Historia 28

Moisés omakis ijkuak konetsintli katka

XKITA konetsintli akin chokatika niman kajsitika imajpil yejon ichpochtli. Yejua Moisés. ¿Tikmatstika akinon yejon kualtsin ichpochtli? Yejua ichpoch Faraón.

Inan Moisés okiyan hasta ijkuak kipiaya yeyi metstli, pampa xkinekiya makimiktikan egipcios. San ika, yejua kimatiya ika uelis kinextiskiaj Moisés, kuakon, yejua okichiuj yejuin niman ijkon okimakixti.

Okichijchiuj se chikijtli niman okitak maka makakalaki atl. Kuakon ompa okitlali Moisés niman okikauato chikijtli inakastlan atentli Nilo kampa melak uejkapan xiujtli. Okijli Míriam, ikniuj Moisés, manokaua nisiu niman ijkon makita tlenon panoua.

Kuakon ichpoch Faraón ouajla ipan atentli Nilo onaltiko. Nimantsin okitak chikijtli kampa onkatka xiujtli uejkapan. Okijli se itlakeual: ‘Xnechkuiliti yejon chikijtli’. Ijkuak yejon ichpochtli okitlapo chikijtli, ¡okitak se kualtsin konetsintli! Konetsintli Moisés chokaya, niman ichpochtli okikneli. Ichpoch Faraón xokinek makimiktikan yejon konetsintli.

Kuakon Míriam ouajla. Uelis tikitas ipan tlaixkopinajli. Míriam okitlajtolti ichpoch Faraón: ‘¿Uelis nikonanas se israelita niman ijkon yejua makiskalti konetsintli?’

‘Kema’, okijto yejon ichpochtli.

Kuakon Míriam onotlalo okijlito inan. Ijkuak inan Moisés ouajla kampa nemiya yejuin ichpochtli, okijli: ‘Xkuika yejuin konetsintli, xnechiskaltili, niman nimitstlaxtlauilis’.

Kuakon inan Moisés, yejua okiskalti ikoneuj. Sakin, ijkuak Moisés oueyiyak, okuikili ichpoch Faraón, akin okiseli kentla ikoneuj. Ika yejon, Moisés onoskalti ichan Faraón.

Éxodo 2:1-10.