Tlatlachalistin tlen okitak Juan

Ijkuak tlatitlanketl Juan tsauktoya ipan se tlajli tlen onka atlajkotian, itoka Patmos, Jesús okititi 16 tlatlachalistin itech tlen panoskia tlayekapan. Yejon tlatlachalistin teititiaj kenon nochipauas itokayo Jehová, kenon iTekiuajyo tlanauatis niman kenon nochiuas tlen yejua kineki ipan yejuin tlaltikpaktli ijkon ken nochiua ipan iluikak.

Ipan se tlatlachalistli, Juan kita Jehová ipan iueyixtika trono tlen onka iluikak. Iyeualiyan nemiyaj 24 tlayekankej, yejuamej kipiayaj intlaken istak niman coronas tlachijchiujtin ika oro. Itech itrono uajkikistokej tlapetlanaltin niman chikauak tlakomoni. Yejuin 24 tlayekankej notlakuanketsaj ixpan Jehová niman kiueyichiuaj. Ipan okse tlatlachalistli, Juan okitak ika melak miyekej tlaltikpakchanejkej akin miyekan ualeuayaj niman tlajtouayaj nochi tlajtoltin, san sekan kiueyichiujtoyaj Jehová. Borreguito, noso Jesús, kintlajpiya niman kinuika kampa atl tlen kitemaka nemilistli. Ipan okse tlatlachalistli, Jesús nochiua tekiuaj ipan iluikak niman tlayekana inuan 24 tlayekankej. Sakin, ipan okse tlatlachalistli, Juan kita ika Jesús kimixnamiki Dragón akin yeuejkaui kouatl, noso Satanás, niman xkuakualtin espíritus. Jesús okinkixti itech iluikak niman okinuajtlakal ipan tlaltikpaktli.

Sakin Juan kita se kualtsin tlatlachalistli kampa Borreguito niman 144,000 ijkatokej ipan tepetl Sion. Noijki kita se iluikaktekitketl patlantinemi iyeualiyan tlaltikpaktli niman kimijlia tlaltikpakchanejkej makimojkaitakan niman makiueyichiuakan toTajtsin.

Ipan okse tlatlachalistli, peua guerra itoka Armagedón. Ipan yejuin guerra, Jesús niman akin iuan tlaixnamikij kitlanij Satanás niman tlen kiyekana. Sa ika tlami tlatlachalistli, Juan kita ika onka yolseuilistli ipan iluikak niman tlaltikpaktli. Noijki kita ika kipopolouaj Satanás iuan ikoneuj, noso nochimej akin kinyekana. Ipan iluikak niman tlaltikpaktli nochimej kipatiojkaitaj itokayo Jehová niman san yejua kiueyichiuaj.