Tlamachtijli 1

Kenon uelis tikmatiskej tlen toTajtsin kineki matikchiuakan

¿Tlenon kuajli tlamachtijli kipiya Biblia? (1)

¿Akinon itlanemililuan tlen ijkuiliujtok ipan Biblia? (2)

¿Tleka noneki timomachtis Biblia? (3)

1. Biblia se kuajli tetlayokolijli ualeua itech toTajtsin. Kentla se amatlakuilojli tlen se tajtli tetlasojtlani kimikuilouilia ikoneuan. Techijlia tlen melak itech toTajtsin: akinon niman katlejua itlanauatiluan. Techtomilia kenon uelis tikixnamikiskej tlaueltin niman kenon uelis tiknextiskej pakilistli. San Biblia techijlia tlenon noneki tikchiuaskej niman ijkon tikpaktiskej toTajtsin (Santiago 1:25; Apocalipsis 1:3).

2. Kanaj 1513 xiujtin achto uajnemiskia Jesús, opeujkej kijkuilouaj Biblia. Okijkuilojkej 40 tlakamej niman ouekaujkej 1600 xiujtin. Kipiya 66 amoxtsitsintin. Tlakamej okikuilojkej tlen toTajtsin okimijli, kijtosneki, okitlalijkej itlanemililuan toTajtsin, xyejuamej intlanemililuan. Kuakon tlen ijkuiliujtok ipan Biblia xitlanemililuan tlaltikpakchanejkej, itlanemililuan toTajtsin iluikakchanej (2 Timoteo 3:16, 17; 2 Pedro 1:21).

3. ToTajtsin okinek kuajli manoixkopina Biblia niman maka mapoliui. Yonochichijkej miyek Biblias xijkon ken seki amoxtli. Xnochimej pakiskej ika timomachtia Biblia, san ika maka xmokauili yejon mamitstelti. Uelis tinemis nochipa tla tikixmati toTajtsin niman tikchiua tlen yejua kineki maski mamitstlaueltokakan (Mateo 5:10-12; Juan 17:3).