Historia 91

Jesús tlamachtia ipan se tepetl

XKITA kanon nemi Jesús. Kinmachtijtika akin nemij ipan yejuin tepetl tlen onka Galilea. Akin nisiu nemij, yejuamej inomachtijkauan. Jesús okintlapejpeni 12 tlakamej akin yeskej itlatitlankauan. Yejuamej nochipa iuan kistinemij Jesús. ¿Tikmatstika kenon intoka?

Kachtopa, Simón Pedro iuan ikniuj Andrés. Niman, Santiago (Jacobo) iuan Juan, akin noijki ikniujtin. Okse itlatitlankauj noijki itoka Santiago, niman okse noijki itoka Simón. Omemej itlatitlankauan intoka Judas. Se kitokayotiaj Judas Iscariote, niman okse Judas (Lebeo) akin noijki kitokayotiaj Tadeo. Oksekimej intoka Felipe niman Natanael (akin noijki kitokayotiaj Bartolomé), niman Mateo iuan Tomás.

Sakin, ijkuak okiskej itech Samaria, Jesús peua tenojnotsa: ‘Itekiuajyo toTajtsin yononisiui’. ¿Tikmatstika tlenon katka yejon tekiuajyotl? Se tekiuajyotl melauak, tlen ualeua itech toTajtsin. Jesús yejua tekiuaj. Yejua nemis iluikak kampa uajtlanauatijtos ipan tlaltikpaktli niman ijkon kichiuas maonia yolseuilistli. Itekiuajyo toTajtsin kikuepas tlaltikpaktli se kualtsin xochitlalpan.

Nikan Jesús kinmachtijtika tlaltikpakchanejkej itech itekiuajyo toTajtsin. Niman kinmachtia kenon kichiuaskej teoyotl, yejua kijtoua: ‘ToTajtsin akin tinemi iluikak, manoueyichiua motokatsin. Mauajla motekiuajyo. Manochiua tlen tejua tikneki ipan tlaltikpaktli, ken nochiua ipan iluikak’. Miyekej tlaltikpakchanejkej kitokayotiaj yejuin teoyotl kentla ‘Padrenuestro’. ¿Uelis tikijtos nochi tlen kijtoua yejuin teoyotl?

Jesús noijki kinmachtijtika kenon nouikaskej iuan oksekimej. ‘Xkinchiuili oksekimej tlen tejua tikneki mamitschiuilikan’, kijtoua. ¿Xtikuelita ijkuak oksekimej mitschiuiliaj tlen kuajli? Ika yejon, tikinchiuiliskej oksekimej tlen kuajli. ¡Melak kualtsin yes ijkuak ipan xochitlalpan nochimej kichiuaskej tlen kuajli! ¿Xmelak?

Mateo, tlaxeloltin uejueyimej 5 ontlami ipan 7; Mateo 10:​1-4.