APÉNDICE
Daniel kijtoua kemanon yejkoskia Mesías
DANIEL onen ipantsin quinientos xiuitl ijkuak Jesús xiuajtlakatiya. Jehová okijli tlen ika uelis kimatiskia kemanon kitlapejpeniskia Jesús kentla Mesías, noso Cristo. Okijlikej Daniel: “Kipiya ika tikmatis niman tikasikamatis ika ijkuak tlanauatiskej makiyektlalikan Jerusalén niman ijkuak yejkos Tlayekanketl Mesías, panos chikome semanas, noijki sesenta iuan ome semanas” (Daniel 9:25).
Matikitakan kenon uelis nomatiskia kemanon yejkos Mesías. Kachtopa noneki matikmatikan kemanon peua nopouaj semanas. Teotlajtojli kijtoua ika peua “ijkuak tlanauatiskej makiyektlalikan Jerusalén”. ¿Kemanon ‘tlanauatiaj makiyektlalikan’? Nehemías, okse akin okijkuilo Biblia, kijtoua ika otlanauatijkej makiyektlalikan itepanuan Jerusalén ipan “xiuitl veinte ipan itekiuajyo Artajerjes” (Nehemías 2:1, 5-8). Miyekej ixtlamatkej kijtouaj ika Artajerjes opeuj tlanauatia ipan xiuitl 475 ijkuak xpeuaya xiuitl 1 (i.x.x. 1). Ijkon tikasikamatij ika okaxilti veinte xiuitl kentla tekiuaj ipan 455 i.x.x. 1. Kuakon, teotlajtojli tlen Daniel okijto peua nochiua ipan yejon xiuitl: 455 i.x.x. 1.
Daniel kijtoua kech semanas panoskiaj ijkuak yejkos “Tlayekanketl Mesías”. Teotlajtojli kijtoua ika panoskiaj “chikome semanas, noijki sesenta iuan ome semanas”, ika nochi 69 semanas. ¿Kech uejkauiskia yejuin? Ijkon ken kijtouaj miyek Biblias, xyeskiaj semanas tlen kipiyaj chikome tonajli, pampa kijtosneki ika yejuin semanas kipiyaskiaj chikome xiuitl. Yeuejkaui, judíos kuajli kixmatiyaj yejuin semanas tlen kipiyaj chikome xiuitl. Se neskayotl, yejuamej kitlakamatiyaj tlen nonekiya nochiuas ipan chichikome xiuitl tlen kixmatiyaj kentla: xiuitl sabático (Éxodo 23:10, 11). Ijkon, ipan teotlajtojli tlen okijkuilo Daniel se semana kijtosneki chikome xiuitl, kuakon 69 semanas kipiya 483 xiuitl.
Aman sa noneki matitlapouakan. Tla itech xiuitl 455 i.x.x. 1, peua tikpouaj 483 xiuitl, tajsij ipan xiuitl 29. Ipan yejuin xiuitl ijkuak Jesús onoapolakti niman onochiuj Mesías (Lucas 3:1, 2, 21, 22).a ¿Xmelak ika yejuin teotlajtojli xonopopolo nion achijtsin?
a Itech 455 i.x.x. 1 hasta ipan 1 i.x.x. 1 panoua 454 xiuitl. Sakin, itech xiuitl 1 i.x.x. 1 hasta ijkuak peua xiuitl 1 panoua san se xiuitl (pampa xtlaj xiuitl cero). Niman itech xiuitl 1 hasta ipan xiuitl 29 panoua 28 xiuitl. Kuakon tla tiksentlaliaj nochi yejuin xiuitl (454+1+28), ajsi 483 xiuitl. Jesús “omik” ipan xiuitl 33, ipan semana 70 (Daniel 9:24, 26). Tla tikneki tikmatis okseki, xkita amoxtli Prestemos atención a las profecías de Daniel ipan capítulo 11, niman amoxtli Perspicacia para comprender las Escrituras, volumen 2, páginas 1014-1017, tlen okinchijchiujkej iteixpantijkauan Jehová.