PARTE 3
Tlen techyolkokoua: Ijkuak “yakaj [tech]tlauelkuitia”
“Se tokniuj siuatl ipan notlanechikol okijto ika onikichtekili itomin. Ijkuak ipan tlanechikojli okimatkej yejuin, sekimej okineltokakej niman oksekimej ka. Opanokej tonaltin, tokniuj okimat ika xmelauak onikichtekilijka itomin. Kuakon onechtlajtlanili maniktlapopolui, san ika, ipan noyojlo onikmachili ika xkeman ueliskia niktlapopoluis itech tlen onexchiuili.” (Linda)
¿KANAJ noijki ijkon timomachilia ken Linda? Yejua melak onoyolkoko itech tlen okichiuili se tokniuj. Teajman pampa sekimej yokimijtlako tlen oksekimej tokniuan yokichiujkej, niman yoyemaniak intlaneltokil. ¿Ijkon mopan yonochiuj tejua?
¿Yakaj “uelis techxelos itech itetlajsojtlalis” toTajtsin?
Tikmatstokej ika ijkuak se tokniuj techyolkokoua, melak ouijtika tikitaj tiktlapopoluiskej. Yejuin ijkon panoua pampa tikmatij ika akin kichiuaj ken Cristo noneki notlasojtlaskej (Juan 13:34, 35). Ika yejon, ijkuak se tokniuj ipan tlanechikojli techyolkokoua, melak techijtlakoua (Salmo 55:12).
Kema, Biblia kijtoua ika kemantika se akin kichiua ken Cristo uelis techtlauelkuitis (Colosenses 3:13). Ijkuak tejuamej ijkon topan nochiua, uelis tikitaskej ika melak ouijtika tikixnamikiskej yejon. ¿Onka itlaj tlen uelis techpaleuis? Kema, matikitakan yeyi tlajtolyekanalistin itech Biblia.
ToTajtsin iluikakchane nochi kitstika. Jehová kita nochi tlen panoua, ken ijkuak texchiuiliaj itlaj tlen xkuajli niman titlajyouiyaj (Hebreos 4:13). Niman xsan yejon, yejua kimachilia tlen techyolkokoua (Isaías 63:9). Yejua xkikauilia “tlen teajman, noso on tlen teyolkoko” noso okse tlemach, nion se itekipanojkauj, matechxelo “itech on itetlajsojtlalis” (Romanos 8:35, 38, 39). Ijkon ken yejua kichiua, tejuamej maka matijkauilikan itlaj noso yakaj matechxelo itech itlasojtlalis Jehová.
Titetlapopoluiskej xkijtosneki tla tikitaj kuajli tlen panoua. Ijkuak tiktlapopoluiyaj akin otexchiuili tlen xkuajli, xkijtosneki tla xtikitaj tlen otexchiuili noso tikseliaj tlen xkuajli kichiua. Xkilnamiki, Jehová xkeman kiselia tlajtlakojli, san ika, yejua tetlapopoluiya ijkuak ijkon noneki kichiuas (Salmo 103:12, 13; Habacuc 1:13). Ijkuak techijlia ika matikintlapopoluikan oksekimej, kineki noijki ijkon matikchiuakan ken kichiua. Yejua xnochipa kualantika (Salmo 103:9; Mateo 6:14).
Ijkuak tijkauiliaj mapano tlauejli, tejuamej topaleuiyaj. ¿Tleka? Xkonemili ika timomamelaujtika niman tikteketstika se tetl tlen kanaj se kilo ika yetik. Xtlaj tlenon tla xuejkaujtipan tikteketstos. San ika ¿uelis tikxikos uejkaujtipan? Tla tikteketstika ijkon itech seki minutos, se hora noso uejkaujtipan, timasiauis. Ken ika yetik yejon tetl xnopatla. San ika, ijkuak uejkaujtipan panoua ika tikteketstika, tikmachilis kentla melak yetiya yejon tetl. Noijki ijkon panoua ika tlauejli. Tla uejkaujtipan tikualantokej, maski san ipampa itlaj tlen xueyi, melak techijtlakos. Ika yejon, Jehová techijlia matikpanoltikan tlauejli, pampa ijkon melak kuajli tomachiliskej (Proverbios 11:17).
Ijkuak tijkauiliaj mapano tlauejli, tejuamej topaleuiyaj
“Onikmachili kentla Jehová nechnotstoya”
¿Tlenon okipaleui Linda makipanolti tlauejli tlen okipix iuan se tokniuj akin okichiuilijka tlen xkuajli? Se, otlanemili tleka kijtoua Biblia ika noneki matitetlapopoluikan (Salmo 130:3, 4). Linda okiyolmapeuj matetlapopolui ijkuak okimat ika Jehová noijki techtlapopoluis tla tikintlapopoluiyaj oksekimej (Efesios 4:32–5:2). Itech tlen okimachili, yejua okijto: “Onikmachili kentla Jehová nechnotstoya”.
Ika tlayekapan, Linda ouel okipanolti tlen kimachiliaya. Okitlapopolui tokniuj niman aman melak kuajli iuan nouika. Linda ok melak kuajli kitekichiuilia Jehová. Kuajli tikmatstokej ika Jehová kineki mitspaleuis tejua noijki ijkon xchiua.