Xyejyeko xueli itlaj tlen yenkuik ijkuak timomachtis

Ijkuak tomachtiaj, kanaj totlajtoltiaj: “¿Tlenon nikneki niuelis?”. Kanaj ijkuak tomachtiaj, itikmatij itech tlenon tiknekij tiueliskej, san ika, matikilnamikikan ika Jehová uelis techmachtis okseki tlemach. ¿Kenon uelis tijkauiliskej Jehová matechmachti?

Xtlajtlanili Jehová tlamachilistli. Xnekto okseki tiuelis (Prov. 3:​5, 6). Xtlajtlanili Jehová mamitspaleui xkita tlen yejua kineki mitsmachtis aman (Sant. 1:5).

Xkauili iTlajtol toTajtsin mamitsyekana ipan monemilis. “Itlajtol Dios yoltikaj” (Heb. 4:12). Kuakon, nochipa ijkuak tikamapouaj Biblia, tiuelij itlaj tlen yenkuik niman melak techpaleuiya ipan tonemilis. San ika, san uelis ijkon panos tla tikmatstokej ika noneki tiueliskej tlen Jehová kineki techmachtis.

Xtlasojkamati nochi tlen Jehová kitekitiltia para mitsmachtis. Nochi tlen techmachtia Jehová yeskia ken se “uelik tlakuajli” (Is. 25:6). Tla kemantika tikita itlaj tlen tiknemilia ika xtikuelilis, noso, xtikuelitas, maka san ijkon xkaua, tejua uelis timomachtis yejon. Tla ijkon tikchiua, tijkauilis toTajtsin mamitspaleui xmopatla niman noijki melak tikuelitas ijkuak timomachtis.