¿Tikuelitaskia ika mokoneuj makichiua ken tejua?
TLEN NONEKI KICHIUASKEJ TAJTIN
8 Xchiua Tlen Tikneki Makichiuakan
¿TLENON KIJTOSNEKI?
Tla tikneki ika mokoneuan makichiuakan tlen kuajli, noneki kachtopa tejua xchiua. Se tajtli xuelis kichias ika ikoneuj makijto tlen melauak tla ijkuak yakaj konnotsa kinauatia makijli ika xompa nemi, san pampa xkineki uajkisas.
“Miyekej kijtouaj: ‘Xchiua tlen nikijtoua niman maka tlen nikchiua’, san ika, yejon xuelis tikimijlis mokoneuan. Pampa yejuamej ken ichkatl tlen kichichinaj nochi tlen tikijtouaj niman tikchiuaj. Tla tikimijliaj makichiuakan itlaj, san ika, tejuamej tikchiuaj okse, yejuamej kitaskej niman techijliskej” (David).
TLEN BIBLIA KIJTOUA: “Tla nenkiteijliaj xkuajli para tlachtekilos, ¿tline tej, nemejuamej no nentlachtekij?” (Romanos 2:21).
¿TLEKA MELAK NONEKI?
Maski kokonej ok telpokamej, kichiuaj ijkon ken intajuan, xijkon ken akin imiuan nouikaj. Yejon kijtosneki ika tajtin uelis kinyekanaskej inkoneuan, ijkon kuajli onkisaskej. Kuakon, tajtin, noneki nenkichiuaskej tlen nenkimijliaj nemokoneuan.
“Uelis miyekpa itlaj tikimijliskej maski xtikmatij tla techkaktokej, san ika, ijkuak xtikchiuaj tlen yotikimijlikaj, yejuamej nimantsin techijliaj. Maski xtikitaj yejuamej kitstokej nochi tlen tikchiuaj” (Nicole).
TLEN BIBLIA KIJTOUA: “San ika, tlamachilistli tlen ualeua itech toTajtsin […] xkipiya ome ixayak” (Santiago 3:17, TNM).
¿TLENON UELIS TIKCHIUAS?
Xmotlajtolti: “¿Kenon nikinnotsa niman ninouika iuan nokoneuan niman noixnamik? ¿Ika tlenon ninoyolpaktia? ¿Akinomej imiuan ninouika? ¿Nikinpaleuiya oksekimej?”. Aman tej, ¿tikuelitaskia ika mokoneuan makichiuakan ijkon ken tejua ijkuak uejueyiyaskej?
“Nejua iuan noueuentsin xtikintlajtlaniliaj tokoneuan makichiuakan itlaj tlen nion tejuamej xtikchiuaj” (Christine).
Xkintlajtlanili mamitstlapopoluikan. Mokoneuan noijki kimatstokej ika timopopoloua, ika yejon, ijkuak tiktlajtlanilia moixnamik niman mokoneuan mamitstlapopoluikan, tikimititijtika kenon uelis yeskej yolyemankej niman kenon xtekajkayauaskej.
“Tla tejuamej tikimijliaj matechtlapopoluikan, tokoneuan noijki ueliskej ijkon kichiuaskej” (Robin).
“Tejuamej uelis tikinpaleuiskej niman tikinyekanaskej tokoneuan, ika yejon, tlen tejuamej tikchiuaj mojmostla melak ueyi kijtosneki pampa yejuamej san kitstokej. Yeskia ken se libro tlen nochipa tlapojtika tlen uelis miyek kinmachtis” (Wendell).