¿Akinon okipeualti makimixmatikan ken iteixpantijkauan Jehová?

Ipan 1870, iteixpantijkauan Jehová opeuj intekiyo tlen noixmati ipan yejuin tonajli. Ipan yejon xiujtin, achijtsitsintin akin opeuj nomachtiaj Biblia ipan Pittsburgh (Pensilvania, Estados Unidos) okinemilijkej kuajli nomachtiskej nochi Biblia. Ijkuak nomachtiayaj, kitayaj tla tlen temachtiayaj oksekimej tlaneltokiltin yemelak ijkon kijtouaya ipan Biblia. Sakin, opeujkej kiteijliaj tlen yokasikamatkaj. Okinchijchiujkej amoxtin, okijkuilojkej sekimej tlamachtiltin ipan periódicos niman okichijchiujkej revista tlen aman tikixmatij ken La Atalaya. Anunciando el Reino de Jehová.

Se itech yejon nomachtijketl itoka katka Charles Taze Russell. Maski yejua opeuj kichijchiua revista La Atalaya niman okiyekan makinmachtikan oksekimej itech Biblia ipan yejon tonajli, xokipeualti se yenkuik tlaneltokijli. Ijkon ken oksekimej nomachtijkej itech Biblia (ken onotokayotijkej), Russell kinekiya manoixmati tlen otemachti Jesucristo niman manochiua ijkon ken inomachtijkauan Jesucristo kichiuayaj. Pampa tejuamej ticristianos, tikasikamatij ika Jesús otechpeualti (Colosenses 1:18-20).