¿Itikmatiya?
¿Tleka sekimej isoldados David xisraelitas katkaj?
SEKIMEJ isoldados David xisraelitas katkaj, ken Zélec akin ammonita katka, Urías akin hitita katka niman Itmá akin moabita katka (1 Crón. 11:39, 41, 46).a Noijki nemiyaj akin keretitas katkaj, peletitas niman guititas (2 Sam. 15:18). Nesi ika keretitas niman peletitas ken kimitayaj filisteos (Ezeq. 25:16). Niman guititas ualeuayaj Gat, kampa chantiyaj filisteos (Jos. 13:2, 3; 1 Sam. 6:17, 18).
¿Tleka David okinkauili sekimej tlakamej manochiuakan isoldados maski xisraelitas katkaj? Pampa kuajli kimatstoya ika melajkanemiskiaj itech Jehová niman noijki itech melajkanemiskiaj. Se libro tlen itoka The New Interpreter’s Dictionary of the Bible otlajto itech keretitas niman peletitas, ompa onoijto: “Yejuamej omelajkanenkej itech David ijkuak tekiuajtitoya niman kixnamiktoya tlen melak xkuajli”. ¿Kenon tikmatij? Ijkuak nochimej israelitas “okitlalkauijkej David para okitokakej Seba”, keretitas niman peletitas onokaujkej iuan David niman okipaleuijkej para kajsiskej Seba (2 Sam. 20:1, 2, 7). Noijki, sejpa, ikoneuj David, akin itoka katka Adonías, kinekiya yejua tekiuajtis. San ika, keretitas niman peletitas okipaleuijkej Salomón para yejua matekiuajti pampa kimatstoyaj ika Jehová yejua akin yokitlapejpenijka (1 Rey. 1:24-27, 38, 39).
Ittái, akin guitita katka, noijki omelajkanen itech David. Sejpa, Absalón, ikoneuj David, opeuj melak kualtsin kinnotsa tlakamej israelitas para makinekikan yejua matekiuajti niman ijkon kikuilis itekiuajyo itaj. Kuakon, ijkuak David okixnamikito Absalón, Ittái niman 600 isoldados iuan oyajkej maski David okijli Ittái ika xnonekiya teixnamikis ipampa pampa yejua xchanej katka. San ika, Ittái okinankili: “Ninotlajtolmaka ika itokatsin toTEKO niman moka tejua noueyi rey, ika kampa norey nemis, tla ninemis noso tla nimikis, nejua nimotekitkau mouan nias” (2 Sam. 15:6, 18-21).
Ittái omelajkanen itech David pampa kimatstoya ika Jehová yejua yokitlapejpenijka ken tekiuaj.
Maski keretitas, peletitas niman guititas xisraelitas katkaj, kuajli kimatstoyaj ika Jehová yejua toTajtsin akin melauak niman kitlakaitayaj David pampa kimatstoyaj ika Jehová yokitlapejpenijka para yejua matekiuajti. David melak okitlasojkamat ika yejuin tlakamej nochipa okipaleuijkej.
a Ipan Deuteronomio 23:3-6, tiknextiaj itlanauatil toTajtsin kampa kijtouaya ika ammonitas niman moabitas xueliskiaj nopouaskej ken israelitas. Nesi ika yejuin kijtosnekiya ika xueliskiaj kichiuaskej tlen israelitas kichiuayaj niman xueliskiaj kiseliskiaj tlen israelitas kiseliayaj. San ika, kema kinkauiliayaj makalakikan ipan ikalpan toTajtsin niman ompa machantikan. Xtejtemo tlajtojli “Ammonitas” ipan Perspicacia para comprender las Escrituras niman xkita kampa kijtoua “Se casan con israelitas”.