Job xkikaua toTajtsin

¿UELISKEJ itekipanojkauan toTajtsin yolmelaujkanemiskej ijkuak kixnamikiskej tlen melak xkuajli, maski nesiskia ika xkiminpaleuiya makixikotokan? Se tlakatl itoka Job ijkon ipan onochiuj. Matikitakan kenon okisato.

Job ken kitaya Abrahán. Chantiya kampa aman noixmati kentla Arabia ipan tonaltin ijkuak israelitas chantiyaj Egipto. Se tonajli, Jehová okiminsentlali iiluikaktekitkauan, Satanás noijki ompa imiuan onosentlali. Imixpan, Jehová kuajli otlajto itech Job niman okijto ika xakaj ijkon yolmelauak katka ken Job. San ika, Satanás okijto ika Job kitekichiuiliaya toTajtsin pampa nochi kimakaya niman xkikauiliaya itlaj ipan manochiua. Okijto ika tla kipoloskia nochi, kikauaskia Jehová.

ToTajtsin okikauili Satanás makikixtili Job nochi tlen kipiaya, okimimiktili ikoneuan niman okichiuj makasi se kokolistli. Pampa Job xkimatiya ika Satanás kichiuilijtoya nochi yejon, xkasikamatiya tleka toTajtsin kikauiliaya ijkon ipan manochiua. Maski ijkon, yejua xkeman okitlalkaui Jehová.

Kuakon okitakoj Job yeyimej akin kimixmatiyaj kentla akin imiuan nouikaya niman opeujkej miyek tlemach kijliaj. Ipan amoxtli Job tlen onka ipan Biblia tentika ika intlajtoluan, nesi kenon kitlaneltokiltisnekiyaj ika toTajtsin kitlajyouiltijtoya pampa kimiyantoya itlajtlakoluan. Okijtokej ika toTajtsin xkajmana nion achijtsin tlenon iminpan nochiua itekipanojkauan niman nion xkimineltoka tla ueliskej kitlakamatiskej. Job xokinkakisnek intlanemililuan xkuakualtin niman okimijli ika xkeman kikauas toTajtsin maski mamiki.

Job onopopolo pampa san kinemiliaya kenon kiteititis ika xtlaj okichiuj. Elihú, akin nochi kikaktoya, okiyektlalili itlanemilil pampa Job najmantoya tlen oksekimej uelis kijtoskej itech niman xkajmanaya tlenon kijtoskiaj itech itokatsin Jehová niman itech kenon tlayekanaya. Noijki okimajuak akin iuan nouikaya Job.

Jehová noijki okiyektlalili itlanemilil Job. Ika nochi tlen kualtsin okichijchiuj toTajtsin okititi ika se tlakatl san kentla tlalpoktli ijkuak notemachiua iuan iUeyilis. Job okikak tlen okijlikej. Niman Jehová akin “teikneliani” okipajti niman okiteochiuj, okimakak okpatipan tlen kipiaya niman okseki majtlaktli ikoneuan (Santiago 5:11). Ika iyolmelaujkanemilis, okinankili Satanás niman oteititi ika tlaltikpakchanejkej, maski san tlenon kixnamikiskej, kema uelis nemiskej iuan toTajtsin niman xkeman kikauaskej.

(Onokixti itech amoxtli Job.)