4 ¿Tlenon uelis tiktlajtlaniliskej toTajtsin?

MIYEKEJ kuajli kixmatstokej oración padrenuestro, tlen Jesús okimachti inomachtijkauan. Niman mojmostla kijtojtokej yejon oración, san ika, xkasikamati tlenon kijtosneki. Jesús xokijto tla nonekiya ijkon tikchiuaskej ijkuak tiknotsaskej toTajtsin. ¿Tleka ijkon tikijtouaj?

Ijkon tikijtoua, pampa achto ika Jesús kimijliskia inomachtijkauan kenijki noneki kichiuaskej teoyotl, okijto yejuin: “Maka miyekpa sano yejua tlajtojli nenkijtoskej” (Mateo 6:7). Kuakon, yejuin techasikamachiltia ika Jesús xkijtosnekiya matiktsontekontlalikan yejon oración tlen otemachti. Yejua kinekiya matikasikamatikan tlenon nonekiya tiktlajtlaniskej ipan toteoyouan. Kuajli matikitakan tlen kijtoua Mateo 6:9-13 itech Traducción del Nuevo Mundo, yejuin techpaleuis más kuajli matikasikamatikan tlenon kijtosneki yejon teoyotl.

“ToTajtsin akin tinemi ne iluikak, machipaui motoka”.

Jesús okimijli inomachtijkauan ika noneki san toTajtsin Jehová matiknotsakan. San ika ¿tleka okijto Jesús ika noneki machipaui itoka Jehová?

Desde yeuejkaui miyekej yokitsokuilojkej itoka toTajtsin. Satanás akin okixnamik toTajtsin kijtoua ika yejua tekajkayauaj, xnajmana topampa, niman xkinamiki tlanauatis nion techyekanas (Génesis 3:1-6). Miyekej tlaltikpakchanejkej noijki ijkon kichiuaj, temachtiaj ika toTajtsin xtechtlasojtla, techtlajyouiltia, noso temachtiaj ika nochi tlen onka xtoTajtsin okichijchiuj. Niman sekimej hasta yokipopolojkej itoka toTajtsin ipan seki Biblias niman xkitekauiliaj makitekitiltikan.

Ipan Biblia techijlia kenon toTajtsin kichipauas itoka (Ezequiel 39:7). Niman ijkuak kichiuas noijki kiyektlalis nochi tlen techajmana. ¿Kenijki kichiuas? Matikitakan tlen Jesús okijto.

“Mauajla moTekiuajyo”.

Ipan yejuin tonaltin, miyekej akin tlayekanaj ipan religiones, tlatlamantik ken kasikamatij tlen kijtosneki iTekiuajyo toTajtsin. San ika, ijkuak Jesús nemiya ipan tlaltikpaktli, xijkon panouaya. Judíos kuajli kimixmatstoyaj teotlajtoltin tlen tlajtouayaj itech Mesías, akin toTajtsin okitlapejpeni para matlanauati itech iTekiuajyo (Isaías 9:6, 7; Daniel 2:44). Yejuin Tekiuajyotl kichipauas itoka Jehová pampa kinteititis nochi itlakajkayaualisuan Satanás. Kipopolos nochi tlen techtlajyouiltia ken guerras, kokolistin, apistli niman mikilistli (Salmo 46:9; 72:12-16; Isaías 25:8; 33:24). Yejuin kijtosneki ika ijkuak tiktlajtlaniliaj toTajtsin mauajla iTekiuajyo, tiktlajtlanilijtokej manochiua nochi yejuin ipan tlaltikpaktli.

“Manochiua nikan ipan tlaltikpaktli tlen tejua tikneki, ijkon ken nochiua ne iluikak”.

Yejuin kijtosneki ika uelis kuajli tikmatstoskej ika toTajtsin kichiuas ika ipan yejuin tlaltikpaktli manochiua tlen yejua kineki, ijkon ken okichiuj ne iluikak (Apocalipsis 12:9-12). Kuakon, yejuin kijtosneki ika ijkuak tiktlajtlanij machipaui itoka toTajtsin, mauajla iTekiuajyo niman manochiua tlen yejua kineki, tikteititia ika xsan totech titlanemiliaj. Ijkuak toTajtsin kichiua tlen yejua kineki, tinochimej melak techpaleuiya. Matikilnamikikan ika hasta Jesús akin xtlajtlakole katka, okijto: “Maka nochiuas ken nejua nikneki, yej ma nochiua ken tejua tikneki” (Lucas 22:42).

“Mojmostla xtechmaka tlen tikuaskej”.

Jesús noijki okijto ika ijkuak tiknotsaj toTajtsin, uelis tiktlajtlaniliskej tlen tejuamej tikneki. Yejuin kijtosneki ika xtlajtlakojli tla tiktlajtlaniliaj tlen ika topanoltiskej. Tla ijkon tikchiuaj, tikteititiaj ika tikneltokaj ika Jehová “yejua otechmakak tinochimej tijyo, tonemilis, niman nochi tlajtlamach” (Hechos 17:25). Biblia kijtoua ika toTajtsin yeskia ken se tajtli tetlasojtlani, akin kinmaka ikoneuan tlen kinpoloua. San ika, se tajtli xkeman kinmakaskia ikoneuan itlaj tlen uelis kimijtlakos, maski melak makitlajtlanilikan.

“Xtechtlapopoluili totlajtlakoluan”.

¿Tleka melak noneki matiktlajtlanilikan toTajtsin matechtlapopolui? Miyekej xkineltokaj ika titlajtlakolejkej noso kinemiliaj ika on tlajtlakojli xueyi kijtosneki. San ika, Biblia kijtoua ika titlajyouiyaj niman timikij pampa titlajtlakolejkej. Niman pampa desde ijkuak titlakatij titlajtlakolejkej, topopolouaj niman tikyolkokouaj toTajtsin. Kuakon, tla tiknekij tikpiyaskej se nemilistli tlen xkeman tlamis, melak noneki ika toTajtsin matechtlapopolui (Romanos 3:23; 5:12; 6:23). Biblia noijki kijtoua ika toTajtsin yolkuajli niman kinektika techtlapopoluis (Salmo 86:5).

“Xtechmanaui itech akin xkuajli”.

Melak noneki ika toTajtsin matechtlajpiya. Kanaj miyekej xkineltokaj ika nemi Satanás, san ika, Jesús kuajli kimatstoya ika kema nemi niman hasta okijto ika Satanás yejua “kimandaroua in tlaltikpaktli” (Juan 12:31; 16:11). Satanás, xsan kineki kiyekanas yejuin tlaltikpaktli, noijki kineki techyekanas para matikchiuakan tlen xkuajli niman maka matouikakan iuan toTajtsin Jehová (1 Pedro 5:8). San ika, xnoneki tikmakasiskej pampa toTajtsin más kojtik niman yejua kintlajpiya akin kitlasojtla.

Onka miyek tlen uelis tikijliskej toTajtsin ijkuak tiknotsaskej. Ipan 1 Juan 5:14 kijtoua: “San tlinon tiktlajtlaniliskej ken yejua kineki, yejua techkakis”. Kuakon, kuajli matikmatstokan ika uelis tikijliskej toTajtsin nochi tlen techajmana niman yejua techpaleuis (1 Pedro 5:7).

¿Biblia techijlia kemanon niman kanon uelis tiknotsaskej toTajtsin? Yejuin tikitaskej ipan okse tlamachtijli.