¿Tleka melak noneki matikitakan ken totlakentiaj niman ken tokualtsintiliaj?

Tinochimej titlatlamantikej, ika yejon, xsan noijki ken totlakentiaj niman ken tokualtsintiliaj. Tla tiktlakamatij tlen Biblia temachtia, uelis totlakentiskej niman tokualtsintiliskej ken tikuelitaj niman noijki uelis tikyolpaktiskej Jehová. Matikimitakan seki textos tlen uelis techpaleuiskej ijkon matikchiuakan.

1. ¿Tlenon uelis techpaleuis matikmatikan kenijki noneki totlakentiskej niman tokualnextiskej?

Akin kichiuaj ken Cristo noneki “notlakentiskej ken kinamiki, noneki san kualtsin nokualnextiskej niman noneki nesis ika kuajli kipiyaj intlamachilis”. Noijki noneki chipaujkej yeskej niman ijkon kiteititiskej ika “kitlakaitaj toTajtsin” (1 Timoteo 2:9, 10, TNM). Matikitakan seki tlemach tlen techmachtia yejuin texto. 1) Noneki totlakentiskej “ken kinamiki”. Kanaj tejua yotikitak ika ipan tlanechikoltin tinochimej akin tiktekichiuiliaj Jehová xsan noijki totlakentiaj niman xsan noijki topetsouaj. San ika, ken tinesij kiteititia ika tiktlakaitaj toTajtsin. 2) Noneki “san kualtsin” tokualnextiskej. Yejuin kijtosneki ika xnoneki tiktlaliskej tlakentli tlen uelis kichiuas ika oksekimej makipiyakan se xkuajli ileuilistli. Noneki totlajpiyaskej maka toyekchiuaskej ken akin kinekij san yejuamej makimitakan. 3) Tikteititiaj ika kuajli tikpiyaj totlamachilis ijkuak xsan katlejua tlakentli tiktlalijtiuetsij maski tla yejon tlen miyekej yopeuj kitlaliaj. 4) Ken tokualnextiaj noneki kiteititis ika tiktlakaitaj toTajtsin, ijkon tikimititiskej oksekimej ika tikueyichiuaj toTajtsin akin melauak (1 Corintios 10:31).

2. ¿Tleka noneki titlanemiliskej intech tokniuan ijkuak tikitaskej kenijki noneki totlakentiskej niman tokualnextiskej?

Melauak, tinochimej uelis totlakentiskej ken tejuamej tikuelitaskej. San ika, noneki kuajli tikitaskej tla totlaken niman ken tokualnextiaj xkichiuas ika oksekimej maka kuajli manomachilikan. ¿Tleka? Pampa tejuamej tiknekij “tikinchiuiliskej tlen kuajli on tokniuan para tikimpaktiskej niman ijkon noskaltis intlaneltok” (xkita Romanos 15:1, 2).

3. ¿Tlenon uelis panos tla totlakentiaj niman tokualnextiaj ken kinamiki?

Tejuamej nochipa kuajli tikitaj kenijki totlakentiskej, san ika, más kuajli tikitaj kenijki totlakentiskej ijkuak tiauej ipan tlanechikoltin niman ijkuak tontenojnotsaj. Xtiknekiskiaj ika san pampa ken yotokualnextijkej maka makinekikan techkakiskej akin tikinnojnotsaj itech Biblia. Tiknekij ika ken tokualnextiaj niman ken totlakentiaj makichiua ika miyekej makinekikan kixmatiskej Jehová niman makitakan ika melak kualtsin “on itemachtil Dios toTemakixtijkau” (Tito 2:10).

OKSEKI XKASIKAMATI

4. Ijkuak kualtsin totlakentiaj niman kualtsin tokualnextiaj, tikteititiaj ika tiktlakaitaj toTajtsin

¿Tleka melak noneki kuajli matikitakan kenijki tinesij? Xkitakan Salmo 47:2 niman xtlajtokan itech yejuin:

• Oksekimej uelis kimatiskej ika tiktekichiuiliaj Jehová tla kitaj kenijki totlakentiaj niman kenijki tokualnextiaj. Ika yejon, ¿kenijki noneki totlakentiskej niman tokualnextiskej?

• Yotikitakej ika noneki kuajli tikitaskej tla kuajli ken totlakentiaj niman ken toyekchiuaj ijkuak tiauej ipan tlanechikoltin niman ijkuak tontenojnotsaj. ¿Tiknemilia ika uelis tikchiuaskej tlen nikan yonoijto?

5. Tlen uelis techpaleuis matikitakan kenijki noneki totlakentiskej niman tokualnextiskej

Xkitakan VIDEO.

VIDEO: “Nochi xchiuakan para Dios ma kiseli ueyilistli” (10:18)

Maski tla totlaken patioj noso xpatioj, noneki totlakentiskej ijkon ken kinamiki niman tikitaskej ika totlaken nochipa machipaujto. Xkitakan 1 Corintios 10:24 niman 1 Timoteo 2:9, 10. Aman xtlajtokan itech yejuin:

• ¿Tleka xkuajli yeskia tla tiknakiyaj noso tiktlaliaj tlakentli tlen kanaj melak yotsojkuiliuj, yososoltlachix noso tlen xkuajli nesi?

• ¿Tleka xkuajli yeskia tla tiktlaliaj tlakentli tlen melak pitstik, tlen xkuajli techtlapachoua noso tlen ueliskia kichiuas ika oksekimej makinemilikan tlen xkuajli?

Maski akin tikchiuaj ken Cristo xok noneki tiktlakamatiskej Tlanauatijli tlen okimakakej Moisés, yejuin tlanauatijli techpaleuiya matikitakan tlenon kinemilia Jehová. Xkitakan Deuteronomio 22:5 niman xtlajtokan itech yejuin:

• Sekimej siuamej notlakentiaj niman nokualnextiaj ken tlakamej, niman sekimej tlakamej notlakentiaj niman nokualnextiaj ken siuamej. ¿Tleka xkuajli tla yakaj ijkon kichiua?

Xkitakan 1 Corintios 10:32, 33 niman 1 Juan 2:15, 16, niman xtlajtokan itech yejuin:

• Tla kampa tichantij noso ipan totlanechikol kitaj ika xkuajli ken totlakentiaj, ¿tiknemilia ika nonekis tikpatlaskej ken totlakentiaj? ¿Tleka?

• ¿Kenijki notlakentiaj niman nokualnextiaj kampa tejua tichanti?

• ¿Tiknemilia ika kuajli yeskia tla se akin kitekichiuilia Jehová notlakentia ijkon ken miyekej notlakentiaj? ¿Tleka ijkon tiknemilia?

TLEN OTIUEL

Ijkuak kualtsin totlakentiaj niman kualtsin tokualnextiaj, tikteititiaj ika tiktlakaitaj Jehová niman ika tikintlakaitaj oksekimej.

¿Kenon titlanankiliskia?

• ¿Tleka Jehová kineki kuajli matikitakan kenijki noneki totlakentiskej niman tokualnextiskej?

• ¿Katlejua textos uelis techpaleuiskej kuajli matikitakan kenijki totlakentiskej niman kenijki tokualnextiskej?

• ¿Tiknemilia ika ken totlakentiaj niman ken tokualnextiaj uelis kichiuas ika oksekimej makinemilikan tlen kuajli itech Jehová? ¿Tleka ijkon tiknemilia?

OKSEKI XKITA

Xkita tlenon kinemiliaj oksekimej itech ken timotlakentia.

“¿Tlenon kinemiliaj oksekimej itech ken ninotlakentia?” (Tlamachtijli de jw.org)

Xkita tleka melak noneki kuajli matiknemilikan tla tochiuiliskej se tatuaje.

“¿Melak xkuajli tla tikmochiuilia se tatuaje?” (Tlamachtijli de jw.org)

Xkita okseki tlen temachtia Biblia tlen uelis mitspaleuis xtlapejpeni tlen kuajli.

“¿Kiueyichiua toTajtsin ken totlakentiaj?” (Amatl Tekakistilijketl, septiembre de 2016)

¿Tlenon okipaleui se siuatl makasikamati ika xsan noijki ken totlakentiaj niman ika yejon xtlajtlakojli?

“Xnikuelitaya ken nokualnextiaj” (¡Xtlachiakan!, 22 de diciembre de 2003)