Historia 34

Yenkuik tlakuajli

¿TIKMATSTIKA tlenon kisentlalijtokej ipan tlajli yejon tlaltikpakchanejkej? Nesi kentla tesiujtli. Istak niman kanauak. San ika, xtesiujtli, yejuin ueli nokua.

Yopanok san kanaj se metstli ijkuak israelitas ouajkiskej Egipto. Nemij ipan tlaluaktli. Ompa achijtsin noskaltia tlen nokua, niman peuaj kijtouaj: ‘Melak kuajli yeskia tla Jehová techmiktiskia ne Egipto. Ompa tijkuayaj tlen tejuamej tiknekiyaj’.

Ika yejon, Jehová kijtoua: ‘Nikchiuas maxiniki tlakuajli itech iluikak’. Niman ijkon kichiua. Uajmostla, ijkuak israelitas kitaj tlen oxiniko, notlajtoltiaj: ‘¿Tlenonon yejuin?’

Moisés kimijlia: ‘Yejuin tlakuajli tlen Jehová yomechmakak xkuakan’. Yejuamej kitokayotiaj MANÁ. Yejuin maná machisti kentla pan tlachijchiujtli ika neujtli.

‘Xsentlalikan san tlen nenkikuaskej’, kimijlia Moisés. Ika yejon, nochipa kisentlaliaj ika kualkan. Kuakon, ijkuak peua tona, maná tlen nokaua ipan tlajli pati.

Moisés noijki kimijlia: ‘Maka yakaj kejyeuas maná’. Sekimej xtetlakamatij. ¿Tikmatstika tlenon panoua? ¡Uajmostla, maná tlen okejyeujkej peua kipiya okuilimej niman molonia!

San ika, Jehová kijtoua ika se tonajli ipan se semana, makisentlalikan maná tlen kikuaskej ipan ome tonajli. Yejuin katka ipan tonajli chikuasen. Niman Jehová kijtoua ika makejyeuakan tlen kikuaskej uajmostla, pampa ipan tonajli chikome xkichiuas mauajxini. ¡Ijkuak kejyeuaj maná tlen kikuaskej ipan tonajli chikome, xkipiya okuilimej nion xmolonia! ¡Yejuin okse milagro!

Kech uejkauij israelitas ipan tlaluaktli, kikuaj maná.

Éxodo 16:1-36; Números 11:7-9; Josué 5:10-12.