Se teopan tlen okichijchiuilijkej Jehová

Ijkuak Salomón opeuj tekiuajti ipan Israel, Jehová okitlajtolti: “¿Tlenon tiknekiskia manimitsmaka?”. Salomón okinankili: “Nejua san nitelpochtli niman xnikmati tlenon noneki nikchiuas. Nimitstlajtlanilia xnechmaka tlamachilistli, ijkon kuajli niktlajpiyas kalpan”. Jehová okijli: “Pampa otiktlajtlan tlamachilistli, nikchiuas xpiya tlamachilistli ken xakaj kipiya. Noijki nimitsmakas miyek tomin. Niman tla tinechtlakamati, uejkaujtipan tinemis”.

Salomón opeuj kichijchiua teopan. Yejua okitekitilti tlen melak kuajli oro, plata, madera niman temej. Miyekej tlamachilisejkej tlakamej niman siuamej otekitkej ipan yejuin teopan. Teopan ouejkauj kichijchiuaj chikome xiuitl. Pampa yoajsika tonajli ijkuak kimaktiliskiaj Jehová, otlauentlalijkej ipan tlaixpan. Salomón onotlakuankets ixpan niman ipan iteoyouj okijto: “Jehová mitsmelaua tikpiyas se teopan melak ueyi niman melak kualtsin xijkon ken yejuin. San ika, nimitstlajtlanilia xseli matimitsueyichiuakan niman xkaki toteoyouan”. ¿Tlenon okinemili Jehová itech teopan niman iteoyouj Salomón? Nimantsin ijkuak Salomón otlan iteoyouj, tlitl ouajtemok itech iluikak niman okitlati uentli tlen onkatka ipan tlaixpan. Ijkon Jehová okiteititi ika kiseliaya teopan. Ijkuak israelitas okitakej yejuin, melak opajkej.

Tekiuaj Salomón okixmatkej ika melak tlamachilise ipan Israel niman nochiuiyan. Miyekej konitayaj makinpaleui ika intlaueluan. Hasta se siuatl akin tekiuaj katka ipan Seba oyaj itech, okitlatlatak ika ouijtika tlajtoltilistin. Ijkuak okikak itlanankilisuan, okijto: “Xnikneltokaya tlen oksekimej kijtouayaj motech, san ika, aman nikita ika melak titlamachilise xijkon ken kijtouayaj. MoTajtsin Jehová yomitsteochiuj”. Israelitas melak pakiyaj niman kuajli nemiyaj. San ika, yejuin nopatlaskia.