Gedeón okintlan madianitas

Sakin israelitas oksejpa okitlalkauijkej Jehová niman opeuj kinueyichiuaj tajtsitsintin. Ipan chikome xiuitl, madianitas okimichtekilijkej inyolkauan israelitas niman okimijtlakouilijkej tlen kitokayaj. Pampa kinekiyaj notlajpiyaskej intech madianitas, oniyankej ipan teostomej niman ipan tepemej. Okitlajtlanilijkej Jehová makinmakixti. Yejua ika, Jehová okititlan iiluikaktekitkauj itech se tlakatl akin itoka katka Gedeón. Iluikaktekitketl okijli: “Jehová yomitstlapejpeni xmochiua se kojtik tlaixnamijketl”. Gedeón okitlajtolti: “¿Kenon uelis nikmakixtis Israel ijkuak xniueyixtok?”.

¿Kenon kimatiskia Gedeón ika Jehová yokitlapejpenijka? Okitlali itsojmiyo borrego ipan tlajli niman okijli Jehová: “Tla ika kualkan, ajuaxtli kipatsoua itsojmiyo borrego, san ika, tlajli xpatsiui, kuakon nikmatis ika tikneki manikmakixti Israel”. Uajmostla, ¡itsojmiyo borrego opatsiuj, san ika, tlajli xopatsiuj! Ijkuakon Gedeón okitlajtlan ika uajmostla yejon tsojmitl maka mapatsiui niman tlajli kema. Ijkuak ijkin opanok, yejua okineltokak ika Jehová yokitlapejpenijka. Okinsentlali isoldados niman ijkon konmixnamikiskiaj madianitas.

Jehová okijli Gedeón: “Nikinpaleuis israelitas matetlanikan. San ika, pampa melak miyekej soldados, ueliskej kinemiliskej ika san inselti otetlankej. Kuakon xkimijli nochimej akin nomojtiaj manokuepakan inchan”. Ika yejon, 22,000 soldados oyajkej niman san 10,000 onokaujkej. Sakin Jehová okijli: “Ok miyekej soldados. Xkinuika ipan atentli niman xkimijli maatlikan. San xkintlapejpeni akin tlatlachixtokej ijkuak atlij niman kitaj tla xuajlauej nemotlauelikniuan”. San 300 tlakamej tlatlachixtoyaj ijkuak atliyaj. Jehová okijto ika san yejon achijtsitsintin tlakamej kintlaniskiaj 135,000 soldados madianitas.

Ipan yejon yeuajli, Jehová okijli Gedeón: “Aman iuelis nenkixnamikiskej madianitas”. Gedeón okinmakak tlakamej kuakoujtin niman uejueyimej kontin, ijtik kontin kipiayaj se tlitl tlen ika tlauiloskiaj. Yejua okimijli: “Xnechitakan niman noijki ijkon xchiuakan”. Gedeón okipits kuakoujtli tlen kipiaya, okitlapan kontli, opeuj kiuiyonia tlitl tlen kitkiya niman otsajtsik: “¡Iespada Jehová niman Gedeón!”. 300 tlakamej noijki ijkon okichiujkej. Madianitas melak onomojtijkej niman opeuj nochiuiyan notlalouaj. Pampa xkimatiyaj tlenon kichiuaskej san yejuamej opeuj noixnamikij. Jehová oksejpa okinpaleui israelitas makintlanikan intlauelikniuan.