Itech ken timouika iuan toTajtsin

Biblia kijtoua ika akin kitejtemouaj nouikaskej iuan toTajtsin, tlanemiliaj itech tlen yejua kineki niman kitlakamatij tlen tenauatia. San ika, akin san intech tlanemiliaj, kichiuaj tlen san no yejuamej kinemiliaj niman san kitejtemouaj tlen yejuamej kileuiyaj (Judas 18, 19; Efesios 5:1).

XNELTOKA IKA PANOS TLEN KUAJLI

TLEN BIBLIA TECHMACHTIA: “On pakilistli yejuan onkaj ipan iyojlo sen tlakatl, yejua nochiua ken sen kuajli pajtli yejuan tepajtia, pero tla ipan iyojlo yej onkaj ajmantli xitlaj kuajli nochiuas” (Proverbios 17:22).

TLEN KIJTOSNEKI. Ijkuak tejuamej toyolajmanaj, xok tikojtikej niman xueli tikimixnamikij totlaueluan. San ika, tla tiknemiliaj ika noyektlalis tlen panotika techpaleuis matitlaxikokan, pampa tikilnamikij ika totlaueluan san panoskej niman ika hasta itech tlen melak xkuajli panoua, uelis kisas itlaj tlen kuajli.

TLEN UELIS TIKCHIUAS. Xyejyeko xnemili ika kuajli onkisas tlen tikchiuas. Maka san xtlanemilijto itech tlen xkuajli ueliskia nochiuas noso tikchiuas tlen yotiknemili hasta ijkuak nochi yonoyektlali, noneki aman xmokojtili tikchiuas tlen yotiknemili. Yemelak ika “nochimej impan yejko ijkuak kiseliaj tlen kuajli noso xkuajli” (Eclesiastés 9:11). Miyekpa, kuajli onkisa tlen tiknemiliayaj ika xkuajli onkisaskia. Biblia kiteititia yejuin ijkuak kiteneua tlen panoua ijkuak tokalo, kijtoua: “Xtôka on xinachtli ijkuak kualkan, niman no xtôka ijkuak tiotla[k], pampa xkaman tikmati katlejua más kuajli yes, tla yejuan más saniman otiktôkak noso on yejuan sankin, noso tla yejon omej kuajli tlakis” (Eclesiastés 11:6).

XMOKOJTILI XTEJTEMO TLEN TIKNEKI TIKMATIS

TLEN BIBLIA TECHMACHTIA: “Xnechmaka kajsikamatilistli. [...] Nochi motlajtoltsin yejua tlen melauak” (Salmo 119:144, 160).

TLEN KIJTOSNEKI. Biblia technankilia nochi tlen kemantika totlajtoltiaj. Ijkon ken tlen nikan uajnestiuj:

• ¿Kanon tiualeuaj?

• ¿Tleka otexchijchiujkej?

• ¿Tlenon topan nochiua ijkuak timikij?

• ¿Nochi ompa tlami ijkuak timikij?

Melak miyekej yokitakej kenon Biblia kinankilia nochi yejuin niman okseki tlen kemantika totlajtoltiaj, niman kitaj ika yokinpaleui más mayolpakikan.

TLEN UELIS TIKCHIUAS. Timitstlajtlaniliaj xkita tlen Biblia temachtia. Xtlajtlanili se iteixpantijkauj Jehová mamitspaleui tikasikamatis. Noijki uelis tikalakis ipan jw.org noso uelis tias ipan se totlanechikol. Ompa xnotlajtlani tomin.

OKSEKI TLEN BIBLIA TECHMACHTIA

NONEKI TIKIXMATIS TOTAJTSIN NIMAN TIJKAUILIS MAMITSYEKANA

“Xsan ikan tlaxkajli uelis nemis sen tlakatl, yej no ikan nochi tlajtojli yejuan Dios kijtoua” (MATEO 4:4).

KUAJLI XKIXMATI TOTAJTSIN AKIN BIBLIA KITENEUA

“Para ma kitejtemokan Dios niman kas kinextiskej, [...] melauak yejua xuejka nemi cada se de tejuamej” (HECHOS 17:27).

TIKPOUAS BIBLIA NIMAN ITECH TITLANEMILIS

“Sanoyej pakis on yejuan [...] kuelita itlanauatil toTEKO [Jehováa] niman ipan tlanemilia ikan tonajli niman ikan yeuajli. [...] Nochi tlen kichiua on tlakatl kuajli kisa” (SALMO 1:1-3).