Historia 35
Jehová kitemaka itlanauatiluan
SAN seki metstli opanok ijkuak israelitas ouajkiskej itech Egipto, aman yejuamej ajsij ipan tepetl Sinaí, noijki noixmati kentla Horeb. Nikan kampa toTajtsin otlajto iuan Moisés itsajlan uitskojtli tlen tlikuitika. Israelitas ompa nokauaj, maski xouejkaujkej.
Ijkuak Moisés tlejkoua ipan tepetl, israelitas kichiaj tlatsintlan. Ipan tepetl Sinaí, Jehová kijlia Moisés ika Yejua kineki makitlakamatikan israelitas niman manochiuakan Ikalpan. Ijkuak Moisés uajtemoua, kimijlia israelitas tlen Jehová okijli. Niman yejuamej kijtouaj ika kitlakamatiskej Jehová, pampa kinekij nochiuaskej ikalpan.
Aman Jehová kichiua tlen xkeman panouaya. Kichiua mapopoka tepetl, niman chikauak matlakomoni. Noijki okinots ikalpan niman okimijli: ‘Nejua niJehová, moTajtsin akin omitsajkixti Egipto’. Kuakon okinmakak yejuin tlanauatijli: ‘Maka tikinueyichiuas oksekimej tajtsitsintin, san nejua’.
ToTajtsin kinmaka israelitas okseki chiknaui tlanauatiltin. Ikalpan melak onomojti. Kijliaj Moisés: ‘Tejua xtechnotsa, tomojtiaj matechnotsa toTajtsin pampa timikiskej’.
Sakin, Jehová okijli Moisés: ‘Xtlejko nikan ipan tepetl. Nejua nimitsmakas ome tetl patlauak kampa yonikijkuilo tlanauatiltin tlen nikneki nokalpan makitlakamati’. Kuakon Moisés oksejpa tlejkoua ipan tepetl. Nokaua ompa 40 tonajli niman 40 yeuajli.
ToTajtsin kipiya miyek, miyek tlanauatijli tlen kinmakas ikalpan. Moisés kimijkuiloua. ToTajtsin noijki kimaka ome tetl patlauak. Ipan yejuin temej toTajtsin yokijkuilo majtlaktli tlanauatijli tlen okimijli ikalpan. Itoka Majtlaktli Tlanauatiltin.
Majtlaktli Tlanauatiltin melak noneki manotlakamatikan. San ika, toTajtsin noijki okinmakak israelitas okseki tlanauatiltin. Yejuin se: ‘Xtlajsojtla moTeko Dios Jehová ika nochi moyojlo, ika nochi moalma niman ika nochi motlamachilis’. Niman yejuin okse: “Xkintlajsojtla oksekimej no ijki ken tejua timotlajsojtla”. ToTajtsin iKoneuj, Jesucristo, okijto ika yejuin ome tlanauatijli tlen toTajtsin okimakak ikalpan Israel, melak uejueyimej. Sakin, tiueliskej miyek tlemach itech iKoneuj toTajtsin niman tlen otemachti.
Éxodo 19:1-25; 20:1-21; 24:12-18; 31:18; Deuteronomio 6:4-6; Levítico 19:18; Mateo 22:36-40.