Jeremías xokikajkauj tlajtoua itech Jehová

Tlaltikpakchanejkej kemantika techpijpinaujtiaj noso kualanij ijkuak tikinnojnotsaj itech Jehová. Yejuin uelis kichiuas matijkajkauakan matitenojnotsakan itech toTajtsin. ¿Kemantika ijkon yotimomachili?... Biblia kiteneua se telpochtli akin okitlasojtlak Jehová, san ika, ikikajkaujtoya tenojnotsas itech yejua. Itoka Jeremías. Matikitakan tlenon ipan onochiuj.

Ijkuak Jeremías katka telpochtli, Jehová okinauati ika makimijli tlaltikpakchanejkej maka sa makichiuakan tlemach tlen xkuajli. Jeremías kimachiliaya ika xueliskia kichiuaskia, melak onomojti. Niman okijli Jehová: “Nejua ok nitelpochtli. Xnikmati kenon nitlajtos”. Jehová okinankili: “Maka xmomojti. Nejua nimitspaleuis”.

Kuakon Jeremías opeuj kimijlia tlaltikpakchanejkej ika toTajtsin kintlajtlakolmakaskia tla xkipatlayaj innemilis. ¿Tiknemilia ika tlaltikpakchanejkej okikakej tlen okimijli Jeremías?... Ka. Sekimej opeujkej kipijpinaujtiaj niman oksekimej melak okitlauelitakej. ¡Onenkej akin kinekiyaj kinmiktiskej! ¿Kenon tiknemilia onomachili Jeremías?... Melak onomojti niman okijto: “Xok nikneki oksejpa nitlajtos itech Jehová”. ¿Yemelak ijkon okichiuj?... Ka, yejua xokikajkauj tlajtoua itech Jehová pampa melak kitlasojtlaya. Pampa ijkon okichiuj, Jehová okipaleui itech akin kitlauelitayaj.

Se tonajli, sekimej xkuakualtin tlakamej okontlajkalkej Jeremías ijtik pozo tlen kipiaya sokitl. Xotlakua nion xoatlik. Yejon tlakamej kinekiyaj kikauaskiaj ompa mamiki. San ika, ¡Jehová okipaleui macholo itech yejon xkuakualtin tlakamej!

¿Tlenon tiuelij itech tlen ipan onochiuj Jeremías?... Ika maski kemantika onomojti, xokikajkauj tlajtoua itech Jehová. Kemantika ijkuak tejua titlajtos itech Jehová, nemiskej akin mitspijpinaujtiskej noso mitstlauelitaskej. Kanaj uelis tipinauis noso uelis timomojtis, san ika, maka keman tijkajkauas titenojnotsas itech Jehová. Yejua nochipa mitspaleuis, ijkon ken okipaleui Jeremías.