Xkilnamiki tleka tikneki tijkajkauas cigarro
“Yonoitak ika akin nokojtiliaj kichiuaskej ijkon ken yokijtokej, ueli kikajkauaj ika pokij” (Stop Smoking Now! [¡Maka sa xpoki!]).
KIJTOSNEKI ika tla tikneki tijkajkauas ika tipoki noneki onias itlaj tlen mamitsyolmapeua. Kachtopa, xnemili kenon mitspaleuis tla tijkajkaua ika tipoki.
Xok tikpopolos miyek tomin. Tla mojmostla tipoki se cajita de cigarros, ipan se xiuitl tikpopolos melak miyek tomin. Gyanu, akin ualeua Nepal, kijtoua: “Xnikitaya ika melak miyek tomin nikpopolouaya para cigarros”.
Más ika moyojlo tinemis. Regina, akin ualeua Sudáfrica, kijtoua: “Más ika noyojlo opeuj ninemi ijkuak onijkajkauj ika nipoki niman más kuajli ninomachilia”. Ijkuak yakaj kikajkaua ika poki, más tlauelilia, más ueli tlajnekui, más kojtik niman hasta más kuajli nesi.
Mitspaleuis maka xkualo. Centros para el Control y la Prevención de Enfermedades de Estados Unidos, kijtoua: “Ijkuak yakaj kikajkaua ika poki, nimantsin kipaleuiya para maka makualo”.
Más motech titlaneltokas. Henning, akin ualeua Dinamarca, kijtoua: “Onijkajkauj ika nipoki pampa xok niknekiya ninemis kentla se esclavo itech tabaco”.
Mochanejkauan niman moamigos kinpaleuis. Sociedad Americana contra el Cáncer, kijtoua: “Akin pokij [...] noijki kimijtlakoua akin imiuan nemij. [...] Ixtlamatkej yokitakej ika akin kijyotilanaj on poktli tlen kikixtia akin poki más teijtlako, pampa kichiua ika oksekimej makualokan ika cáncer de pulmón niman okseki kokolistin tlen kijtlakouaj toyojlo”.
Kiyolpaktis toTajtsin. “Notlajsojkaikniuan, [...] matikixtikan ipan totlalnakayo [...] nochi on tlen techijtlakoua” (2 Corintios 7:1). “Xmotemaktilikan itech Dios ken itlaj uentli [...] yektli ijkon ken yejua kineki” (Romanos 12:1).
Sylvia, akin ualeua España, kijtoua: “Ijkuak onikasikamat ika toTajtsin xkuelita matiktekitiltikan tlen kijtlakoua totlalnakayo, onijkajkauj ika nipoki”.
San ika, para tijkajkauas ika tipoki, kemantika xsan noneki itlaj mamitsyolmapeua, noijki noneki mamitspaleuikan mochanejkauan niman moamigos. ¿Tlenon uelis kichiuaskej yejuamej para mitspaleuiskej?