Josué niman gabaonitas

Oksekimej iueyikalpanuan Canaán okimatkej tlen ipan onochiuj Jericó. Intekiuajkej onosentlalijkej pampa kimixnamikiskiaj israelitas. San ika, gabaonitas xijkon okichiujkej. Okakijkej tlakensosojli, oyajkej kampa Josué niman okijlikej: “Tejuamej melak uejka tiualeuaj. Otiktekakilijkej itech Jehová niman itech tlen okichiuj nemopampa ipan Egipto niman Moab. Xtechijlikan ika xnentechixnamikiskej niman tochiuaskej nemotlakeualuan”.

Josué okinneltokak niman okimijli ika xkimixnamikiskiaj. Ijkuak yopanoka yeyi tonajli, okimat ika gabaonitas nisiuj chantiyaj. Yejuamej ualeuayaj Canaán. Josué okintlajtolti: “¿Tleka onentechkajkayaujkej?”. Yejuamej okinankilijkej: “¡Otomojtikej! Tikmatstokej ika Jehová nemoTajtsin tlaixnamiki nemopampa. Timechtlajtlaniliaj maka nintechmiktiskej”. Josué okichiuj ken okimijli niman xokinmikti.

Xuejkaujtipan, makuiltin tekiuajkej cananeos niman insoldados okimixnamikitoj gabaonitas. Josué niman isoldados onejnenkej nochi yeuajli, ijkon kinmakixtiskiaj. Uajmostla ika kualkan opeuj noixnamikij. Cananeos ocholojkej. Yejuamej nochiuiyan notlalouayaj, san ika, Jehová okichiuj inpan mauetsiki uejueyi tesiujtli. Kuakon Josué okitlajtlanili Jehová makichiua ika tonaltsintli manotelti. Tonaltsintli xkeman noteltiaya, ¿tleka Josué okitlajtlanili yejon? Pampa otlaneltokak itech Jehová. Tonaltsintli xokalak nochi yejon tonajli hasta ijkuak israelitas okintlankej tekiuajkej cananeos niman insoldados.