David xonomojti

¿Tlenon tikchiua ijkuak timomojtia?... Kanaj tiktlajtlanilia monanaj noso motataj mamitspaleui. San ika, nemi se akin noijki uelis mitspaleuis. Xakaj kipiya kojtilistli ken yejua. ¿Tikmatstika akinon?... Kema, toTajtsin Jehová. Aman matikitakan itech se telpochtli tlen ipan Biblia kitokayotia David. Yejua kimatstoya ika Jehová nochipa kipaleuiskia, ika yejon, xnomojtiaya ijkuak kixnamikiya itlaj.

Ijkuak David pitentsin katka, itajuan okititijkej makitlasojtla Jehová. Yejuin melak okipaleui maka manomojti maski kemantika kixnamikiya itlaj tlen melak xkuajli. Yejua kimatstoya ika Jehová xkeman kikauaskia, nochipa kipaleuiskia. Se tonajli, ijkuak David kintlajpixtoya iborregos, ¡se ueyi león ouajla niman okajsik se iborrego ika ikamak! ¿Tikmatis tlenon okichiuj David? Okajsito yejon león, niman uelis tiknemiliskej ika okimikti ika imauan. Niman ijkuak se oso kinekiya kinkuaskia iborregos, David noijki okimikti. ¿Akinon okipaleui David maka manomojti?... Kema, Jehová okipaleui.

Matikitakan ijkuak David oksejpa okiteititi ika xonomojti. Se tonajli israelitas noixnamiktoyaj iuan filisteos. Se soldado akin itoka Goliat, melak uejkapan katka, ¡xnemiya okse tlakatl akin ijkon ken yejua uejkapan! Goliat san kinuejuetskiliaya israelitas niman kipijpinaujtijtoya Jehová. Goliat kintsajtsiliaya israelitas niman kimijliaya: “¡Nikneki nikitas akinon kinekis nechixnamikis!”. San ika, nochimej israelitas melak nomojtiayaj kixnamikiskej. Ijkuak David okikak, okijli: “¡Nejua nimitsixnamikis! Jehová nechpaleuis, niman nimitstlanis”. ¿Xmelak ika David okiteititi ika yolchikauak katka pampa xonomojti?... Kema, yejua xonomojti. ¿Tikneki tikmatis tlenon opanok sakin?

David okontilan makuijli tetl tlen pestik niman imatematlauj, niman oyaj okixnamikito. Ijkuak Goliat okitak ika David katka se telpochkonetl, yejua san ouetskak. Kuakon David okijli: “Tejua tikuajkui se espada tlen ika tinechixnamikis, san ika, ¡nejua nimitsixnamikis ika itoka Jehová!”. Kuakon David onotlalo okinisiuito Goliat. Sakin okitlali se tetl ipan imatematlauj niman okimotlak. Tetl okalak ipan ixkuateuj, ¡Goliat ouets niman omik! Ijkuak filisteos okitakej tlen opanok, melak onomojtijkej niman ocholojkej. ¡David okitlan yejon uejkapan tlakatl Goliat! ¿Akinon tiknemilia okipaleui makitlani?... Kema, Jehová okipaleui, ¡Jehová melak kojtik xijkon ken yejon uejkapan tlakatl!

¿Tlenon techmachtia tlen ipan onochiuj David?... Ika xnemi okse akin melak kojtik ken Jehová. Ika yejon, tla kemantika timomojtia, xkilnamiki yejuin: Jehová nochipa mouan nemis niman xkeman mitskauas, mitspaleuis maka xmomojti.