¿Tleka Jesús otlajyoui niman omik?

¿Tlenon titlankiliskia tla mitstlajtoltiskej tla tikneki tinemis nochipa? Melak miyekej kijtoskia ika kema kineki nemiskej. San ika, sekimej kinemiliaj ika yejon xuelis panos. Nochimej kimatstokej ika tinochimej timikij.

Aman matikonnemilikan ika techtlajtoltiaj: “¿Tiknektika timikis?”. Maski san kanon niman kenon manemikan tlaltikpakchanejkej, kijtoskiaj ika ka. ¿Tleka? Pampa tinochimej tiknekij tinemiskej, maski melak ouijtika tlen tikixnamiki ipan tonemilis. Biblia kijtoua ika toTajtsin otexchijchiuj matiknekikan matinemikan. Kema, iTlajtol kijtoua ika okitlali “ipan inyojlo [...] nochipa manemikan” tlaltikpakchanejkej (Eclesiastés 3:11).

San ika, tlaltikpakchanejkej xuelij nemi nochipa. ¿Tlenon xkuajli opanok? Niman ¿itlaj yokichiuj toTajtsin ika manoyektlali tlen opanok? Ken tlanankilia Biblia tikitaskej ika teyolpaktia. Yejuin ijkon ipampa ken Jesús otlajyoui niman omik.

¿TLENON OPANOK?

Ipan kachtopa yeyi tlaxeloltin uejueyimej itech amoxtli Génesis, techijlia ika toTajtsin okitlali kachtopa tlakatl, Adán niman kachtopa siuatl, Eva, manemikan nochipa niman okimijli tlenon noneki kichiuaskej niman ijkon uelis nemiskej nochipa. Noijki techijlia kenon yejuamej xokitlakamatkej toTajtsin niman okinopolouilijkej ika ueliskiaj nemiskej nochipa. Yejuin tlen onoijkuilo ipan Biblia xouijtika nasikamati, niman ika yejon sekimej nimantsin kijtoua ika xmelauak opanok. San ika, amoxtli Génesis, ijkon ken Evangelios tlen uajlauej ipan Biblia, techijlia nochi tlen melauak onochiuj yeuejkaui.a

¿Tlenon yopanok pampa xotetlakamat Adán? Biblia ijkin technankilia: “Ipan in tlaltikpaktli on achtoj tlakatl otlajtlakoj niman ipampa on tlajtlakojli onkaj mikilistli. Niman aman nochimej mikiskej pampa nochimej tlajtlakouaj” (Romanos 5:12). Adán otlajtlako ijkuak xokitlakamat toTajtsin. Kuakon yejua okinopolouili kipiyas nemilistli tlen xkeman tlamis niman sakin omik. Aman, pampa tejuamej tiikoneuan, otechpanoltili itlajtlakol. Niman ika yejon tikpiyaj kokolistli, tiueuentsintiaj niman timikij. Tlaixmatkej yokitakej ika ijkon panoua pampa tajtin kinpanoltiliaj miyek inkoneuan. San ika ¿yokichiuj itlaj toTajtsin ika manoyektlali tlen opanok?

¿TLENON YOKICHIUJ TOTAJTSIN?

ToTajtsin yokichiuj itlaj tlen ika techmakixtis itech tlen Adán otechpanoltili. Kijtosneki ika oksejpa uelis tikpiyaskej tlen Adán okinopolouili. ¿Tlenon yokichiuj toTajtsin niman ijkon uelis tinemiskej nochipa?

“Tlajtlakojli kitemaka tlaxtlauijli ikan mikilistli”, kijtoua Biblia ipan Romanos 6:23. Yejuin kijtosneki ika onka mikilistli ipampa tlajtlakojli. Adán otlajtlako niman ika yejon omik. Tejuamej noijki titlajtlakouaj niman tiktlaxtlauaj totlajtlakol ika mikilistli. San ika, tejuamej xotikpeualtijkej tlajtlakojli, otitlakatkej ika yejuin tlajtlakojli. ToTajtsin akin tetlasojtla okuajtitlan iKoneuj, Jesús, makitlaxtlauaki totlajtlakol. ¿Kenon onochiuj yejuin?

Pampa Adán akin xkipiaya tlajtlakojli xotetlakamat, okichiuj maonia tlajtlakojli niman mikilistli. Noijki san ipampa se tlakatl, akin xkipiaya tlajtlakojli, otetlakamat niman hasta omik otechmakixti itech mikilistli. Biblia kijtoua ijkin: “Ijkon ken miyekej onokuepkej tlajtlakolejkej san ipampa se tlakatl xokitlakamat Dios, no ijki Dios miyekej kinselis ken on yejuan yolmelajkej pampa se tlakatl okitlakamat Dios” (Romanos 5:19). Jesús yejua “se tlakatl” akin xkipiaya tlajtlakojli.b Yejua okuajkaujteuj iluikak kampa nemiya niman omikiko topampa. Ika yejon, aman toTajtsin uelis techitas ika tiyolmelaujkej niman uelis tikpiyaskej nemilistli tlen xkeman tlamis.

¿TLEKA JESÚS OTLAJYOUI NIMAN OMIK?

San ika ¿tleka nonekiya mamiki Jesús niman ijkon manochiua yejuin? ¿Xueliskia toTajtsin san makijto ika ikoneuan Adán uelis kipiyaskej nemilistli tlen xkeman tlamis? Yejua ueliskia kichiuaskia yejon. San ika, xkinamikiskia ijkon ken yokijtoka, ika tlajtlakojli notlaxtlaua ika mikilistli. Yejon tlanauatijli ueyi kijtosnekiya, ika yejon nonekiya notlakamatis niman xueliskia kipatlas san ken yejua kinekis. Yejuin nonekiya ijkon nochiuas niman ijkon kiteititis melajkayotl (Salmo 37:28).

Tla toTajtsin xkitlakamatiskia tlanauatijli itech melajkayotl tlen yejua yokitlalijka, tlaltikpakchanejkej ueliskia notlajtoltiskej tla yejua noijki ijkon kichiuas itech okseki tlemach. Se neskayotl, ¿ueliskia kiteititis imelajkayo tla kitlapejpeniskia itech ikoneuan Adán akinon kinamiki kiselis nemilistli tlen xkeman tlamis? ¿Ueliskia tikneltokaskej ika yemelak kichiuas ika tlayekapan tlen yokijto? Pampa yejua okichiuj ken kinamiki itech imelajkayo, kuajli tikmatstokej ika toTajtsin techmakixtis niman ika yejua nochipa kichiuas tlen melajki.

Ipampa imikilis Jesús toTajtsin okichiuj matikpiyakan tlamachialistli ika tinemiskej nochipa ipan se Xochitlalpan. Xkita tlen okijto Jesús ipan Juan 3:16: “Dios sanoyej okintlajsojtlak on tlaltikpaktlakamej hasta okitemakak isenteKonetsin para nochi on akin kineltokas xpoliuis, yej kipias yenkuik nemilistli para nochipa”. Ika imikilis Jesús xsan ueli tikitaj ika toTajtsin nochipa kichiua tlen kinamiki, noijki tikitaj ika yejua melak techtlasojtla.

San ika ¿tleka nonekiya matlajyoui niman mamiki ijkon ken uajnestiuj ipan Evangelios? Ijkuak melak ouijtika ken okitlatlatakej niman ika oyolmelaujkanen, Jesús okiteititi ika xmelauak tlen okijto Satanás ika tlaltikpakchanejkej xueliskej yolmelaujkanemiskej itech toTajtsin ijkuak kintlatlataj (Job 2:4, 5). Tlen okijto Satanás, nesiya ika melauak ijkuak okichiuj ika Adán matlajtlako. San ika, Jesús akin noijki katka ken Adán akin xkipiaya tlajtlakojli, okitlakamat toTajtsin maski melak otlajyoui (1 Corintios 15:45). Yejua okiteititi ika Adán noijki ueliskia kitlakamatis toTajtsin tla yejon kitlapejpeniskia. Noijki, ijkuak Jesús okijyoui tlatlatalistli, otechititi ika noijki uelis ijkon tikchiuaskej (1 Pedro 2:21) ToTajtsin kiteochiuas ikoneuj Jesús pampa okitlakamat, kimakas nemilistli ipan iluikak tlen xkeman uelis ijtlakauis.

¿KENON MITSPALEUIS YEJUIN?

Imikilis Jesús yemelak onochiuj. Uelis tikijtoskej ika aman otlapouj ojtli tlen teuika itech nemilistli tlen xkeman tlamis. ¿Tikneki tejua tinemis nochipa? Jesús okijto tlenon noneki tikchiuaskej: “Ijkuak se mitsixmati tejua yejuan san moselti melauak tiDios, niman nejua niJesucristo yejuan otinechajtitlan, yejua kipia on nemilistli yejuan para nochipa” (Juan 17:3).

Akin okijkuilojkej yejuin revista mitstlajtlaniliaj ika xmomachti okseki itech Jehová, akin melauak toTajtsin, niman itech iKoneuj, Jesucristo. Iteixpantijkauan Jehová akin chantij kampa tejua tichanti melak kuelitaskej mitspaleuiskej. Noijki uelis tiknextis tlen mitspaleuis ipan www.jw.org/ngu.