Tlen notlajtoltiaj akin kitaj revistas

Itech tlen Biblia kijtoua itech kenon noneki tiktekitiltiskej yestli, ¿tlenon kinemiliaj iteixpantijkauan Jehová ijkuak tepajtijkej kikuij sa no iyesyo kokoxki niman ijkon kipajtiskej?

Nochimej akin tikchiuaj ken Cristo noneki kuajli tikitaskej tlenon kijtoua Biblia itech yejuin. Niman xsan noneki tiktlapejpeniskej itech tlen tejuamej tiknekij noso itech tlen techijliaj tlapajtijkej. San tejuamej noneki tiktlapejpeniskej tlenon tikchiuaskej niman tikitaskej tlen Jehová kinemilia.

Jehová, akin itech ualeua nemilistli, okijto ika xnoneki tijkuaskej noso tikoniskej yestli (Génesis 9:​3, 4). Ipan tlanauatijli tlen Jehová okinmakaka israelitas, okimijli ika yestli kineskayotia nemilistli niman okimijli kemanon ueliskiaj kitekitiltiskiaj. Yejua okijto: “Inemilis on yolki onka ipan iyesyo yejuan kipiya ipan itlakayo. Nejua nemechmaka on yestli para ika nentlajuichiskej ipan on tlaixpan, para toTEKO mitstlapojpoluilis motlajtlakoluan”. ¿Niman tla yakaj kimiktiaya se yolki para kikuas? ToTajtsin okijto: “Noneki kitoyauaskej iyesyo niman kitlalpachoskej”a (Levítico 17:​11, 13). Yejuin tlanauatijli miyekpa nestika ipan Biblia (Deuteronomio 12:​16, 24; 15:23). Amoxtli judío tlen itoka The Soncino Chumash okijto: “Yestli xnoneki noyejyeuas, yej, noneki notoyauas para maka yakaj makikua”. Pampa nemilistli itlatki Jehová, israelitas xnonekiya kejyeuaskej, kisentlaliskej nion kitekitiltiskej iyesyo se tlaltikpakchane noso se yolki.

Ijkuak omik Mesías xok nonekiya notlakamatis tlanauatijli tlen okinmakakaj israelitas. San ika, toTajtsin ok kipatiojkaita yestli. Espíritu santo okinyolmapeuj apóstoles para makiminnauatikan akin kichiuaj ken Cristo maka makikuakan yestli. Yejuin tlanauatijli xnonekiya kauilmatiskej. Yejuin tlanauatijli melak ueyi kijtosnekiya ijkon ken on tlanauatijli kampa kijtoua ika maka maauilnemikan niman maka makinueyichiuakan tajtsitsintin (Hechos 15:​28, 29; 21:25). Kanaj ipan xiuitl 1900 miyekej opeujkej kitemakaj niman kinotlaliliaj yestli, san ika, iteixpantijkauan Jehová okasikamatkej ika yejon, kixnamikiya iTlajtol toTajtsin.b

Kemantika, tepajtijkej kijliaj akin kipajtiaj manokixtili yestli seki semanas achto kichiuiliskej se operación, niman ijkon, tla nonekiskia uelis sa no yejua iyesyo kitlaliliskej. San ika, tla yakaj nokixtilia, kisentlalia noso kinotlalilia yestli kixnamiktika tlen kijtoua Levítico niman Deuteronomio. Yestli xnonekiya nosentlalis, nonekiya notoyauas niman ijkon, uelis tikijtoskiaj kentla nokuepaskia kampa toTajtsin. Maski aman xok tiktlakamatij tlanauatijli tlen okinmakakaj israelitas, iteixpantijkauan Jehová tiktlakaitaj tlen kijtouaya yejon tlanauatijli niman xtotlaliliaj yestli. Ika yejon, pampa tikmatstokej ika yestli noneki notoyauas, xtiktemakaj nion xtiksentlaliaj niman ijkon sakin oksejpa techtlaliliskej. Tla tikchiuaskiaj yejuin xtiktlakamatstoskiaj itlanauatil toTajtsin.

Kemantika ken tepajtijkej techijliaj matiktekitiltikan toyesyo kanaj xkixnamikij itlanauatiluan toTajtsin. Ken ijkuak sekimej kinokauiliaj achijtsin makinkixtilikan yestli para kitaskej kenon onka, san ika, kimatstokej ika sakin kitoyauaskej. San ika, onka okseki tlemach tlen kitekitiltiaj tepajtijkej para techpajtiskej ika toyesyo.

Kemantika ipan seki operaciones nochiua itlaj tlen kitokayotiaj hemodilución. Ijkuak nochiua yejuin, tepajtijkej kiyekatiaj iyesyo kokoxki niman iyesyo tlen nokaua kiajyotiaj. Sakin oksejpa kitlaliliaj sa no yejua iyesyo niman ijkon oksejpa mamiyekiya yestli. Noijki kemantika kontilanaj yestli tlen otoyauj ipan itlalnakayo on kokoxki, kichipauaj niman on glóbulos rojos oksejpa kikuepaj. Yejuin noixmati ken recuperación de células. Kemantika ipan se operación kititlanij yestli ipan se máquina tlen kitekipatlatika se órgano ken moyoltsin, mopulmones noso moriñones. Niman sakin yejon yestli tlen onkatka ipan máquina oksejpa kikuepaj ipan kokoxki. Onka okseki tlen kitekitiltiaj tepajtijkej, kemantika kiyekatiaj iyesyo kokoxki ipan se máquina tlen itoka centrifugador niman ijkon kipopolouiliskej tlen xkuajli kipiya ipan iyesyo. Noso kemantika ijkon kichiuaj para kixeloskej tlen ika tlachijchiujtli yestli niman ijkon kitlaliliskej oksekan kampa nonekis ipan itlalnakayo. Niman kemantika kixtiliaj achijtsin yestli niman kinelouaj iuan se medicamento niman sakin kikuepaj ipan itlalnakayo on kokoxki.

Sekimej tlapajtikej uelis tlamantik kichiuaskej yejuin, niman kanaj tlayekapan okseki kitekitiltiskej tlen ika tepajtiskej ika toyesyo. Xtechnamiki tejuamej tomachtiskej itech nochi kenon tepajtiaj tlapajtijkej, nion tikijtoskej kenon nopajtiskej oksekimej. Akin kichiuaj ken Cristo nonekij kitlapejpeniskej tlenon kichiuiliskej inyesyo ijkuak kinchiuiliskej se operación, kinchiuiliskej estudios noso ijkuak kinpajtiskej. Ika miyek tiempo achto noneki kintlajtoltiskej tlapajtijkej tlenon kichiuaskej ika iyesyo ijkuak kinpajtiskej. Sakin noneki kitlapejpeniskej tlen xkipajsolos intlamachilis (xkita recuadro).

Akin kichiuaj ken Cristo noneki kilnamiktoskej ika yonosentemakakej itech toTajtsin niman ika noneki kitlasojtlaskej ika nochi inyojlo, ika nochi inalma, ika nochi inchikaualis niman ika nochi intlamachilis (Lucas 10:27). Iteixpantijkauan Jehová melak kipatiojkaitaj ika uelij nouikaj iuan toTajtsin, xijkon ken tlaltikpakchanejkej. Akin otechmakak tonemilis techijlia matitlaneltokakan itech iyesyo tlen Jesús okitemakak. Biblia kijtoua: ”‏ItlajsojkaKonetsin [Jesucristo] okitlaxtlau ikan iyesyo totlajtlakoluan, niman aman Dios yotechtlapojpoluilij ikan iueyitetlajsotlalis”‏ (Efesios 1:7).

[Notas]

[Recuadro/​Tlaixkopinaltin]

TLEN UELIS TOTLAJTOLTISKEJ

Tla tlapajtijkej oksekan kiyekatiskiaj noyesyo niman yejon yestli xok notlalojtoskia ipan notlaluayo se tiempo, ¿nechpajsoloskia notlamachilis tla xniktoyaua yejon yestli niman oksejpa niknotlalilia?

Tla tlapajtijkej nechkixtiliskiaj seki noyesyo para kipajtiskej, kanaj itlaj kitlaliliskej noso itlaj kikixtiliskej, niman sakin oksejpa nechtlaliliskej ipan notlaluayo (noso ipan notlalnakayo), ¿nechpajsoloskia notlamachilis tla niktekauilia ijkon makichiuakan, noso niknektoskia ijkon manechpajtikan?