Kenon tecnología kijtlakoua ken titlanemiliaj

Tinochimej tiuelij itlaj tlen xtikmatiyaj ijkuak tinemij ipan escuela, kampa titekitij noso oksekan. Niman tecnología melak techpaleuiya. Aman, maski xtikisas mochan, ipan Internet nimantsin uelis tiknextis tlen tikneki tikmatis.

San ika, akin melak kikui tecnología uelis ipan nochiuas yejuin:

Xueli nomachtia pampa peua kichiua okse itlaj.
Xueli kichiua san se itlaj.
Tlatsiui ijkuak san iselti nemi.

TLEN NONEKI TIKMATIS

Se ichpokatl miyek kichiua: kichijchiua se mensaje ipan iteléfono, tlajtoua ika videollamada niman nomachtia ipan icomputadora niman ika se libro.

TLEN TIKPOUA

Sekimej xkasikamatij itlaj pampa san totoka kipouaj.

Tla totoka tikpoua itlaj, uelis mitspaleuis nimantsin xnexti tlen tikneki tikmatis. San ika, xmitspaleuis ijkuak tiknekis kuajli tikasikamatis itlaj.

XNEMILI YEJUIN: ¿Ouijtika tikita miyek tikpouas? ¿Tleka tla miyek tikpoua mitspaleuis más xkasikamati itlaj? (PROVERBIOS 18:15).

KUAJLI TIKCHIUAS ITLAJ

Sekimej kinemiliaj ika tecnología kinpaleuiya makichiuakan ome tlemach: kentla ijkuak nomachtiaj niman ijkuak kimintlajkuilouiliaj iminamigos. San ika, tla xkuajli kitaj tlen kichiujtokej, nion se itlaj xuelis kuajli kichiuaskej.

Tla tikneki kuajli tikchiuas itlaj, noneki timokojtilis san yejon tikchiuas. Se ichpochtli itoka Grace kijtoua: “Xmiyekpa timopopolos niman xmás tikualanis. Yonikitak ika más kuajli tla san se itlaj nikchiua”.

XNEMILI YEJUIN: ¿Ouijtika tikita tikasikamatis niman tikilnamikis tlen otimomachti? (PROVERBIOS 17:24).

IJKUAK SAN MOSELTI TINEMIS

Sekimej xkuelitaj san inselti nemiskej niman xtlaj kichiujtoskej. Ika yejon, kikuij tecnología para kuajli nomachiliskej. Se siuatl akin itoka Olivia kijtoua: “Xueli ninemi nion 15 minutos tla xnikitstika noteléfono, notablet noso notele, pampa nitlatsiui”.

Maski tla titelpokamej noso itiuejueyimej, tinochimej noneki san toselti tinemiskej niman ijkon titlanemiliskej itech tlen tomachtiaj. Melak noneki ijkon tikchiuas tla tikneki itlaj kuajli tikasikamatis.

XNEMILI YEJUIN: Ijkuak san moselti tinemi, ¿tikuelita titlanemilis itech tlen otimomachti? (1 TIMOTEO 4:15).

TLEN UELIS TIKCHIUAS

XKITA KENON TIJKUI TECNOLOGÍA

¿Kenon tecnología uelis mitspaleuis más kuajli xkasikamati tlen timomachtia? ¿Niman kenon uelis mitsijtlakos ijkuak timomachtia?

TLEN BIBLIA KIJTOUA: “Nochipa xkejeua motlamachilis niman mokajsikamatilis” (PROVERBIOS 3:21).