3) techteochiua aman niman techteochiuas ika tlayekapan (w22.11, página 9).
¿Tleka uelis tikijtoskej ika tlen kijtoua Salmo 37:10, 11, 29 yonochiuj niman noijki nochiuas ika tlayekapan?
David okijkuilo kenon kuajli onenkej israelitas ijkuak otekiuajtik Salomón. Jesús okiteneuj tlaxelojli 11 niman ijkon kiteititis kenon tinemiskej ipan Xochitlalpan (Mat. 5:5; Luc. 23:43) (w22.12, páginas 8-10 niman 14).