TLAMACHTIJLI 51
Matikyolpaktikan Jehová ika tlen tikijtouaj
Jehová melak kualtsin ken otexchijchiuj. Yejua okichiuj matiuelikan matitlajtokan, niman, kuelitaskia nochipa matitlajtokan ken kinamiki (xkita Santiago 1:26). Kuakon, ¿kenijki noneki titlajtoskej tla tiknekij tikyolpaktiskej Jehová?
1. ¿Tlenon uelis tikchiuaskej niman ijkon tikyolpaktiskej Jehová ika tlen tikijtouaj?
Biblia kijtoua: “Xmoyoleuakan iuan cada se, niman xmoyolchikauakan ikan tlaneltoktli iuan oksekimej” (1 Tesalonicenses 5:11). ¿Tikixmati yakaj akin noneki makiyolchikauakan? ¿Tiknemilia ika uelis tikpaleuis kuajli manomachili? Tla kema, xkijli tlen kualtsin kichiua niman xkasikamachilti ika tiktlasojtla. ¿Tejua tikmati se texto tlen uelis ika titeyolchikauas? Ipan Biblia tikinnextiaj miyek textos tlen uelis ika titeyolchikauaskej. Aman tej, ijkuak itlaj tikteijliskej, noneki kakistis ipan totlajtol ika melauak tiknekij titeyolchikauaskej pampa, tla xijkon tikchiuaj, xuelis titeyolchikauaskej. Kuakon, xmokojtili xyemankatlajto niman kualtsin xtenotsa (Proverbios 15:1).
2. ¿Kenijki xnoneki titlajtoskej?
Biblia kijtoua: “Maka sa xkijtokan on xkuajli tlajtojli” (xkita Efesios 4:29). Yejuin kijtosneki ika xnoneki tikijtoskej tlen xkuajli, tlen teyolkoko niman tlen ueliskia kinpinaujtis oksekimej. Noijki xnoneki titetlajtolchijchiuiliskej niman titetejteneuaskej (xkita Proverbios 16:28).
3. ¿Tlenon techpaleuis matitlajtokan ken kinamiki?
Ijkuak titlajtouaj, tikteititiaj tlenon melauak tiknemiliaj niman tlenon tikmachiliaj (Lucas 6:45). Ika yejon, melak noneki tokojtiliskej nochipa tiknemiliskej tlen kuajli, tlen melajki, tlen chipauak, tlen tepakti niman tlen techpaleuis matitetlasojtlakan (Filipenses 4:8). Niman ¿tlenon noneki tikchiuaskej niman ijkon titlanemiliskej itech nochi tlen yotikteneujkej? Noneki kuajli tikintlapejpeniskej toamigos niman totlajpiyaskej maka tikmauisoskej noso tijkakiskej tlen ueliskia techijtlakos (Proverbios 13:20). Noijki melak kuajli tla kachtopa tiknemiliaj tlenon tikijtoskej. Noneki totlajtoltiskej: “¿Kenijki nomachiliskej oksekimej tla nikijtoua yejuin?”. Biblia kijtoua: “On tlen se kijtoua yejuan xachtoj kinemilia, ueli tekokoua ken itlaj cuchillo, pero on tlen kijtoua, yejuan tlamatki, teyoltlalia” (Proverbios 12:18).
OKSEKI XKASIKAMATI
Matikitakan kenijki uelis tikyolpaktiskej Jehová niman tikinyolchikauaskej oksekimej ika tlen tikijtouaj.
4. Kuajli xnemili tlen tikijtos
¿Xmelak ika kemantika tikijtouaj itlaj tlen xtiknekiyaj tikijtoskej? (Santiago 3:2). Xkitakan Gálatas 5:22, 23 niman xtlajtokan itech yejuin:
Jehová uelis mitspaleuis xchiua ijkon ken kijtoua yejuin texto. Para uelis titlajtos ken kinamiki, ¿itech tlenon tikuelitaskia mamitspaleui Jehová? ¿Tleka tikuelitaskia mamitspaleui itech yejon?
Xkitakan 1 Corintios 15:33 niman xtlajtokan itech yejuin:
¿Uelis mitsmauaskej ken tlajtouaj akin imiuan timouika, niman akin tetlamauisoltiaj ipan televisión noso oksekan? ¿Kenijki uelis mitsijtlakos?
¿Akinomej uelis kichiuaskej matitlajtokan ijkon ken yejuamej tlajtouaj?
Xkitakan Eclesiastés 3:1, 7 niman xtlajtokan itech yejuin:
¿Kemanon tiknemilia xnoneki nimantsin titlajtoskej?
5. Kuajli xtlajto intech oksekimej
¿Tlenon uelis tikchiuaskej niman ijkon xtikijtoskej itlaj tlen uelis kinyolkokos oksekimej? Xkitakan VIDEO niman xtlajtokan itech yejuin:
¿Tleka tokniuj akin otikitakej ipan video kinekiya kipatlas ken tlajtouaya intech oksekimej?
¿Tlenon okichiuj niman ijkon uelis nopatlas?
Xkitakan Eclesiastés 7:16 niman xtlajtokan itech yejuin:
¿Tlenon noneki tikilnamikiskej ijkuak yakaj tiknekiskej tiktejteneuaskej?
Xkitakan Eclesiastés 7:21, 22 niman xtlajtokan itech yejuin:
Tla tikita ika yakaj peua mitstejteneua, ¿tiknemilia ika yejuin texto uelis mitspaleuis maka melak xkualani? ¿Tleka?
6. Kuajli xkinnotsa mochanejkauan
Jehová kineki ika nochipa kualtsin matikinnotsakan tochanejkauan. Xkitakan VIDEO niman xtlajtokan itech yejuin:
¿Tlenon mitspaleuis kualtsin xkinnotsa mochanejkauan?
Xkitakan Efesios 4:31, 32 niman xtlajtokan itech yejuin:
¿Kenijki uelis nonotsaskej familias niman ijkon nochimej ika inyojlo nemiskej?
Jehová miyekpa okijto ika melak kitlasojtlaya Jesús. Xkitakan Mateo 17:5 niman xtlajtokan itech yejuin:
¿Kenijki uelis tikchiuas ijkon ken Jehová ijkuak tikinnotsas mochanejkauan?
Nochipa xkimijli oksekimej tlen kualtsin kichiuaj.
SEKIMEJ KIJTOUAJ: “Nejua nikijtoua tlen niknemilia. Tla oksekimej xkuelkakij tlen nikijtoua, yejuamej ompa makitakan”.
¿Tiknemilia ika kuajli tla yakaj ijkon tlanemilia? ¿Tleka?
TLEN OTIUEL
Ijkuak titlajtouaj, uelis titeyolchikauaskej noso uelis titeyolkokoskej. Ika yejon, noneki melak kuajli tiknemiliskej tlenon tikijtoskej, kemanon tikijtoskej niman kenijki tikijtoskej.
¿Kenon titlanankiliskia?
¿Kenijki noneki titlajtos niman ijkon tikinyolchikauas oksekimej?
¿Kenijki xnoneki titlajtoskej?
¿Tlenon uelis techpaleuis kuajli matitenotsakan niman matitlajtokan ken kinamiki?
OKSEKI XKITA
¿Tlenon uelis techpaleuis niman ijkon matitlajtokan ken kinamiki?
Xkita tlenon uelis mitspaleuis maka xkijto tlen xkuajli.
“¿Tleka xkuajli tla nikimijtoua xkuajli tlajtoltin?” (Tlamachtijli de jw.org)
Xkita tlenon uelis mitspaleuis maka xtetejteneua.
Xkita kenijki Jehová okipaleui se tlakatl niman ijkon maka sa makimijto xkuajli tlajtoltin.
“Oninokojtili nikajkauas tlen nikchiuaya” (Amatl Tekakistilijketl, 1 de agosto de 2013)