¿Tlenon techmachtiaj imilagros Jesús?
Kanaj mitsmojkatlachialtis ika Biblia, ijkuak tlajtoua itech inemilis Jesús, xkeman kiteneua tlajtojli “milagro” ijkon ken miyekej kixmatij ika griego. Kemantika notekitiltiani tlajtojli dy-na-mis, para notlajtolkuepas tlajtojli “milagro”, yejon tlajtojli kijtosneki “poder” (Lucas 8:46) niman noijki uelis kijtosnekis “tlen yakaj ueli kichiua” noso “tlen yakaj kichiua ika ueyi poder” (Mateo 11:20; 25:15). Se ixtlamatki kijtoua ika ijkuak notekitiltia tlajtojli dy-na-mis, pankisa ika itlaj onochiuj ika se ueyi kojtilistli, kichikokixtia yejon poder tlen ouel okichiuj manochiua itlaj. Yejon tlen nochiua kuajli kiteititia kenon tekiti ikojtilis toTajtsin.
Niman kemantika notekitiltiani tlajtojli té·ras, tlen kijtosneki “temojkatlachialti” (Juan 4:48; Hechos 2:19). Yejuin tlajtojli kipanextia kenon nomachiliaj akin kitaj se milagro. Miyekpa discípulos niman oksekimej melak tlamojkaitayaj ijkuak kimitayaj milagros tlen kinchiuaya Jesús (Marcos 2:12; 4:41; 6:51; Lucas 9:43).
Noijki nokuini tlajtojli sē-méi-on, noso “señal” para noteneuaskej imilagros Jesús. Ixtlamatki Robert Deffinbaugh kijtoua ika yejuin tlajtojli más kuajli kiteasikamachiltia tlenon melauak kijtosneki milagro. Noijki kijtoua ika se milagro noita ken se señal ijkuak yejon milagro techititia itlaj itech Jesús.
¿San tlaixkajkayaualistli noso ikojtilis toTajtsin?
Biblia xkinteneua milagros tlen okinchiuj Jesús ken itlaj tlen san ika titeixkajkayauas, yej, ken itlaj tlen kiteititiaj “iueyilis Dios”. Ijkon tikijtouaj pampa Biblia, ijkon kiteneua ijkuak kijtoua tlenon opanok ijkuak Jesús okikixtili se telpochtli on xkuajli espíritu (Lucas 9:37-43). ¿Tiknemilia ika yejuin milagros xueliskia kinchiuas toTajtsin akin “kipiya ueyi poder” niman akin noijtouani ika “sanoyej kojtik”? (Isaías 40:26). !Kuajli tikmatstokej ika xijkon tiknemilia!
Maski onopoujkej niman onoitak ika ipan Evangelios noteneuaj kanaj 35 milagros tlen okinchiuj Jesús, xnomati yemelak kech okinchiuj. San matikonteneuakan tlen noijtoua ipan Mateo 14:14, ompa kijtoua ika Jesús “okijtak ika miyek tlakatl ompa kichixtikatka. Yejua okimiknelij niman okimpajtij on kokoxke”, san ika, xkiteneua kechmej kokoxkej okinpajti.
Milagros tlen okinchiuj Jesús, kuajli okiteititijkej ika yejua yemelak katka iKoneuj toTajtsin, Mesías akin yonoijtoka uajlas. Yektlakuilojli kuajli kijtoua ika Jesús kinchiuaya milagros itechkopa ikojtilis toTajtsin. Niman apóstol Pedro okijto yejuin itech Jesús: “Dios kuajli omechititij ika on Jesús Nazareno, melauak yejua iKoneu. Ijkon tej, Dios omechititij ikan uejueyi tetlatlachalistli, milagros niman tlamauisoltin yejuan yejua okichiu nemotsajlan itechkopa Jesús ijkon ken nemejuamej kuajli nenkimatstokej” (Hechos 2:22). Niman sejpatipan, pedro okijto ika “Dios okimakak poder Jesús yejuan ualeua ne Nazaret, nimanokiyoltemitij ikan on Espíritu Santo. Niman no ijki nemejuamej nenkimatstokej kenijki Jesús nouiyan okichijtinen on tlen kuajli niman nochimej on yejuan itlaj ika kintlajyouiltiaya ipoder on diablo okimpajtij, pampa Dios iuan nemiya” (Hechos 10:37, 38).
Milagros tlen kinchiuayaj Jesús, kuajli kiteititiayaj tlen yejua temachtiaya. Marcos 1:21-27, techijlia kenon onomachilijkej miyekej ijkuak okikakkej tlen Jesús temachtiaya niman ijkuak okitakej milagro tlen okichiuj. Ipan versículo 22 kijtoua ika “on tlakamej sanoyej okintlajtlachaltij” ijkuak okikakkej kenon temachtiaya Jesús, niman ipan versículo 27 kijtoua ika ijkuak okitakej kenon Jesús okikixti on xkuajli espíritu, “nochimej omojkatlachixkej”. Nochi milagros tlen okinchiuj Jesús niman tlen temachtiaya kuajli okiteititijkej ika yemelak yejua katka Mesías.
Jesús xsan kijtouaya ika yejua katka Mesías, yejua ijkon okiteititi ika tlen kichiuaya niman ika on milagros tlen okinchiuj ika ikojtilis toTajtsin. Niman ijkuak okitlajtoltijkej tleka ijkon kichiuaya, yejua otenankili: “Nejua nikpiya notestigo yejuan más ueyi kijtosneki xken on tlen okijtoj Juan. On tlen noTajtsin onechmakak para ma nikchiua kiteititia ika melauak noTajtsin onechajtitlan” (Juan 5:36).
Tlen techititia ika imilagros Jesús melauak onochiujkej
Matikitakan seki tlemach, tlen techpaleuis kuajli matikmatstokan ika milagros tlen okinchiuj Jesús, melauak onochiujkej.
Ijkuak Jesús okinchiuj milagros xkeman okijto ika yejua kinchiuaya. Yejua, yej okichiuj ika oksekimej makiueyiteneuakan toTajtsin ipampa on milagros tlen okinchiuj. Matikonteneuakan yejuin, achto ika Jesús kipajtiskia on tlakatl akin xtlachiaya, yejua okijto ika “ijkon otlakat para itech nopantlantis on tlen Dios ueli kichiua” (Juan 9:1-3; 11:1-4).
Jesús xkeman okichiuj ken kichiuaj tetlatemouilijkej niman nanaualtin, kema, Jesús xkeman oteixkajkayauj, xkeman otetlamauisolti ika tlen kichiuaya nion xkeman okikuik itlaj para ika kinchiuas milagros. Biblia kijtoua kenon Jesús okinpajti omemej tlakamej akin xtlachiayaj, ompa kijtoua ika “okimiknelij niman okinmatokilij imixtololojuan. Kemaj nimantsin on ciegos ouelkej otlachixkej. Kemaj oyajkej iuan Jesús” (Mateo 20:29-34). Kuakon Jesús xitlaj okikuik niman ijkon kinchiuas milagros. Niman miyekej okitakej ika yejua melauak kinchiuaya milagros. Jesús xkipixtinemiya itlaj tlen ika tepajtis nion xkichiuaya se tlamauisojli ijkuak kichiuaya se milagro. Aman tej, ipan yejuin tonaltin noijtoua ika sekimej kinchiuaj milagros, san ika, xueli noteititia ika melauak nochiuaj (Marcos 5:24-29; Lucas 7:11-15).
Jesús kinchiuaya milagros maski kimatstoya ika miyekej akin kinpajtiskia xitech tlaneltokayaj. Yejuin kuajli tikmatstokej ipampa tlen opanok ijkuak Jesús nemiya Capernaum, Biblia kijtoua ika “okinuajuikakej itech Jesús miyekej tlakamej yejuan kipiyayaj on xkuajkualtin espíritus niman oksekimej kokoxkej. Niman ikan itlanauatil okinkixtilij on espíritus, niman no okimpajtij nochimej on kokoxkej” (Mateo 8:16).
Jesús kinchiuaya milagros pampa yemelak kinekiya kinpaleuis akin kualouayaj, xkinchiuaya san para oksekimej makitakan (Marcos 10:46-52; Lucas 23:8). Niman Jesús xkeman okinchiuj milagros niman ijkon ika nopaleuis (Mateo 4:2-4; 10:8).
¿Uelis tikneltokaskej tlen noijtoua ipan Evangelios?
Tlen onochiuj ijkuak Jesús okinchiuj milagros, tikmatstokej ipampa on naui Evangelios, san ika, ¿uelis tikneltokaskej tlen ompa noijtoua? Kema.
Ijkon ken yotikteneujkej, ijkuak Jesús kichiuaya se milagro, yejua teixpan kichiuaya yejon milagro. Miyekej akin okitakej imilagros Jesús ok nemiyaj ijkuak onoijkuilojkej kachtopa Evangelios. Libro The Miracles and the Resurrection (Los milagros y la resurrección) okijto ika xkinamikiskia matikijtokan ika akin okijkuilojkej Evangelios san okinnejnemilijkej yejon milagros tlen ompa noteneuaj para ijkon tetlaneltokiltiskej, yejuamej melak onokojtilijkej kitlaliskej ijkon ken melauak opanok.
Judíos akin kintlaueltokayaj akin kichiuayaj ken Cristo, xkeman okijtojkej tla imilagros Jesús tlen noteneuaj ipan Evangelios xmelauak onochiujkej. Yejuamej san kijtouayaj ika milagros tlen kinchiuaya Jesús xmelauak tla kinchiuaya itechkopa ikojtilis toTajtsin (Marcos 3:22-26). Nion se de yejon akin teixnamikiyaj xouel okijto ika Jesús xmelauak okinchiuj milagros. Ijkuakon, niman doscientos xiuitl sakin, melak miyekej tlajtouayaj itech milagros tlen Jesús okinchiuj. Ika yejon, kuajli tikmatstokej ika milagros tlen onoijkuilojkej ipan Evangelios yemelak onochiujkej.
On tlakatl akin kinchiuaya milagros
Tla san noijtoskia ika imilagros Jesús melauak onochiujkej, xnochi tikasikamatiskiaj. Ipan Evangelios tlajtlajtoua itech milagros tlen okinchiuj Jesús, niman yejuin tlen okichiuj, kuajli techititia ika Jesús melak tetlasojtlaya, teikneliaya, niman yemelak kinekiya kinpaleuis oksekimej.
Matikitakan tlen opanok ijkuak se tlakatl akin kipiaya lepra okinisiui Jesús niman okijli: “Tla tikneki, uelis tinechpajtis. Jesús okiknejlij, okimatokak, niman okijli: ‘Nikneki. Aman xpajti’”. Yejon tlakatl nimantsin opajtik (Marcos 1:40-42). Ika yejuin, Jesús kuajli okiteititi ika sajnoye teikneliaya, niman yejon tlen kimachiliaya kiyolmapeuaya makinchiua milagros.
¿Tlenon opanok ijkuak Jesús okinnamik sekimej tetokakej akin ualeuayaj Nain? Akin kontokaskiaj, katka se telpochtli, isentekonetsin se siuakaualtsintli. Jesús “okiknelij” yejon siuakaualtsintli, okinisiui niman okijli: “Maka xchoka”. Sakin okiyoliti ikoneuj (Lucas 7:11-15).
Milagros tlen okinchiuj Jesús techyolseuiyaj pampa techmachtiaj ika Jesús teikneliaya niman yemelak kinekiya kinpaleuis oksekimej. San ika, on milagros tlen onochiujkej, xsan itlaj tlen yeuejkaui opanok. Pampa ipan Hebreos 13:8 kijtoua ika “Ijkon ken JesuCristo katka, aman sanken ijki, niman nochipa ijki yes”. Aman, Jesús tekiuajtitika ne iluikak niman yokimakakej “ueyi poder” para kichiuas más miyek tlemach xijkon ken tlen okichiuj ijkuak onen ipan tlaltikpaktli. Xok uejkaujtika poliui ijkuak kikuis on kojtilistli tlen yokimakakej para ika kinpajtis nochimej akin tetlakamatij. Iteixpantijkauan Jehová melak kuelitaskiaj mitspaleuiskej xmati tlenon kijtoua Biblia panos ika tlayekapan.
[Tlaixkopinaltin]
Milagros tlen okinchiuj Jesús okiteititi iueyilis Dios
[Tlaixkopinajli]
Jesús katka se tlakatl akin sajnoye tetlasojtlaya.