Historia 80

Israelitas kisaj itech Babilonia

YOPANOK kanaj ome xiuitl ijkuak medos iuan persas okinotlatkitijkej Babilonia. ¡Niman aman xkita tlen panotika! Kema, israelitas uajkistokej itech Babilonia. ¿Kenon omakiskej? ¿Akinon okinkauili mauiyan?

Ciro, intekiuaj persas yejua okichiuj. Ijkuak xitlakatiya Ciro, Jehová okichiuj ika teotlajtoketl Isaías makijkuilo yejuin itech Ciro: ‘Tikchiuas tlen nejua nikneki. Puertas tlapojtoskej niman ijkon tikmotlatkitis ueyikalpan’. Ciro kema onotlatkiti Babilonia. Medos iuan persas okalajkej ipan ueyikalpan ika yeuajli pampa puertas tlapojtoyaj.

San ika, Jehová noijki okijli teotlajtoketl Isaías, ika Ciro tlanauatiskia makinyektlalikan Jerusalén niman iteopan. ¿Melak ijkon otlanauati Ciro? Kema. Yejuin tlen okimijli israelitas: ‘Xuiyan Jerusalén, niman xchijchiuakan iteopan nemoTajtsin Jehová’. Niman ijkon kichiuaj israelitas.

San ika, xnochimej israelitas akin chantij Babilonia ouelkej onokuepkej Jerusalén. Melak uejka katka, kipiaya kanaj 800 kilómetros, niman miyekej israelitas youeuentsintiajkej niman yokokoxkatijkej. Noijki onka okseki tlemach tlen ika xuelij yauej. San ika, nochimej akin xuelij yauej, Ciro kimijlia: ‘Xkinmakakan plata, oro iuan okseki tetlayokoliltin akin nokuepaskej, niman kiyektlaliskej Jerusalén iuan teopan’.

Ika yejon, israelitas akin nokuepaj Jerusalén kiseliaj miyek tetlayokoliltin. Noijki, Ciro kinmaka tazones niman copas tlen tekiuaj Nabucodonosor okinuajkuiteujka itech iteopan Jehová ijkuak okixoxotoni Jerusalén. Melak miyek tlemach kitkij israelitas.

Ijkuak yopanok naui metstli ika yonejnenkej, israelitas ajsij Jerusalén ijkon ken yonoijtoka. Opanok 70 xiuitl ijkuak Jerusalén okixoxotonijkej, niman xakaj onokaujka ipan yejon país. San ika, maski israelitas yonokuepkej ipan inpaís, oksejpa tlajyouiskej, ijkon ken tikitaskej.

Isaías 44:28; 45:1-4; Esdras 1:1-11.