CAPÍTULO 2
Noneki kuajli matikpiyakan totlamachilis
“Ma ka xkauilikan nemotlamachilis ma mechtlajtlakolmaka.” (1 PEDRO 3:16.)
1, 2. ¿Tleka melak noneki se makipiya tlauijli ijkuak nejnemi ika tlayoua, niman kenon totlamachilis kentla tlauijli yeskia?
XNEMILI ika tinejnemi ika tlayoua. ¿Tlenon noneki tikitkis niman ijkon maka tiuetstikisa nion maka itlaj xkuajli mopan manochiua? Noneki tikitkis tlauijli tlen ika titlauilos.
2 Tla xtikpiya tlauijli xuelis tikitas kampa tinejnemi, kanaj uelis tiuetsis noso itlaj xkuajli mopan nochiuas. Tlauijli techpaleuis maka itlaj topan manochiua ipan ojtli. Jehová yotechtlayokoli itlaj kentla se tlauijli yeskia: totlamachilis (Santiago 1:17). Tla xtikpiyaskiaj, xtikmatiskiaj kanon ika tiaskiaj. Ijkuak kuajli tiktekitiltiaj, techpaleuiya matiakan ipan kuajli ojtli niman maka matikisakan. Ken tikitaj, yejuin se kualtsin tetlayokolijli. Ika yejon, noneki matomachtikan tlenon yemelak yejon totlamachilis niman kenon techpaleuiya, niman noijki tikitaskej yejuin: 1) kenon tikmachtiaj 2) tleka noneki titlanemiliskej itech intlamachilis oksekimej niman 3) kenon techpaleuiya tla nochipa kuajli tikpiyaj totlamachilis.
TLENON TOTLAMACHILIS NIMAN KENON TEKITI
3. ¿Tlenon kijtosneki tlajtojli ika griego “tlamachilis”, niman tlenon ueli kichiua se tlaltikpakchane pampa kipiya yejuin?
3 Ipan Biblia, tlajtojli ika griego “tlamachilis” kijtosneki “san no tejua timoixmatis”, noso “san no tejuamej uelis tikitaskej tlen tikpiyaj tlaijtik”. ToTajtsin xok yakaj okimakak itlamachilis ijkon ken tlaltikpakchane. Uelis tikijtoskej ika pampa tikpiyaj totlamachilis, kentla tikisaskiaj totech niman uelis tikitaskej tlenon tiknemilijtokej. Totlamachilis techteixpantia, techpaleuiya niman techteiluiya itech tlen tikchiuaj niman itech tlen tiknekij tikchiuaskej. Techpaleuiya kuajli matiktlapejpenikan itech tlen tiknekij tikchiuaskej niman techijlia tla kuajli ojtli tlen tiknemilijtokej tikajsiskej. Tla kuajli tiktlapejpeniaj, kichiua kuajli matomachilikan; tla ka, techpasoloua.
4, 5. a) ¿Kenon tikmatij ika Adán iuan Eva kipiayaj intlamachilis? ¿Tlenon opanok ijkuak xokitlakamatkej toTajtsin? b) Itech akin onenkej ijkuak xiuajnemiya Cristo, ¿akinomej kema okitlakamatkej intlamachilis?
4 Kachtopa tlaltikpakchanejkej, Adán iuan Eva, okinmakakej intlamachilis. Ijkon nesi pampa opinaujkej ijkuak otlajtlakojkej (Génesis 3:7, 8). Niman maski okinpasolo intlamachilis, xok itlaj ika okinpaleui. ¿Tleka? Pampa ijkuak xokitlakamatkej toTajtsin, kimatstoyaj tlen kichiujtoyaj. Yejuamej xkipiayaj tlajtlakojli, kuakon ijkuak okitlapejpenijkej xkitlakamatiskej Jehová niman onochiujkej itlauelikniuan, kuajli kimatstoyaj tlen kichiujtoyaj. Kuakon, xok ueliskiaj nokuepaskej itech toTajtsin.
5 Miyekej tlaltikpakchanejkej tlajtlakolejkej kema yokitlakamatkej intlamachilis xijkon ken Adán iuan Eva. Se itoka Job, akin okijto: “Nochipa niyolmelaujkanemis niman xkeman nikilkauas; noyojlo xnechtlajtlakolmakas kech uejkauis ninemis” (Job 27:6).a Job kuajli kikakiya itlamachilis ijkuak itlaj kichiuaskia noso itlaj kitlapejpenis kichiuas. Ika yejon ueliya kijtouaya ika itlamachilis xkitlajtlakoltiaya noso xkichiuaya mapinaui. San ika, David xijkon okimachili. Yejua kema kipasolouaya itlamachilis. Biblia kijtoua ika “sakin iyojlo David ok kikokojtoya” ijkuak xokitlakaitak Saúl, tekiuaj akin Jehová yokitlapejpenijka (1 Samuel 24:5). Nochi yejon tlen kimachiliaya David, okimachti ika noneki tetlakaitas.
6. ¿Kenon nesi ika tinochimej yotikselijkej totlamachilis?
6 Xsan itekipanojkauan Jehová kipiyaj intlamachilis. Pablo, itlatitlankauj Cristo, okijkuilo: “Pero ijkuak on xhebreos yejuan xkipiaj itlanauatil Moisés, kichiuaj sa no ijki ken tlanauatia on tlanauatijli, yejuamej kiteititiaj ika itlanauatil Dios onkaj ipan inyojlo, maski xkipiaj itlanauatil Moisés. Ijkon, tej, ken yejuamej nouikaj kiteititiaj ika on tlanauatijli tlajkuilolonkaj ipan inyojlo. Intlamachilis no kiteixpantiliaj yejua on, pampa kemantika kintlajtlakolmaka noso kemantika kinmanauiya” (Romanos 2:14, 15). Kemantika, noijki akin xkixmatij itlanauatiluan toTajtsin intlamachilis kichiua makichiuakan ken Jehová kijtoua.
7. ¿Tleka kemantika totlamachilis uelis xkuajli techyekanas?
7 San ika, totlamachilis xnochipa tekiti ken noneki. Xtlanemili itech tlauijli. Ijkuak itlantika ipilas, xuejkaujtipan kitlauiluis kampa tinejnemij. Noijki ijkon panoua ika totlamachilis, tla xtomachtiaj iTlajtol toTajtsin, xuelis tiktlapejpeniskej tlen kuajli itech tlen xkuajli. Tla tijkauiliaj san tlen kineki toyojlo makijtlako totlamachilis, xok uelis techuikas ipan kuajli ojtli. Niman, tla tiknekij totlamachilis matekiti ken noneki, kipiya ika techpaleuis iespíritu santo toTajtsin. Ken Pablo okijto: “Notlamachilis kiyekana on Espíritu Santo niman ijkon notlamachilis nechmachiltia ika nikijtoua on tlen melauak” (Romanos 9:1). Aman, ¿kenon tikmatiskej tla iespíritu santo Jehová kiyekantika totlamachilis? ¿Kenon uelis tikchiuaskej yejon?
KENON TIKMACHTISKEJ TOTLAMACHILIS
8. a) ¿Kenon uelis toyojlo kijtlakos totlamachilis? ¿Tlenon maka tikilkauaskej ijkuak tiktlapejpeniskej tlen tikchiuaskej? b) ¿Tleka xsan noneki matikmachilikan ika kuajli tikpiyaj totlamachilis? (Xkita nota.)
8 ¿Kenon tiktekitiltiskej totlamachilis ijkuak tiktlapejpeniskej tlen tikchiuaskej? Miyekej kinemiliaj ika kuajli tla tikchiuaj tlen toyojlo kineki. Niman sakin kijtouaj: “Notlamachilis xnechpasoloua”. Maka matikilkauakan ika kemantika ouijtika tikteltiskej tlen kileuiya toyojlo niman yejuin uelis kijtlakos totlamachilis. Ijkon kijtoua Biblia: “Toyojlo melak tekajkayaua xijkon ken itlaj okse, niman teijtlakoua. ¿Akinon uelis kixmatis?” (Jeremías 17:9). Ika yejon, melak kuajli tla san Jehová tikyolpaktiaj niman maka matikchiuakan tlen kineki toyojlo.b
9. ¿Tlenon kijtosneki tikmojkaitas toTajtsin, niman kenon kipaleuiya totlamachilis?
9 Ijkuak itlaj kitlapejpenia kichiuas akin kuajli yokimachti itlamachilis, xsan kinemilia kichiuas tlen yejua kineki. Kichiua pampa kimojkaita toTajtsin iluikakchane. Ijkon nesi itech tlen ipan onochiuj Nehemías. Ken tlanauatijketl itech Jerusalén, Nehemías ueliskia kitlajtlanis matlatlaxtlauakan akin chantiyaj Jerusalén. San ika, xokichiuj. ¿Tleka? San no yejua okijto: “ Niman nejua, xijkon onikchiuj pampa nikmojkaita toTajtsin” (Nehemías 5:15). Xkinekiya kiyolkokoskia Jehová ijkuak kintlajtlaniliskia itekipanojkauan tlen xuelis kitemakaskiaj. Tejuamej noijki melak noneki matikmojkaitakan toTajtsin, pampa yejuin kichiuas matikpouakan Biblia nochipa ijkuak itlaj tiktlapejpeniskej tikchiuaskej.
10, 11. ¿Katlejua tlajtolyekanalistin techpaleuiyaj tikitaskej tla tikoniskej tlen tetlauanti, niman tlen noneki tikchiuaskej tla tiknekij toTajtsin matechpaleui?
10 Xnemili ijkuak techtekiuiltiaj tlen tetlauanti. Kemantika uelis tikixnamikiskej yejuin niman uelis totlajtoltiskej: “¿Nikonis, noso ka?”. Tla tiknekij kuajli tiktlapejpeniskej tlen tikchiuaskej, kachtopa noneki tikmachtiskej totlamachilis makintekitilti tlajtolyekanalistin. Matikilnamikikan ika iTlajtol toTajtsin xkijtoua tla maka matikonikan nion se achijtsin tlen tetlauanti. Ipan Biblia hasta noueyichiua toTajtsin ika okichijchiuj vino (Salmo 104:14, 15). San ika, kema kijtoua ika xkuajli ijkuak se kipanoltilia niman xkuajli timoyolpaktis ipan iluitl pampa melak yotitlauan (Lucas 21:34; Romanos 13:13). Niman hasta kijtoua ika se ueyi tlajtlakojli titlauanis ijkon ken ijkuak se auilnemi (1 Corintios 6:9, 10).c
11 Yejon tlajtolyekanalistin kimachtiaj totlamachilis niman kiyemaniaj. Ijkon, ijkuak kanaj technotsaskej matitlakuatij kampa notemakas tlen tetlauanti, matotlajtoltikan: “¿Kenon yes? ¿Kanaj xkuajli onkisas niman sa xkuajli ken noyolpaktiskej ipan iluitl? ¿Tlenon uelis nikijtos notech? ¿Nikileuiya nitlauanis? ¿Xninemi ika noyojlo tla xnikoni? ¿Noneki nikonis niman ijkon kuajli ninomachilis niman nikchiuas tlen nikneki? ¿Ueli ninoteltia?”. Ijkuak tomachtiskej tlajtolyekanalistin noso ijkuak xtikmatij kenon tikintekitiltiskej, kipiya ika tiknotsaskej Jehová (xpoua Salmo 139:23, 24). Ijkon tikijlitoskej matechyekana ika iespíritu santo, noijki, tikmachtiaj totlamachilis ika kipiya kitlakamatis itlajtolyekanalisuan. Aman, ijkuak itlaj tiktlapejpeniskej tikchiuaskej noijki noneki maka matikilkauakan okse tlemach.
TLEKA TITLANEMILISKEJ ITECH INTLAMACHILIS OKSEKIMEJ
Tla yotikmachtijkej totlamachilis itech tlen kijtoua Biblia, techpaleuis tiknemiliskej tla tikoniskej noso ka
12, 13. ¿Tleka tlamantik noso sesejneka intlamachilis tokniuan, niman tlenon tikchiuaskej ijkuak xijkon tlanemiliaj ken tejuamej?
12 Kemantika uelis techmojkatlachialtis ika tlamantik noso sesejneka intlamachilis tokniuan ipan tlanechikojli. Se tokniuj uelis kinemilis ika xkuajli se tlemach tlen nochiua, niman okse kinemilis ika xnochiujtika se tlajtlakojli. Oksejpa matitlanemilikan ijkuak se koni tlen tetlauanti. Sekimej kuelitaj koniskej achijtsin ijkuak nosentlaliaj imiuan akin kuajli nouikaj; san ika, oksekimej xkuajli kitaj. ¿Tleka ijkon panoua? ¿Tikpatlaskej tlen tiknemiliaj tikchiuaskej san pampa sekimej tlamantik noso sejneka tlanemiliaj?
13 Onka miyek tlen kichiua matitlatlamantikej noso tisesejnekamej. Kemantika techijtlakoua tlen yeuejkaui otikchiujkej. Nemij tokniuan akin kuajli kilnamikij tlenon ika noxixikouayaj niman hasta kemantika ipampa ouetskej (1 Reyes 8:38, 39). Matitlanemilikan ika techuajtlajpaloua se tokniuj akin kuelitaya tlauanis niman ika yejuin noxixikotika. Tla tikijliaj makoni achijtsin, kanaj itlamachilis kijlis maka makoni. ¿Toyolkokoskej? ¿Tikchiualtiskej makiseli? Ka, xtikchiualtiskej. Maski techijliskia tleka xkiselia noso ka, xtikchiualtiskej tokniuj pampa tiktlasojtlaj.
14, 15. ¿Tlen tlauejli onkatka ipan kachtopa siglo pampa tlatlamantik noso sesejneka tlanemiliayaj, niman kenon okiyektlali Pablo?
14 Ipan kachtopa siglo, Pablo okitak ika tlatlamantik noso sesejneka tlanemiliayaj ipan tlanechikoltin. Sekimej, xkuajli tlanemiliayaj itech seki tlakuajli tlen kinuentlaliliayaj tajtsitsintin niman sakin kinemakayaj kampa tlanemakalo (1 Corintios 10:25). San ika, Pablo xtlaj kinemiliaya itech yejuin tlakuajli. Yejua kimatstoya ika tajtsitsintin xtlaj kijtosnekiyaj, yejuin tlakuajli xintlatki katka, pampa nochi ualeua itech Jehová. Maski ijkon, Pablo kasikamatiya ika xnochimej ijkon tlanemiliskiaj. Sekimej kinueyichiuayaj tajtsitsintin ijkuak xinomachtiayaj tlen melauak, ika yejon kitlauelitayaj nochi tlen nouentlaliaya kampa noueyichiuayaj tajtsitsintin. ¿Kenon onoyektlali yejuin?
15 Pablo okijto: “Tejuamej yejuan tikojtikej [...] noneki tikimpaleuiskej ipan impasolol on yejuan xkojtikej [...]. Ma ka, tej, sa no tejuamej ma titopaktikan. Ijkon ma tikchiuakan pampa nion Cristo sa no yejua onopaktij” (Romanos 15:1, 3). Pablo xsan otlanemili itech, otlanemili itech oksekimej ijkon ken okichiuj Jesús. Noijki, Pablo okijto ika xkikuaskia nakatl niman ijkon maka kitlajkalis se itekipanojkauj Jehová, akin hasta okitemakak inemilis iKoneuj ipampa (xpoua 1 Corintios 8:13; 10:23, 24, 31-33).
16. ¿Tleka xkipiya ika tikintejteneuaskej oksekimej akin kichiuaj tlen tejuamej xtikchiuaskiaj?
16 Aman, tla sekimej tokniuan kichiuaj itlaj tlen totlamachilis kajmana, maka matikintejteneuakan, kentla tiknekiskiaj nochimej ijkon matlanemilikan ken tejuamej itech tlen tiktlapejpeniskej tikchiuaskej (xpoua Romanos 14:10). Totlamachilis kipiya ika san tejuamej techitas tla kuajli noso xkuajli tikchiuaj niman xkintejteneuas oksekimej. Maka matikilkauakan ika Jesús okijto: “Ma ka keman xkinmistlakokan oksekimej para ijkon Dios no xmechistlakos” (Mateo 7:1). Tla sekimej ipan tlanechikojli intlamachilis kinkauilia makichiuakan seki tlemach, xkipiya ika onias tlauejli pampa tejuamej xijkon titlanemiliaj. Maka matikchiuakan ika oksekimej mauetsikan topampa, tlen noneki tikchiuaskej, totlasojtlaskej niman tikchiuaskej san sekan matinemikan (Romanos 14:19).
KENON TECHPALEUIYA TLA TIKPIYAJ KUAJLI TOTLAMACHILIS
Tla tikpiyaj kuajli totlamachilis, techyekanas ipan tonemilis niman kichiuas matikpiyakan pakilistli niman yolseuilistli
17. ¿Tlenon yopanok ika intlamachilis miyekej tlaltikpakchanejkej?
17 Pedro, itlatitlankauj Cristo, okijkuilo: “Ma ka xkauilikan nemotlamachilis ma mechtlajtlakolmaka” (1 Pedro 3:16). Tikpiyas chipauak motlamachilis ixpan Jehová se ueyi tlateochiualistli. San ika, xnochimej ijkon kipiyaj intlamachilis. Ken okijto Pablo, “intlamachilis yotepetlatiak niman ijkon xok ueli noyolkokouaj” (1 Timoteo 4:2). Ijkuak kinneskayotiaj yolkamej ika se tepostli melak totonki, tlatla inkuetlaxio niman tla itlaj kichiuiliaj kampa yotlatlak, xok kinkokoua. Noijki ijkon, intlamachilis sekimej xok itlaj kimachilia, kentla miktoskia. Xok kinkokoua. Ika yejon, intlamachilis xok itlaj kimijlia ijkuak kichiuaj itlaj tlen xkuajli; xkinpasoloua, xkintlajtlakoltia nion xkichiua mapinauikan. Yejon tlaltikpakchanejkej nion xok kimatij kemanon tlajtlakouaj niman yejuin nion achijtsin xok kinmajmana.
18, 19. a) ¿Techpaleuis tla totlajtlakoltiaj niman tipinauij itech tlen otikchiujkej? b) ¿Tlenon uelis tikchiuaskej tla totlamachilis ok techtlajtlakoltia maski yotoyolkuepkej?
18 Miyekpa ijkuak itlaj tikchiuaj tlen xkuajli, totlamachilis techijlia pampa peua techtlajtlakoltia. Tla tijkakij totlamachilis niman toyolkuepaj, techtlapopoluiskej, maski melak maueyi totlajtlakol. Ijkon ipan onochiuj tekiuaj David. Yejua okichiuj ueyi tlajtlakojli, san ika, toTajtsin okitlapopolui pampa yemelak onoyolkuep. Hasta okitlauelitak tlen okichiuj niman okinemili nochipa kintlakamatis itlanauatiluan toTajtsin; yejua okitak ika Jehová “yolkuajli, niman nimantsin tetlapopoluiya” (Salmo 51:1-19; 86:5). Aman, kemantika ok tikmachiliskej ika tikpiyaj tlajtlakojli niman tikilnamikiskej tlen otikchiujkej maski yotoyolkuepkej itech tlen yotikchiujkej. Tla ijkon panoua, ¿tlenon uelis tikchiuaskej?
19 Tla yotoyolkuepkej, xtlaj ika tepaleui tla totlamachilis ok techtlajtlakoltia. Tla toyojlo ok ijkon kimachilia, noneki tiktlaneltokiltiskej ika Jehová melak ueyixtika xijkon ken tlen tejuamej tikmachiliaj. Ijkuak ijkon panos, noneki tikchiuaskej tlen tejuamej yotikimijlikaj oksekimej: “Xkilnamiki ika Jehová mitstlasojtla niman xneltoka ika yomitstlapopolui” (xpoua 1 Juan 3:19, 20). Ijkuak totlamachilis techtlapopoluis, tipakiskej niman tikpiyaskej yolseuilistli, itlaj tlen xkipiyaj akin xkitekichiuiliaj toTajtsin. Miyekej akin okichiujkej ueyi tlajtlakojli ijkon nomachiliaj, niman aman kitekichiuiliaj Jehová ika chipauak intlamachilis (1 Corintios 6:11).
20, 21. a) ¿Kenon mitspaleuis yejuin amoxtli? b) ¿Tlenon yokinmakakej akin kichiuaj ken Cristo, niman kenon noneki makitekitiltikan?
20 Ijkuak onochijchiuj yejuin amoxtli, ononemili kenon uelis techpaleuis matipakikan niman matikpiyakan chipauak totlamachilis ipan yejuin itlamiyan tonaltin kampa tikixnamikij nochi tlen Satanás kiyekana. San ika, yejuin amoxtli xtechtomilia nochi tlanauatiltin niman tlajtolyekanalistin tlen tikintekitiltiskej ipan nochi tonemilis. Noijki, ijkuak noneki tiktekitiltiskej totlamachilis, xtechmelajkaijlia tlenon tikchiuaskej itech tlen tikixnamikij. Nikan techijlia kenon uelis tikchiuaskej tlen yotomachtijkej ipan iTlajtol toTajtsin niman ijkon uelis tikmachtiskej niman tikyemaniskej totlamachilis. Matikilnamikikan ika ipan Tlanauatijli tlen okimakakej Moisés kinmelajkaijliayaj tlen nonekiya kichiuaskej, niman itech “tlen Cristo technauatia” techijlia matiktekitiltikan totlamachilis niman matoyekanakan ika tlajtolyekanalistin (Gálatas 6:2). Kema, Jehová techkauilia tejuamej matiktlapejpenikan tlen tiknekij tikchiuaskej. San ika, Biblia techijlia maka matiktekitiltikan yejuin ika matikchiuakan “on tlen xkuajli”, noneki ika yejuin matikteititikan kenon melak tiktlasojtlaj Jehová (1 Pedro 2:16).
21 Ijkuak opeuj tikixmati Jehová, opeuj tinejnemi ipan ojtli tlen teuika itech nemilistli. Xkijli toTajtsin ika se teoyotl mamitspaleui xkita kenon uelis timoyekanas ika tlajtolyekanalistin, niman sakin, xchiua. Tla ijkon panoua, timomachtijtos tikitas tlen kuajli itech tlen xkuajli, tlen opeuj tikchiua ijkuak kemach otikixmat Jehová (Hebreos 5:14, TNM). Tla motlamachilis kuajli yotikmachti ika tlajtolyekanalistin, melak mitspaleuis. Ijkon ken se tlauijli kitlauiluiya ojtli kampa tinejnemi, motlamachilis mitsijlis kanon tias niman kichiuas xyolpakti moTajtsin iluikakchane ijkuak tiktlapejpenis tikchiuas tlen yejua kuelita. Niman, noijki, mitspaleuis nochipa tinemis itech itlasojtlalis toTajtsin.
a Ipan Tlajkuiloltin ika hebreo, xonka se tlajtojli ijkuak tlajtoua itech “totlamachilis”. San ika, itech tlen yotikitakej kuajli nesi ika kema yejon kijtosneki. Maski tlajtojli toyojlo kijtosneki nochi tlen tikpiyaj tlaijtik, ipan yejuin tlaxeloltin kuajli nesi ika tlajtouaj itech totlamachilis. Ipan Tlajkuiloltin ika griego kema uajnestiuj tlajtojli “tlamachilis” melak miyekpa.
b Xtlanemili itech tlen Pablo okijto: “Notlamachilis xnechtlajtlakolmaka. Pero yejua in xkijtosneki ika xnikpia tlajtlakojli. ToTeko yejua nechtlajtlakolmakas tla nikpia tlajtlakojli” (1 Corintios 4:4). Kuakon, xnochipa kijtosneki ika tikpiyaj chipauak totlamachilis ijkuak tikmachiliaj ika kuajli tinemij. Sekimej kintlaueltokaj akin kichiuaj ken Cristo, ken yeuejkaui okichiuj Pablo, niman kimachiliaj ika kuajli kipiyaj intlamachilis pampa kinemiliaj kichiujtokej tlen toTajtsin kineki. Kuakon, tlen melak noneki, matikpiyakan chipauak totlamachilis ixpan toTajtsin (Hechos 23:1; 2 Timoteo 1:3).
c Miyekej tlapajtikej kijtouaj ika akin san tlauantinemij xuelij san kitemachiuaj kech koniskej, ika yejon, noneki maka makonikan nion achijtsin.