Tlenon nopatla ijkuak uajnemi se konetsintli

Ijkuak uajtlakati se konetsintli, tajtin melak pakij, san ika, aman kipiyaskej miyek tekitl. Akin yenkuikej tajtin uelis kimojkaitaskej ika uejkaujtipan noneki kitlajpiyaskej inkonetsin. Pampa xok noseuiyaj niman nopatla tlen kimachiliaj, kanaj ouijtika ken nouikaskej. Ika yejon, noneki itlaj kichiuaskej niman ijkon uelis kitlajpiyaskej inkonetsin niman innamiktilis. ¿Kenon uelis tlajtolpaleuilistin tlen uajlauej ipan Biblia kinpaleuis kixnamikiskej yejuin tlen ouijtika?

1 XKASIKAMATI KENON SE KONETSINTLI KIPATLA NEMONEMILIS

TLEN BIBLIA KIJTOUA: “On yejuan tetlajsojtla kimijyouia oksekimej niman yolyemanki [...] xkitejtemoua on tlen kuajli san para yejua. On yejuan tetlajsojtla xsan kuajkualani” (1 Corintios 13:​4, 5). Pampa kachtopa ikoneuj, nasikamati tleka siuatl aman najmana san itech ikonetsin. San ika, yejon uelis kichiuas ika iueuentsin manomachili kentla yokitlalkauijkej. Kuakon, maka xkilkaua ika moueuentsin noijki noneki ipampa timajmanas. Ika yolik niman ika tlasojtlalistli, uelis tikititis ika tikneki mamitspaleui niman tiktlasojkaita pampa mitspaleuiya kitlajpiya nemokonetsin.

“Tlakamej, xmotenkakikan kuajli [noso xnemikan ika tlaixmatilistli, TNM] inuan nemosiuauan.” (1 Pedro 3:7.) Tla tejua yenkuik titajtli, xkasikamati ika aman mosiuauj melak nochikauas iuan nemis nemokonetsin, niman kemantika ajmankamikis, siauis noso hasta notekipachos pampa aman kipiya okseki tekitl. Kemantika uelis mouan kualanis, san ika, noneki xkijyoui, pampa “melak kuajli akin xnimantsin kualani xijkon ken se tlakatl kojtik” (Proverbios 16:​32). Xkasikamati niman xpaleui itech tlen kipoloua (Proverbios 14:​29).

TLEN UELIS TIKCHIUAS:

• Tla titajtli: Xpaleui mosiuauj xtlajpiyakan nemokonetsin, maski ika yeuajli. Itech tlen tikchiua, nonekis maka sa tiuejkauis pampa aman melak noneki uejkaujtipan tinemis iuan mosiuauj niman mokoneuj

• Tla tinantli: Ijkuak moueuentsin kinekis mitspaleuis kitlajpiyas nemokonetsin, xkauili mamitspaleui. Tla xkuajli kichiua, maka xkixkoijli, xmachti ika tlasojtlalistli kenon kichiuas

2 XCHIKAUA KEN NEMOUIKAJ

TLEN BIBLIA KIJTOUA: “Nochiuaskej san se tlalnakayotl” (Génesis 2:​24). Maski aman inenkipiyaj nemokonetsin, maka xkilkaua ika tejua iuan moixnamik ok “san se tlalnakayotl”. Melak xmochikaua niman maka xkauili mayemania ken nemouikaj.

Tesiuauj, xtlasojkamati ika moueuentsin mitspaleuiya. Tlajtojli tlen ika titetlasojkamachilis “tepajtiaj” (Proverbios 12:​18). Teueuentsin, xkijli mosiuauj ika melak tiktlasojtla, tikpatiojkaita niman ika melak tiktlasojkaita nochi tlen kichiua ipampa mochanejkauan (Proverbios 31:​10, 28).

“Ma ka [ma]kitejtemo on tlen kuajli san para yejua, yej ma kitejtemo on tlen kuajli para oksekimej.” (1 Corintios 10:​24.) Nochipa xchiua tlen melak kuajli ipampa moixnamik niman xkijli tlen kuajli kichiua. Xtejtemokan kemanon nentlajtoskej niman uelis nemokakiskej. Ijkuak tiknekis timotekas iuan moixnamik noso yejua kinekis mouan notekas, maka san motech xtlanemili. Maka xkilkaua kenon nomachilia moixnamik. Biblia tlanauatia: “Ma ka xmonenekikan nennemiskej ken nemij [akin] yononamiktijkej” (1 Corintios 7:​3-5). Kuakon, kuajli xtlajtokan itech yejuin. Tla nemijyouiyaj niman nemasikamatij, chikauis nemonamiktilis.

TLEN UELIS TIKCHIUAS:

• Maka xkilkaua tiktejtemos tinemis san moselti iuan moixnamik

• Xmoititikan ika nemotlasojtlaj maski san ika itlaj tlen pitentsin, xtlajkuilouili noso itlaj xtlayokoli

3 XMACHTI MOKONETSIN

TLEN BIBLIA KIJTOUA: “Niman desde tikonetl katka tikixmati on iYektlajkuilol Dios yejuan uelis mitstlamachilistis niman mitsuikas itech on temakixtilistli” (2 Timoteo 3:15). Xnemili kenon tikmachtis mokoneuj. Xkilnamiki ika yejua uelis miyek nomachtis maski xitlakati. Ijkuak ok nemi ijtik inan, ueli mitstenkaki niman kijtlakoua tlen tikmachilia. Xnemachtikan xpouilikan amatlajkuiloltin, maski xikasikamati tlajtoltin, uelis kipaleuis kuelitas amapouas tla yonoskalti.

Maka xnemili ika pampa mokonetsin melak pitentsin xuelis tiknojnotsas itech toTajtsin. Mamitskaki ika tikchiuilia teoyotl Jehová (Deuteronomio 11:​19). Ijkuak iuan timauiltis, xnojnotsa itech tlen toTajtsin yokichijchiuj (Salmo 78:​3, 4). Ijkuak mokoneuj noskaltijtias, kitas ika tejua melak tiktlasojtla Jehová niman yejua noijki ijkon kitlasojtlas.

TLEN UELIS TIKCHIUAS:

• Xtlajtlanili toTajtsin tlamachilistli tlen ika tikmachtis mokoneuj

• Miyekpa xkijli tlen tikneki makimati, san ijkon nimantsin peuas kasikamatis