Telpokatsin Jesús

José iuan María chantiyaj ipan Nazaret iuan Jesús niman oksekimej inkoneuan tlakamej niman siuamej. José tekitiya ken kojxinketl niman ijkon kinmakaskia tlen noneki ichanejkauan. Noijki kinmachtiaya itech Jehová niman iTlanauatil. Yejuamej yonomatkaj yaskej ipan sinagoga kampa kiueyichiuayaj Jehová niman nochi xiujtin yayaj Jerusalén kampa kipanoltiayaj Pascua.

Ijkuak Jesús kipiaya 12 xiuitl, ichanejkauan oyajkej Jerusalén ijkon ken nochipa kichiuayaj. Melak tojlan katka ipan ueyikalpan pampa miyekej okipanoltitoj Pascua. Ijkuak otlan iluitl, José iuan María onokuepkej inchan, kinemiliayaj ika Jesús imiuan yaya oksekimej inchanejkauan. San ika, ijkuak okitejtemojkej itech inchanejkauan, xokinextijkej.

Yejuamej onokuepkej Jerusalén niman yeyi tonajli kitejtemojtinemiyaj inkoneuj. Sakin okinextitoj ipan teopan. Ompa nemiya Jesús, intsajlan tlamachtijkej, kuajli kinkaktoya niman kintlajtoltiaya. Tlamachtijkej melak tlamojkaitayaj ipampa tlen Jesús kijtouaya niman opeuj miyek kitlajtoltiaj. Melak tlamojkaitayaj ipampa itlanankilisuan. Okitakej ika kuajli kasikamatiya iTlanauatil Jehová.

José iuan María melak yonajmankaj. María okijto: “Nokoneuj, ¡nochiuiyan timitstejtemojtinemij! ¿Kanon tinemiya?”. Jesús okijto: “¿Xnenkimatiyaj ika kipiya ika ninemis ichan noTaj?”.

Jesús onokuep imiuan itajuan Nazaret. Ompa José okimachti Jesús kenon kichiuas tekitl ken kojxinketl. ¿Kenon tiknemilia katka Jesús ijkuak san telpokatsin katka? Ijkuak onoskaltijtia, onochiujtia tlamachilise. Ika yejon, toTajtsin niman tlaltikpakchanejkej kitlasojtlayaj.