Tlamachtijli 9
Noneki machipaujkej akin kitekichiuiliaj toTajtsin
¿Tleka noneki matichipaujkej? (1)
¿Tlenon kijtosneki machipauak tlen tikneltokaj? (2)
¿Niman machipauak tonemilis? (3)
¿Niman machipauak totlanemilis? (4)
¿Niman machipauak tonakayo totlaken niman kampa tichantij? (5)
¿Tlenon tlajtojli xchipauak noneki xtikijtoskej? (6)
1. ToTajtsin Jehová chipauak niman yektik. Yejua kineki akin kiueyichiuaj machipaujkej itech tlen kineltokaj, iminemilis, imintlanemilis, iminakayo niman machipauak kampa chantij (1 Pedro 1:16). Matokojtilikan niman ijkon matichipaujkanemikan ixko toTajtsin. Tinemij ipan tlaltikpaktli tsokuiltik. Niman noijki, nochipa iuan toxixikoaj xtikchiuaskej tlen xkuajli. San ika maka matotsinkixtikan.
2. Machipauak tlen tikneltokaj: Tla tiknekij tiktekichiuiliskej Jehová, maka matiknekikan tikchiuaskej tlen tikchiuayaj ijkuak tikneltokayaj tlen xmelauak. Noneki tikisaskej itech tlaneltokijli tlen xmelauak niman maka tikpaleuiskej (2 Corintios 6:14-18; Apocalipsis 18:4). Tla yotomachtijkej tlen melauak itech toTajtsin, noneki totlajpiyaskej maka matechkajkayauakan akin temachtiaj tlen xmelauak (2 Juan 10, 11).
3. Nemilistli chipauak: Jehová kineki ika akin kiueyichiuaj machipaujkanemikan kentla yemelak kitokaj Cristo (1 Pedro 2:12). Yejua kita nochi tlen tikchiuaj, niman noijki tlen tikchiuaj san ichtaka (Hebreos 4:13). Noneki maka matiauilnemikan niman maka matikchiuakan tlen xkuajli nochiua ipan tlaltikpaktli (1 Corintios 6:9, 10).
4. Chipauak totlanemilis: Tla tiktemiltiaj totsonteko ika tlen chipauak, tikchiuaskej san tlen chipauak (Filipenses 4:8). Niman tla nochipa tiknemiliaj nochi tlen xkuajli, ajsis tonajli ijkuak tikchiuaskej tlen xkuajli (Mateo 15:18-20). Noneki tikmapeuaskej nochi tlen uelis kijtlakos totlanemilis. Tla tomachtiaj iTlajtol toTajtsin, tiktemiltiske totsonteko ika tlanemililtin chipaujkej.
5. Chipauak tonakayo, totlaken niman tochan: Noneki machipauak tonakayo niman totlaken, pampa tejuamej titlajtoaj itech toTajtsin. Matomapajpakakan tla yotiajkej baño, noijki ijkuak titlakuaskej noso ijkuak tikejchiuaskej tlakuajli. Tla kampa tichanti xtla baño, kuakon ijkuak timoxixas noneki tiktlalpachos (Deuteronomio 23:12, 13). Tla tichipaujkej xsajnoye techajsis kokolistli. Akin kineltokaj Cristo noneki matlachipaujkan inchan niman makuajli onia inkalijtik niman inkiyauak. Kampa chantij manesi ika kuajli tlen kichiuaj.
6. Tlajtojli chipauak: Akin kitekichiuiliaj toTajtsin nochipa kijtoa tlen melauak. Tlakakayaujkej xkalakiskej itech iTekiuajyo toTajtsin (Efesios 4:25; Apocalipsis 21:8). Akin kineltokaj Cristo xkijtoaj tlen xkuajli. Xkikakij nion xkamanalouaj ika tlen tsokuiltik. Kimixmatij ika tlajtoaj san tlen chipauak kampa tekitij, ipan kaltlamachtijli niman kampa chantij (Efesios 4:29, 31; 5:3).
[Pictures on page 18, 19]
Itekitijkauan toTajtsin noneki machipaujkej itech nochi tlen kichiuaj