Historia 57

ToTajtsin kitlapejpenia David

¿UELI tikita tlenon panotika? Yejuin telpochtli okonmakixti borreguito itech oso. Yejon yolki okuikak borreguito pampa kinekiya kikuas. San ika, yejuin telpochtli okitokak niman okimakixti borreguito ijkuak oso kikuaskia. ¡Ijkuak oso onajkok itech telpochtli, yejua okimikti! Ipan okse tonajli yejuin telpochtli noijki okimakixti se borreguito itech se león. ¿Xtiknemilia ika melak yolchikauak yejuin telpochtli? ¿Tikmatstika akinon yejuin telpochtli?

Itoka David. Yejua chanti ipan kalpan Belén. Obed iabuelo katka, inkoneuj Rut niman Boaz. ¿Tikimilnamiki? Itaj David itoka Jesé (Isaí). David kintlajpiya itaj iborregos. Ijkuak Jehová yokitlapejpenijka Saúl niman kuikaya majtlaktli xiuitl kentla tekiuaj, otlakat David.

Ajsi tonajli ijkuak Jehová kijlia Samuel: ‘Xkitki achijtsin chiauak tlen melak ajuiyak niman xuiya Belén ichan Jesé. Yoniktlapejpeni se ikoneuj matekiuajti’. Ijkuak Samuel kita Eliab, ikoneuj Jesé akin yakatstiuj, yejua kinemilia: ‘Kanaj yejuin yes’. San ika, Jehová kijlia: ‘Maka xkita ika uejkapan niman ika kualtsin. Pampa xyejua oniktlapejpeni matekiuajti’.

Aman Jesé konnotsa Abinadab niman kuika kampa Samuel. San ika, Samuel kijlia: ‘Ka, nion yejuin xokitlapejpeni Jehová’. Sakin, Jesé kuajuika ikoneuj Samah. ‘Ka, nion yejuin xokitlapejpeni Jehová’, kijtoua Samuel. Jesé kinuajuika itech Samuel chikomemej ikoneuan, san ika, Jehová nion se xkitlapejpenia. Samuel kitlajtoltia: ‘¿San yejuin mokoneuan?’

‘Sa poliui akin xokoyotl. Yejua nemi ne kiyauak kintlajpiya borregos’, kijtoua Jesé. Ijkuak kuajuikiliaj David, Samuel kita ika melak kualtsin. ‘Kema yejuin yes’, kijtoua Jehová. ‘Xtoyauili tlen chiauak ipan itsontekon.’ Niman Samuel ijkon kichiua. Sakin, David tekiuajtis ipan Israel.

1 Samuel 17:34, 35; 16:1-13.