Tlamachtijli 7
Kenon tiknisiuis toTajtsin ika teoyotl
¿Tleka noneki tikchiuas teoyotl nochipa? (1)
¿Akinon tikchiuiliskej teoyotl, niman kenon? (2, 3)
¿Tlenon tiktlajtlaniskej ijkuak tikchiuaj teoyotl? (4)
¿Kemanon noneki tikchiuas teoyotl? (5, 6)
¿Kikaki toTajtsin nochi teoyomej? (7)
1. Tikchiuas teoyotl kijtosneki titlajtos iuan toTajtsin ika yolyemanilistli. Nochipa matikchiuilikan teoyotl toTajtsin. Tla tikchiuaj, tiknisiuiskej kentla se akin iuan touikaj niman tiktlasojtlaj. Maski Jehová sajnoye ueyixtika niman kipiya kojtilistli, kikaki toteoyouan. ¿Nochipa tikchiua teoyotl? (Salmo 65:2; 1 Tesalonicenses 5:17.)
2. Noijki tikueyichiuaj Jehová ika teoyotl. Ika on, matikchiuilikan teoyotl san toTajtsin Jehová. Ijkuak Jesús nemiya ipan tlaltikpaktli, nochipa kichiuiliaya teoyotl iTaj, xakaj okse kichiuiliaya. Tejuamej noijki ijkon tikchiuaskej (Mateo 4:10; 6:9). San ika, nochipa noneki tikchiuaskej teoyotl ipampa itokatsin Jesús. Ijkon tikteititiaj ika tiktlakaitaj Jesús kampa nemi, niman tikneltokaj ika yejua topampa onotemakak niman ijkon otechmakixti (Juan 14:6; 1 Juan 2:1, 2).
3. Ijkuak tikchiuiliskej teoyotl toTajtsin, noneki maualeua itech toyojlo tlen tikijliskej. Xtikijliskej san tlen yotiktsontekontlalijkej noso san tlen tlajkuilolnestika ipan se amatl (Mateo 6:7, 8). Uelis tikchiuaskej teoyotl tijkatoskej, totlalitoskej noso maski san kenon, san ika manesi ika tiktlakaitaj, san kemanon niman maski san kanon. ToTajtsin kikaki teoyomej tlen tikchiuaj ipan toyojlo, san ichtaka (1 Samuel 1:12, 13). Melak kuajli tla tikchiuaj toteoyouan kampa xakaj techpasoloua (Marcos 1:35).
4. ¿Tlenon uelis tiktlajtlanis ipan teoyotl? Maski san tlenon, tla mitspaleuis iuan timouikas toTajtsin (Filipenses 4:6, 7). Ijkuak Jesús otechititi kenon tikchiuaskej teoyotl okijto ika matikueyiteneuakan itokatsin Jehová niman matiktlajtlanikan manochiua tlen yejua kineki kichiuas. Noijki uelis tiktlajtlaniliskej matechmaka tlen techpoloua, matechtlapopoluili totlajtlakoluan niman matechpaleui matikxikokan tlatlatalismej (Mateo 6:9-13). Ijkuak tikchiuaskej teoyotl xsan tejuamej totlajtlaniliskej. San tiktlajtlaniskej tlen yejua kineki manochiua (1 Juan 5:14).
5. Tejua uelis tikchiuas teoyotl nochipa ijkuak moyojlo mitsmapeuas xtlaxtlauilmaka toTajtsin noso xueyichiua (1 Crónicas 29:10-13). Maka xkajkaua xchiua teoyotl ijkuak tikpiyas tlauejli niman ijkuak kitlatlataskej motlaneltokil (Salmo 55:22; 120:1). Noijki kuajli tla tikchiuas teoyotl ijkuak itipeuas titlakuas (Mateo 14:19). Jehová techyoleua matikchiuakan teoyotl “nochipa” (Efesios 6:18).
6. Tla tikchiuaj se ueyi tlajtlakojli, noneki tikchiuaskej teoyotl niman tiktlatlaujtiskej Jehová matechikneli niman matechtlapopolui. ToTajtsin “nimantsin techtlapopoluis” tla tiktlapouiliaj toyojlo niman tikijliaj totlajtlakoluan niman tochikaua xok tikchiuaskej oksepa (Salmo 86:5; Proverbios 28:13).
7. Jehová san kinkakilia iteoyouan akin yolmelajkej. Tla tikneki toTajtsin makikaki moteoyouan, xmochikaua xchiua ken kijtoa itlanauatiluan (Proverbios 15:29; 1 Pedro 3:12). Ijkuak tikchiuas teoyotl, xchiua ika yolyemanilistli (Lucas 18:9-14). Noneki tikchiuas tlen tiktlajtlani ipan teoyotl. Ijkon tikteititis ika tikpiya tlaneltokijli niman tikchiua ika nochi moyojlo. Kuakon, ijkon Jehová kinankilis moteoyouan (Hebreos 11:6).