ToTajtsin kiminmakixtia israelitas

MIYEK xiujtin opanokej ijkuak israelitas okipixkej miyek tlemach niman melak yonomiyekilijkaj. Kuakon opeuj tlanauatia okse faraón, akin melak tetlajyouiltiaya niman xkixmatiya José. Pampa israelitas melak miyekej katkaj, otlanauati makintekitiltikan kentla itlakeualuan niman makiminamimiktikan ipan atentli Nilo nochimej akin tlakakonetsitsintin uajtlakatiskiaj. Aman, se siuatl akin xnomojtiaya okitlali ikonetsin ipan se chikijtli niman okiyan itempan atentli kampa tlaxiujyo. Ichpoch faraón okinexti, okitokayoti Moisés niman okiskalti itech akin uejueyixtokej ipan Egipto.

Ijkuak kipiaya 40 xiujtin, Moisés onokalakti ipan tlauejli pampa okipaleui se israelita ijkuak se egipcio kitlajyouiltijtoya, kuakon ocholoj uejka ipan okse kalpan. Ijkuak kipiaya 80 xiujtin, toTajtsin okinauati manokuepa Egipto niman makijli faraón makinkauili makisakan israelitas.

Pampa faraón xokinek, toTajtsin okititlanili majtlaktli tlajyouilistin. Ijkuak xikonmintitlaniliaya tlajyouilistin, Moisés nochipa yaya itech faraón niman ijkon kikauiliaya makitlapejpeni maka manochiua. San ika, yejua nochipa noueyimatiya niman kixnamikiya Moisés niman Jehová. Ipan tlajyouilistli majtlaktli tlen okititlan toTajtsin, okinauati se iluikaktekitketl makiminmikti nochimej tekoneuan akin kachtopa otlakatikoj ipan yejon país. San akin okitlakamatkej Jehová niman okixauilijkej iyeualiyan puertas ika iyesyo borreguito, xokiminmiktili inkoneuj. Israelitas opeujkej kipanoltiaj Pascua niman ijkon kilnamikiyaj tlen opanok.

Sakin ijkuak omik ikoneuj faraón akin kachtopa otlakat, yejua okinauati Moisés niman israelitas, makisakan itech Egipto. Nimantsin opeujkej nosentlaliaj niman okiskej. San ika, faraón okipatlak itlanemilil niman oyaj iuan isoldados niman icarros de guerra. Ijkuak oajsikej itech mar Rojo, nesiya ika israelitas xok kipiayaj kanika yaskiaj. Jehová okitlajkoxelo mar, niman atl onajkok kentla tepantin niman itlajkotian onejnenkej ipan tlajli uajki. Ijkuak egipcios kinekiyaj kominajsiskej, toTajtsin okichiuj iminpan matoyauiki niman ijkon oamimijkej faraón iuan isoldados.

Ijkuak israelitas oajsikej itech tepetl Sinaí, Jehová imiuan onotlajtolkauj. Okitekitilti Moisés kentla akin inpampa tlajtouaya, niman okiminmakak tlanauatiltin tlen kiminyekanaskia niman kintlajpiyaskia ipan iminemilis. Tla yejuamej tetlakamatiskiaj niman yolmelaujkanemiskiaj, toTajtsin imiuan nemiskia niman inpampa kinteochiuaskia oksekimej uejueyimej kalpamej.

San ika, melak miyekej israelitas okiteititijkej ika xtlaneltokayaj itech. Ika yejon, toTajtsin okichiuj makistinemikan ipan tlaluaktli cuarenta xiujtin. Kuakon, oajsik tonajli ijkuak kitekipatlaskiaj Moisés niman okijli Josué se israelita yolmelauak ika yejua yeskia. Aman, oyejkok tonajli ijkuak israelitas notlatkitiskiaj tlaltin tlen toTajtsin yokijlika Abrahán kimakas.

(Onokixti itech Éxodo, Levítico, Números, Deuteronomio, Salmo 136: 10-15 niman Hechos 7:17-36.)