Tlen noneki tikmatiskej

TESEUIJKEJ. Teseuijkej uelis mitspaleuiskej. Uelis tikinpaleuis tla tikchiua tlen mitsijliaj, ken kampa noneki nokauaskej carros, kampa noneki nojuitilos, ijkuak tikxelos kampa timoseuis niman okseki tlemach.

APOLAKTILISTLI. Ixpan plataforma noxelos kampa notlaliskej akin noapolaktiskej, uelis ompa nokauaskej tla xkimijliaj itlaj okse. Akin noapolaktiskej noneki notlaliskej ijkuak xipeua tlamachtijli itech apolaktilistli ipan sábado ika kualkan. Nochimej noneki kuajkuiskej se toalla niman intlaken tlen ipan noapolaktiskej tlen kuajli manesi.

TLEN UELIS TIKTEMAKAS. Melak miyek tomin yonopopolo niman ijkon uelis tikpiyaskej kampa totlaliskej, tijkakiskej tlen nopanoltia niman tlen ika tikimitaskej videos, niman okseki miyek tlemach tlen techpaleuiyaj kuajli matomachilikan ipan toueyitlanechikol niman techpaleuiyaj matiknisiuikan Jehová. Tlen tiktemaka tlapaleuiya manotlaxtlaua tlen yonopopolo niman kipaleuiya tekitl tlen nochiua ipan nochi tlaltikpaktli. Uelis tiktlalis motomintsin ipan cajas tlen yonotlalijkej ipan toueyitlanechikol. Noijki, ipan Internet uelis tiktemakas motomintsin, xkalaki ipan donate.jw.org. Melak notlasojkamati tlen nochimej kitemakaj. Grupo akin Tlayekana ipan nochi tlanechikoltin kineki mitstlasojkamachilis pampa tikpaleuiya itekiyo toTajtsin.

KAMPA TLAPAJTILO. Xkilnamiki ika nikan san uelis tias tla yemelak noneki.

TLEMACH TLEN YOPOLIUJ. Tla tiknextia itlaj tlen xmotlatki, xtemakati kampa kisentlaliaj. Tla itlaj yotikpolo, ompa xtejtemoti. Noijki uelis ompa tikinuikas kokonej akin yopoliujkej. San ika, xtiknekij tikintekiyomakaskej akin ompa tlapaleuiyaj, ika yejon, timitstlajtlaniliaj ika kuajli xkintlajpiya mokoneuan niman nochipa imiuan xnemi.

KAMPA NOSEUILO. Timitstlajtlaniliaj ika xtlanemili intech oksekimej. Xkilnamiki ika san uelis tikxelos kampa noseuiskej mochanejkauan, akin mouan uajlauej ipan carro, akin mouan chantij noso akin tikinmachtia itech Biblia. Maka itlaj xtlali kampa xtimoseuis.

AKIN KINEKI TLAPALEUIS. Tla tikneki titlapaleuis ipan tekitl tlen nochiua ipan yejuin toueyitlanechikol, xuiya kampa uelis mitsijliskej kampa uelis titlapaleuis.