Tlaxtlauijli, se tlen melak ueyi itetlayokolil toTajtsin

1, 2. a) ¿Tlenon kichiua ika se tetlayokolijli melak xtlasojkaita? b) ¿Tleka tlaxtlauijli se tetlayokolijli tlen melak patioj yotikselijkej?

¿KEMANTIKA otikseli se tetlayokolijli tlen melak otiktlasojkaitak? Se tetlayokolijli xkipiya ika patioj yes niman ijkon xtlasojkaita. Melak tiktlasojkaitas tla tlen omitstlayokolijkej mitsyolpaktia noso tla yejon tlen mitspolouaya.

² Itech nochi tlen tejua mitstlayokoliskiaj, onka se tlen melak ueyi. Tetlayokolijli tlen toTajtsin okinmakak tlaltikpakchanejkej. Jehová yotechmakak miyek tlemach, san ika, onka se tlen melak ueyi tetlayokolijli, itoka tlaxtlauijli: ijkuak toTajtsin okitemakak ikoneuj Jesucristo ken se uentli (xpoua Mateo 20:28). Ken tikitaskej ipan yejuin capítulo, tlaxtlauijli se tetlayokolijli melak ueyi tlen yotikselijkej, pampa kichiua matinemikan ika paktli niman matikpiyakan tlen melauak techpoloua. Ika yejuin tetlayokolijli, Jehová techititia iueyitlasojtlalis tlen kimachilia topampa.

¿TLENON YEJUIN TLAXTLAUIJLI?

3. ¿Tlenon ueli kichiua tlaxtlauijli, niman tlenon noneki tikasikamatiskej niman ijkon tiktlasojkaitaskej tlaxtlauijli?

³ Ika yejon tlaxtlauijli Jehová kinmakixtia tlaltikpakchanejkej itech tlajtlakojli niman mikilistli (Efesios 1:7). Yejuin tlamachtijli itech tlaxtlauijli, uelis tikasikamatiskej tla tikmatij tlen opanok ipan xochitlalpan Edén. San tla tikasikamatij tlen okipolo Adán ijkuak otlajtlako, kichiuas matiktlasojkaitakan tlaxtlauijli.

4. ¿Kenon nemiya Adán ijkuak xkipiaya tlajtlakojli?

⁴ Ijkuak Jehová okichijchiuj Adán, okimakak itlaj tlen melak tlasojti: nemilistli tlen xkipiaya tlajtlakojli. Xnemili kenon nemiya. Pampa itlalnakayo niman itlamachilis xkipiaya tlajtlakojli, xkeman kualoskia, xueuentsintiskia nion xmikiskia. Noijki melak kuajli iuan nouikaya Jehová. Biblia kijtoua ika Adán “tekoneu katka itech Dios” (Lucas 3:38). Kuakon, toTajtsin melak kuajli iuan nouikaya Adán, ijkon ken se tajtli akin tetlasojtla nouika iuan ikoneuj. Kema, toTajtsin iuan tlajtouaya Adán, kimakaya tekitl tlen kiyolpaktiskia niman kijliaya tlenon kinekiya makichiua (Génesis 1:28-30; 2:16, 17).

5. ¿Tlenon kijtosneki ipan Biblia ijkuak kijtoua ika Adán okichijchiujkej ken “itlachialis toTajtsin”?

⁵ Adán okichijchiujkej ken “itlachialis toTajtsin” (Génesis 1:27). ¿Kijtosneki yejuin ika tlachiaya ijkon ken toTajtsin? Ka. Ken otomachtijkej ipan capítulo 1 itech yejuin amoxtli, Jehová se Espíritu, xueli tikitaj (Juan 4:24). Kuakon yejua xkipiya iomiuan niman itlalnakayo. Ijkuak noijtoua ika Adán okichijchiujkej ken itlachialis toTajtsin, kijtosneki ika kipiaya ikualneskayouan ken toTajtsin: tlasojtlalistli, tlamachilistli, melajkayotl niman kojtilistli, noijki kipiaya okseki. Yejua noijki ijkon katka kentla iTaj, pampa ueliya kitlapejpenis tlenon kichiuas. Xokichijchiujkej kentla se máquina, san makichiua tlen kinauatiaj. Yejua ueliya kitlapejpeniaya kichiuas tlen kuajli niman tlen xkuajli. Tla kitlakamatiskia toTajtsin, nemiskia nochipa ipan Xochitlalpan.

6. Ijkuak Adán xokitlakamat toTajtsin, ¿tlenon okipolo niman tlenon panoskia iuan inkoneuan?

⁶ Kuakon, kuajli tikitaj ika pampa Adán xokitlakamat toTajtsin, xkuajli okisato, pampa okijlikej ika mikis. Noijki pampa otlajtlako, okipolo inemilis tlen xkipiaya tlajtlakojli niman nochi tlen kuajli kiseliaya (Génesis 3:17-19). Niman xsan Adán okipolo yejuin kualtsin nemilistli, noijki xokinkauili ikoneuan makipiyakan yejuin nemilistli. ToTajtsin iTlajtol kijtoua: “Ipan in tlaltikpaktli on achtoj tlakatl [Adán] otlajtlakoj niman ipampa on tlajtlakojli onkaj mikilistli. Niman aman nochimej mikiskej pampa nochimej tlajtlakouaj” (Romanos 5:12). Kema, nochi tejuamej otikselijkej itlajtlakol Adán. Ika yejon, Biblia kijtoua ika Adán ‘otechnemakak’ itech tlajtlakojli niman mikilistli (Romanos 7:14). Adán iuan Eva xok ueliskia itlaj kinmakixtis, pampa xokinejkej okitlakamatkej toTajtsin. San ika ¿tlenon inpan nochiuaskia inkoneuan?

7, 8. ¿Tlenon ome tlemach kijtosneki tlaxtlauijli?

⁷ Jehová okinemili kinmakixtis tlaltikpakchanejkej ika tlaxtlauijli. ¿Tlenon kijtosneki tlaxtlauijli? Kijtosneki yejuin ome. Se, tlaxtlauijli tlen notemaka ijkuak yakaj kichtekij niman ijkon mamakisa. Ika ome, ijkuak ipan Biblia tlajtoua itech tlaxtlauijli, kijtosneki kech notlaxtlaua ijkuak yakaj itlaj xkuajli kichiua. Se neskayotl, ijkuak se techiuiliaya itlaj tlen xkuajli, nonekiya tlen ika kitlaxtlauas noijki ijkon mapatioj ken itech tlen okichiuj.

⁸ Ken yotikitakej, Adán okichiuj matikpolokan itlaj tlen melak tlasojti. ¿Kenon ueliskia notlaxtlauas tlen otikpolojkej niman ijkon timakisaskej itech tlajtlakojli niman mikilistli? Matikitakan kenon Jehová okitemakak tlen ika otlatlaxtlauj niman kenon uelis mitspaleuis.

¿KENON JEHOVÁ OKITEMAKAK TLAXTLAUIJLI?

9. ¿Kenon yeskia tlaxtlauijli tlen nonekiya?

⁹ Yopoliujka se nemilistli tlen xkipiaya tlajtlakojli. Ika yejon, xuelis notlaxtlauas tlen opoliuj ika inemilis se tlaltikpakchane (Salmo 49:7, 8). Nonekiya notlaxtlauas ika tlen noijki ijkon mapatioj ken tlen opoliuj. Ipan iTlajtol toTajtsin kijtouaya ika ijkon kinamikiya nochiuas. Kijtouaya ika manotemaka se “nemilistli ipampa okse nemilistli” (Deuteronomio 19:21). Kuakon, ¿ika tlenon ueliskia notlaxtlauas tlen okipolo Adán, se nemilistli tlen xkipiaya tlajtlakojli? Nonekiya se tlaltikpakchane xtlajtlakole ‘manotemaka makimiktikan niman ijkon manotlaxtlaua’ (1 Timoteo 2:6).

10. ¿Kenon Jehová okitemakak tlaxtlauijli?

¹⁰ ¿Kenon Jehová okitemakak tlaxtlauijli? Okuajtitlan ipan tlaltikpaktli se ikoneuj iluikakchane akin xkipiaya tlajtlakojli. San ika, xsan akinon okuajtitlan. Okuajtitlan akin melak kitlasojtlaya: isenteKoneuj (xpoua 1 Juan 4:9, 10). IKoneuj ika iyojlo okuajkaujteuj iluikak (Filipenses 2:7). Ijkon ken otikitakej ipan capítulo 4, Jehová okichiuj se milagro ijkuak okitlali iKoneuj ijtik María. Ika iespíritu santo toTajtsin, Jesús otlakat ken se tlaltikpakchane tlen xkipiya tlajtlakojli (Lucas 1:35).

11. ¿Kenon san se tlakatl okinmakixti melak miyekej tlaltikpakchanejkej?

¹¹ ¿Kenon ueliskia san se tlakatl tlatlaxtlauas ipampa melak miyekej tlaltikpakchanejkej? Matikilnamikikan, ¿kenon nochimej onochiujkej tlajtlakolejkej? Adán otlajtlako niman ijkon okipolo tlen melak tlasojtiya: nemilistli tlen xkipiya tlajtlakojli, tlen xok ouel okinpanoltili ikoneuan. San okinpanoltili tlajtlakojli niman mikilistli. Jesús, akin Biblia kitokayotia “sa ika nochi Adán”, inemilis xkipiaya tlajtlakojli niman xkeman otlajtlako (1 Corintios 15:45). Uelis tikijtoskej ika Jesús okichiuj tlen Adán xouel niman ijkon otechmakixti. Okitlakamat iTaj niman okitemakak inemilis tlen xkipiaya tlajtlakojli kentla se uentli. Ijkon okitlaxtlauj itlajtlakol Adán ken nonekiya niman ijkon ikoneuan noijki mauelikan makiselikan nemilistli (Romanos 5:19; 1 Corintios 15:21, 22).

12. ¿Tlenon okiteititi Jesús maski melak otlajyoui?

¹² Biblia kijtoua nochi tlen Jesús okijyoui ijkuak sa achijtsin poliuiya ika kimiktiskej. Tlemach xkuajli okichiuilijkej, okiuisojkej noso okimajmaakej, okipilojkej ipan se kojtli melaktik niman melak okitlajyouiltijkej ijkuak okimiktijkej (Juan 19:1, 16-18, 30; xkita apéndice, “¿Noneki makitekitiltikan cruz akin yemelak kichiuaj ken Cristo?”). ¿Tleka melak otlajyoui Jesús? Ken tikitaskej ipan okse capítulo, Satanás okijto ika nion se tlaltikpakchane xyolmelaujkanemis itech Jehová tla kitlatlataj. Ijkuak Jesús okixiko niman oyolmelaujkanen maski melak okitlajyouiltijkej, okititi Satanás ika xmelauak tlen okijto. Okiteititi ika se tlakatl tlen xkipiya tlajtlakojli, akin uelis kitlapejpenis tlen kichiuas, uelis yolmelaujkanemis itech Jehová maski Diablo makitlatlata. ¡Xnemili kenon melak okiyolpakti toTajtsin ijkuak okitak iKoneuj oyolmelaujkanen! (Proverbios 27:11.)

13. ¿Kenon okitemakak tlaxtlauijli?

¹³ ¿Kenon onotemakak tlaxtlauijli? Ipan tonajli 14, metstli judío nisán, xiuitl 33, toTajtsin okitekauili makimiktikan iKoneuj akin xkipiaya tlajtlakojli. Ijkon, Jesús okiuentlali inemilis tlen xkipiaya tlajtlakojli “san sejpa niman para nochipa” (Hebreos 10:10). Ijkuak yopanok yeyi tonajli ika omik, Jehová okiyoliti kentla se espíritu. Ipan iluikak, Jesús okimaktili iTaj inemilis tlen xkipiaya tlajtlakojli niman tlen melak patioj. Yejuin nemilistli tlen okitemakak Jesús kentla se tlaxtlauijli tlen ika okinmakixti ikoneuan Adán (Hebreos 9:24). Jehová okiseli inemilis Jesús tlen melak patioj, niman ijkon yejon uentli kinmakixtis tlaltikpakchanejkej itech tlajtlakojli niman itech mikilistli (xpoua Romanos 3:23, 24).

¿KENON UELIS MITSPALEUIS TLAXTLAUIJLI?

14, 15. ¿Tlenon noneki tikchiuaskej niman ijkon toTajtsin “techintlapopoluilis” totlajtlakoluan?

¹⁴ Ipampa yejuin tlaxtlauijli uelis tikseliskej melak uejueyimej tlateochiualistin maski titlajtlakolejkej. Matikitakan kenon yejuin tetlayokolijli tlen toTajtsin yotechmakak, techpaleuiya ipan yejuin tonajli niman techpaleuiya matikselikan tlateochiualistin ika tlayekapan.

¹⁵ ToTajtsin techintlapopoluilia totlajtlakoluan. Pampa otikselijkej tlajtlakojli, kemantika xueli tikchiuaj tlen kuajli. Tinochimej titlajtlakouaj, ika totlajtoluan niman ika tlen tikchiuaj. Pampa Jesús okitemakak inemilis, toTajtsin uelis ‘techintlapopoluilisʼ totlajtlakoluan (Efesios 1:7). San ika, noneki yemelak matoyolkuepakan. Noijki noneki toyolyemaniskej niman tiktlajtlaniliskej Jehová matechtlapopolui. Ijkuak ijkon tikchiuaskej, noneki tikneltokaskej ika Jesús okitemakak inemilis topampa (xpoua 1 Juan 1:8, 9).

16. ¿Tleka uelis tikueyichiuaskej toTajtsin ika se tlamachilistli chipauak, niman kenon techpaleuiya ijkuak tikpiyaj chipauak totlamachilis?

¹⁶ Chipauak totlamachilis ixpan toTajtsin. Pampa totlamachilis kipiya tlajtlakojli, tikmachiliaj ika xuelis tikchiaskej tlen kuajli niman ika xtitepaleuijkej. San ika, pampa okitemakak tlaxtlauijli, Jehová techtlapopoluiya niman techkauilia matikueyichiuakan ika se tlamachilistli chipauak maski titlajtlakolejkej (Hebreos 9:13, 14). Ika yejon, ueli iuan titlajtouaj, kijtosneki, ueli tikchiuiliaj teoyotl niman xtlaj techtsakuilia (Hebreos 4:14-16). Noijki, ijkuak tikpiyaj totlamachilis chipauak, xtlaj techajmana, kuajli tomachiliaj niman tinemij ika pakilistli.

17. Pampa Jesús omik topampa, ¿tlen tlateochiualistin uelis tikseliskej?

¹⁷ Tikchiaj tinemiskej nochipa ipan se xochitlalpan. Romanos 6:23 kijtoua: “Tlajtlakojli kitemaka tlaxtlauijli ika mikilistli”. Noijki, ipan yejon tlaxelojli pitentsin kijtoua: “Niman on nemilistli tikseliaj itechkopa Cristo Jesús toTeko”. Ipan capítulo 3 itech yejuin amoxtli otikitakej tlateochiualistin tlen xok uejkauis tikseliskej ipan Xochitlalpan (Apocalipsis [Revelación] 21:3, 4). Tlateochiualistin kampa kijtoua ika xok keman tikualos niman nochi tlateochiualistin tlen otikinteneujkej, nochiuaskej pampa Jesús omik topampa. Tla tiknekij tikinseliskej, noneki tikteititiskej ika tiktlasojkaitaj tlaxtlauijli tlen toTajtsin otechtlayokoli.

¿KENON UELIS TIKTEITITIS IKA TIKTLASOJKAITA?

18. ¿Tleka melak tiktlasojkamachiliskej Jehová pampa otechtlayokoli tlaxtlauijli?

¹⁸ ¿Tleka melak noneki tiktlasojkamachiliskej Jehová pampa okitemakak yejon tlaxtlauijli? Melak tiktlasojkaitaj se tetlayokolijli ijkuak akin techmaka chikauak otekipano, okitekitilti miyek tonaltin, noso tomin niman ijkon otechmakak. Noijki, tiktlasojkaitaj pampa techititia ika yemelak techtlasojtla. Kuakon, tetlayokolijli tlen toTajtsin yotechmakak melak ueyi kijtosneki pampa xakaj okse yokitemakak ken yejuin tetlayokolijli. Ipan Juan 3:16 kijtoua: “Dios sanoyej okintlajsojtlak on tlaltikpaktlakamej hasta okitemakak isenteKonetsin”. Ika yejuin tlaxtlauijli Jehová techititia ueyi tlasojtlalistli. Noijki techititia kenon melak techtlasojtla Jesús, akin okitemakak inemilis topampa (xpoua Juan 15:13). Kema, tlaxtlauijli tlen otechtlayokolijkej matechtlaneltokilti ika Jehová iuan iKoneuj techtlasojtlaj tisesentemej (Gálatas 2:20).

19, 20. ¿Kenon uelis tikteititiskej ika tiktlasojkaitaj tlaxtlauijli tlen toTajtsin otechtlayokoli?

¹⁹ Kuakon, ¿kenon tikteititis ika tiktlasojkaita tlaxtlauijli tlen toTajtsin otechtlayokoli? Kachtopa, noneki kuajli xkixmati Jehová akin otlatlaxtlauj (Juan 17:3). Uelis tikchiuas tla timomachtia Biblia ika yejuin amoxtli. Ijkuak kuajli tikixmatstias Jehová, melak noskaltijtias motlasojtlalis tlen tikmachilia itech yejua. Niman ijkuak melak tiktlasojtlas, nochipa tiknekis tikyolpaktis (1 Juan 5:3).

²⁰ Xtlaneltoka itech akin okitemakak ken tlaxtlauijli. “Yejuan kineltoka ikonetsin Dios [toTajtsin] kipia nemilistli para nochipa”, yejuin tlen noijtoua itech Jesús (Juan 3:36). ¿Kenon uelis tikteititiskej ika tikneltokaj Jesús? Xsan noneki tikijtoskej ika tikneltokaj. Ken kijtoua Santiago 2:26, “xitlaj kijtosneki itlaneltok se tlakatl tla xkichiua tlajtlamach tlen kuajli”. Kema, kipiya ika tikchiuaskej tlen toTajtsin kineki. Tikteititiskej ika tikneltokaj Jesús tla tochikauaj tikchiuaj ken yejua, itech tlen tikijtouaj niman itech tlen tikchiuaj (Juan 13:15).

21, 22. a) ¿Tleka noneki matosentlalikan ijkuak noilnamiki iTlakualis toTeko ipan nochi xiuitl? b) ¿Tlenon tikitaskej ipan capítulos 6 niman 7?

²¹ Xuiya ijkuak noilnamiki iTlakualis toTeko nochi xiuitl. Ika tlayoua ipan tonajli 14, metstli nisán, xiuitl 33, Jesús okijto tlen melak noneki manoilnamiki, Biblia kitokayotia “iTlakualis toTeko” (1 Corintios 11:20, TNM; Mateo 26:26-28). Noijki noixmati ken ijkuak noilnamiki imikilis Jesús. Yejuin okichiuj Jesús niman ijkon okinpaleui itlatitlankauan niman nochimej akin melauak kichiuaj ken Cristo makilnamikikan itlaj tlen melak noneki: ijkuak omik, okitemakak inemilis kentla tlaxtlauijli, kijtosneki, inemilis tlen xkipiaya tlajtlakojli. Jesús otlajto itech yejuin ijkuak otlanauati: “Xchiujtokan yejuin niman ijkon xnechilnamikan” (Lucas 22:19, TNM). Ijkuak noilnamiki imikilis Jesús, techilnamiktia iueyitlasojtlalis tlen Jehová niman Jesús otechititijkej ijkuak okitemakak tlaxtlauijli. Ijkuak tosentlaliaj niman tikilnamikij nochi xiuitl imikilis Jesús, tikteititiaj ika tiktlasojkaitaj yejuin tlaxtlauijli.a

²² Jehová otechmakak se tetlayokolijli tlen melak patioj, tlaxtlauijli (2 Corintios 9:14, 15). Yejuin tetlayokolijli noijki uelis kinpaleuis akin yomijkej, ken tikitaskej ipan capítulos 6 niman 7.