Tla nochipa tiktlaxtlaua tlen tikteuikilia, oksejpa mitstlaneujtiskej, noijki ijkon, tla nochipa tikchiua tlen tikijtoua, motajuan más motech tlaneltokaskej.
TLEN NONEKI KICHIUASKEJ TELPOKAMEJ NIMAN ICHPOKAMEJ
10 Xchiua Ika Motech Matlaneltokakan
¿TLENON KIJTOSNEKI?
Uelis tikneltokas yakaj tla nochipa tetlakamati, kichiua ijkon ken kijtoua niman nochipa kijtoua tlen melauak. Tla yakaj ijkon kichiua, itajuan, iamigos niman akin imiuan tekiti nochipa kineltokaskej.
¿TLEKA MELAK NONEKI?
Tla motech tlaneltokaj, más mitskauiliskej xchiua okseki tlen tiknekis.
“Tla tikneki ika motajuan mamitskauilikan xchiua tlen tiknekis, kuakon xchiua tlen tikmatstika ika kuajli, maski san moselti tinemis” (Sarahi).
TLEN BIBLIA KIJTOUA: “Kuajli xmixtlalokan para nenkitaskej tla nenmelajkanemij ipan nemotlaneltok” (2 Corintios 13:5).
¿TLENON UELIS TIKCHIUAS?
Tla tikneki ika motajuan motech matlaneltokakan, kuakon xchiua yejuin tlen amantsin tikteneuaskej.
Maka xtekajkayaua. Tla titekajkayaua, oksekimej xok mitsneltokaskej. San ika, tla nochipa tikijtoua tlen melauak maski timopopoloua, oksekimej nochipa mitsneltokaskej.
“Xouijtika tikijtos tlen melauak ijkuak tikmati ika mitspaleuis. San ika, tikijtos tlen melauak maski tipinauis, yejon kichiuas ika oksekimej motech matlaneltokakan” (Caiman).
TLEN BIBLIA KIJTOUA: “Tiknekij nochi tlajtlamach tikchiuaskej kuajli” (Hebreos 13:18).
Xchiua tlen noneki. Ne Estados Unidos, onochiuj se encuesta niman okintlajtoltijkej empresas tlenon kintlajtlaniliaj intech akin kintlakeuaskej, miyekej okijtokej ika más kintlakeuaj akin kuelitaj tekitiskej niman noijki kichiuaj tlen kijtouaj. Kuakon, tla desde amantsin tikchiua tlen mitsnauatiaj, yejon mitspaleuis ika tlayekapan.
“Notajuan kitaj tla nimantsin nikchiua tlen nechtlajtlaniliaj niman pampa nikchiua tlen nikijtoua, más notech tlaneltokaj” (Sarah).
TLEN BIBLIA KIJTOUA: “Niman nikmatstikaj ika tejua más miyek tikchiuas tlinon nejua nimitstlajtlanilia” (Filemón 21).
Maka xmosiaujkaua. Xouijtika yes tikitas ijkuak yakaj yonoskalti, san ika, xuelis tikitas tla onopatlak ken tlanemilia.
“Xuelis tikchiuas ika oksekimej nimantsin motech matlaneltokakan, yejon uelis uejkauis, san ika, maka xmosiaujkaua. Tla nochipa tikchiua tlen tikijtoua, más motech tlaneltokaskej” (Brandon).
TLEN BIBLIA KIJTOUA: “Xmouikakan ikan [...] ijyouilistli” (Colosenses 3:12).