1. ¿ToTajtsin techtlajyouiltia?

¿Tleka melak noneki matikmatikan?

Miyekej xkinekij kixmatiskej toTajtsin pampa kinemiliaj ika yejua techtlajyouiltia.

Xkonnemili yejuin

Miyekej teopixkej temachtiaj ika toTajtsin techtlajyouiltia. Matikitakan tlenon kijtouaj sekimej:

• Ika ijkuak tlaixpoliui, toTajtsin techtlajyouiltia.

• Ika kokonej mikij pampa toTajtsin kinneki oksekimej angelitos.

• Ika toTajtsin kinpaleuiya akin yauej ipan guerra.

San ika ¿tla teopixkej yotemachtijkej tlen xmelauak itech toTajtsin? ¿Niman tla toTajtsin xkuelita tlen yejuamej temachtiaj?

Tlen Biblia kijtoua

ToTajtsin xtechtlajyouiltia

Tla techtlajyouiltiskia, xnotlajtolnamikiskia ika tlen yejua kijtoua. Xkita tlen Biblia kijtoua itech toTajtsin:

“Melajki nochi on tlen kichiua. [...] Yejua kichiua on tlen melajki niman kuajli” (DEUTERONOMIO 32:4).

“¡Maka nenkinemiliskej ika Dios, yejuan nochi ueli kichiua, xkuajli tlen kichiua, noso xkipiya yolmelajkanemilistli!” (JOB 34:10).

“ToTEKO [...] nochipa kichiua tlen melajki” (JOB 34:12).

ToTajtsin xkinselia religiones akin kijtouiliaj tlen xmelauak

Ken akin temachtiaj ika yejua techtlajyouiltia niman akin tlapaleuiyaj ipan guerras niman kampa nochiua tlen xkuajli.

“Ijkuak ijkon kijtouaj on tiotlajtojkej ikan notokatsin [itoka toTajtsin], yejuamej san tlakajkayauaj. Nejua xonikintitlan, niman nejua xitlaj onikinnauatij, niman nion xonikinnots. Yejuamej okipixkej tlatlachalistli ken intemikpan yejuan xmelauak. On tlatlachalistin san ika tlakajkayauaj [...]. On tlatlachalistin san yejuamej okinejnemilijkej. Ijkon nokajkayauaj ika intlamachilis on tiotlajtojkej” (JEREMÍAS 14:14).

Jesús okijto ika religiones xkichiuayaj ken temachtiayaj

“Xnochimej on yejuan nechijliaj: ‘NoTEKO, noTEKO’, kalakiskej ne kampa noTajtsin iluikak chanej tlamandaroua, yej san yejuamej on yejuan kichiuaj on tlen kineki noTajtsin iluikak chanej. Ijkuak yejkos on tonajli para Dios kitlaxtlauilis nochi tlakatl, miyekej nechijliskej: ‘NoTEKO, noTEKO, tejuamej otitemachtijkej ikan motokatsin, niman ikan motlanauatil otiktekixtilijkej on xkuajkualtin espíritus, niman ikan motokatsin otikchijkej miyek milagros’. Pero ijkuakon nikimijlis: ‘Xkaman onemechixmat. Xnechtlalkauikan nemejuamej yejuan nenkichiuaj on tlen xkuajli’” (MATEO 7:21-23).